Entwurfsmuster

Es Entwurfsmuschter (engl. design pattern) beschribt e bewährti Lösigs-Schablone für nes Entwurfsproblem. Es isch e widerverwändbari Vorlag zur Lösig vomne augemeine Problem im ne spezifische Kontegscht. Der Usdruck Entwurfsmuster chunnt us der Architektur. Speter isch er vor Softwareentwicklig überno worde. O i Bereiche usserhaub vo der Informatik isch di Idee immer meh verbreitet.

De Architekt Christopher Alexander het i de 1970er Jahr e Sammlig vo Entwurfsmuschter zämegsteut. Mit dene Muschter het er wöue d Bewohner i Entwurfsprozäss ibinde. Der theoretisch Asatz für Entwurfsmuschter het er scho 1964 i Notes on the synthesis of form dargsteut. Obwou si vo dert chunnt, isch d Idee vo de Entwurfsmuschter ir Architektur bi witem nid so verbreitet wi i der Softwareentwicklig.

1987 hei der Kent Beck u der Ward Cunningham di Idee us der Architektur ufgriffe u Entwurfsmuschter für grafischi Oberflächine in Smalltalk entwicklet. Es Jahr speter het der Erich Gamma sini Promotion a der Universität Züri über d Veraugemeinerig vo däm Konzept uf d Softwareentwicklig agfange. Zäme mit em Richard Helm, em Ralph Johnson um John Vlissides het er ds Buech Design Patterns - Elements of Reusable Object-Oriented Software veröffentlechet, wo 23 Entwurfsmuschter beschribt u der Idee vom Entwurfsmuschter i der Softwareentwicklig zum Durchbruch het verhoufe.