Antonín Zápotocký

De Antonín Zápotocký (* 19. Dezember 1884 in Zákolany bi Kladno, Böhme; † 13. November 1957 z Prag) isch en tschechoslowakische Gwerkschaftsfüerer, Politiker und Autor ksi. De Zápotocký isch de zweiti kommunistischi Staatspräsident vo de Tschechoslowakei ksi.

Im Februar 1948 hät de Kommunistischi Partei vo de Tschechoslowakei im Februarumsturz d Macht in de Dritte Tschechoslowakische Republik übernoh. Wil de damaligi Präsident Edvard Beneš die neui Verfassig vom Mai 1948 nöd hät welle unterschribe, isch er zruckträte, und de Klement Gottwald isch neue Staatspräsident worde.

De Zápotocký isch dadurch de Nachfolgr vom Gottwald als Ministerpräsident vo de Tschechoslowakei worde und hät d Regierig gleitet. De Gottwald isch am 14. März 1953 (ei Woche nach em Josef Stalin) gstorbe und de Zápotocký isch am 21. März 1953 vo de tschechoslowakische Nationalversammlig zum Präsident gwählt worde.

 Commons: Antonín Zápotocký – Sammlig vo Multimediadateie