Faliraki
Faliraki Φαληράκι | |
|---|---|
 Uitsig op Faliraki se strand en hotelle | |
  Faliraki | |
| Koördinate: 36°20′N 28°12′O / 36.333°N 28.200°O | |
| Land |  Griekeland |
| Streek | Suid-Egeïes |
| Streeks-eenheid | Rhodos |
| Munisipaliteit | Rhodos |
| Bevolking | |
| • Totaal | 1 996 |
Faliraki (Grieks: Φαληράκι) is 'n belangrike kusoord op die Griekse eiland Rhodos, in die Dodekanese. Dit is geleë aan Falirakibaai, op die noordoostelike kuslyn, ongeveer 14 km suid van Rhodosstad en 10 km suidoos van die lughawe, wat sowat 20-30 minute afgeleë is. Dit maak deel uit die van Kallithea-munisipaliteit.
Toerisme
[wysig | wysig bron]Faliraki is een van die toeristesentrums van die eiland. Die historiese geboue van die voormalige Griekse visdorpie het grootliks gewyk voor toerismeontwikkelings. Nogtans word aanliggend aan Faliraki enkele klein, ouer en plaaslikbestuurde verblyfplekke gevind wat nog aan die Faliraki van weleer herinner. Aan die noordekant van Falirakibaai word 'n klipperige landhoof gevind, waaragter die bekende warmwaterbron van Kalithea gevind word. Na die suide is Ladiko en die Anthony Quinn-baai.
Die huidige Faliraki word veral gekenmerk deur die uitgestrekte, effens aflopende sand- en kieselstrand wat aan die noordekant by die voormalige stadskern aansluit. Aan die 5 km-lange strandfront word 12 FEE blouvlagstrande aangetref. Sedert die einde van die 1980's is talryke hotelle op die strandfront gebou. Die moderne multiverdiepinghotelle het ook heelwat spysenierings-, disko- en kleiner bedrywe meegebring. Die area is geskik vir watersportaktiwiteite sodat die hotelle 'n verskeidenheid jetski-, roei-, pagaai-, seil- en branderplankaktiwiteite aanbied. Daarbenewens word die waterpark van die Esperiahotelgroep skuins oorkant die Esperos Palace-hotel aangetref, wat onder die grootste waterparke van Europa tel.[1]
As reisbestemming en vertrekpunt vir verdere aktiwiteite is Faliraki goed geleë. So is daar byvoorbeeld vaarbootverkeer na die Akropolis van Lindos. Busroetes deurkruis Faliraki en verbind die oord in minder as 20 minute met Rhodosstad, die hoofstad van die eiland.
Die dorp beskik ook oor 'n nuwerwetse kegelbaan, 'n geskiedenispark en 'n pretpark vir families en jonger kinders. Die dorpsmidde, veral in Julie en Augustus, is bekend vir kroeë en klubs. Benewens tradisionele Griekse cuisine is daar ook restaurante wat Sjinese, Meksikaanse, Italiaanse en Britse geregte verskaf. Aan die strandfront word onder meer kafeterias en toeristewinkels gevind. Die St Apostolos vissershawe is soggens bedrywig wanneer die visserbote hul vangs aflaai, die vaarbote direk na Symi, Lindos, Rhodesstad en strande vertek en die plaaslikes saamtrek vir 'n oggendkoffie.
