Lévis
|
Ville de Lévis | |
|---|---|
| Kaart | Wapen |
 | |
 | |
| Vlag | |
 | |
| Land |  Kanada
|
| Provinsie |  Quebec
|
| Koördinate | 46°48′N 71°11′W / 46.800°N 71.183°W |
| Stigting | 1861/2002 |
| Oppervlakte: | |
| - Totaal | 443,65 vk km |
| Hoogte bo seevlak | -- |
| Bevolking: | |
| - Totaal (2008) | 130 006 |
| - Bevolkingsdigtheid | 289,3/vk km |
| Tydsone | UTC -5 (Oostelike tyd) |
| Burgemeester (2005-2009) | Danielle Roy-Marinelli |
| Amptelike Webwerf | ville.levis.qc.ca |
Lévis (amptelik Ville de Lévis) is 'n stad in die ooste van die Kanadese provinsie Quebec met 'n oppervlakte van 443,65 vierkante kilometer en 'n bevolking van 130 006 mense (2008). Die stad het in sy huidige vorm eers op 1 Januarie 2002 ontstaan toe tien stede en dorpe (waaronder die historiese stad Lévis wat in 1861 gestig is) saamgesmelt het.
Lévis is aan die suidoewer van die Sint-Laurensrivier, teenoor die provinsiale hoofstad Quebecstad en tussen Beaumont en Saint-Antoine-de-Tilly geleë. 'n Veerboot verbind die historiese stadskerne van Ou-Quebecstad (Vieux-Québec) en Ou-Lévis (Vieux-Lévis) met mekaar, terwyl twee brûe, Quebec-brug en Pierre-Laporte-brug, die westelike stadsdele van Lévis met Quebecstad verbind.
Lévis is ook die naam van die gewestelike distriksmunisipaliteit (Frans: Municipalité régionale de comté) in die administratiewe gewes Chaudière-Appalaches en sensusafdeling van die provinsie Quebec wat met die stadsgebied van Lévis ooreenkom. Lévis fungeer as administratiewe sentrum van die gewestelike distriksmunisipaliteit.
Lévis is die beduidendste nywerheidsentrum in die gewes Chaudière-Appalaches. Die grootste olieraffinadery van Oos-Kanada, Ultramar, is in die stadsdeel Saint-Romuald geleë. Die skeepswerf Davie Québec Inc. en die koeldrankvervaardiger Frito-Lay Canada, 'n dogtermaatskappy van PepsiCo, het hulle hoofkwartiere in die ooste van Lévis. Die Mouvement des caisses Desjardins, wat in 1900 deur Alphonse Desjardins in Lévis gestig is, is die grootste vereniging van koöperatiewe banke in Noord-Amerika en een van die beduidendste werkgewers in die metropolitaanse gebied van Quebecstad. Vir sy ekonomiese ontwikkeling is Lévis in 2005 as die "Stad van die jaar" aangewys.