DR 877
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
DR 877, in die omgangstaal algemeen bekend as Fliegender Hamburger ("Vlieënde Hamburger"), was 'n dieselaangedrewe tweeledige spoorwa wat deur die Deutsche Reichsbahn-Gesellschaft (die spoorwegmaatskappy van die Duitse Ryk) vanaf 1933 op die roete tussen Berlyn en Hamburg gebruik is. Dit was die eerste stroombelynde trein wat vir 'n gereelde diens gebruik en van 'n verbrandingsenjin-spoorwa (oorspronklik DR 877, later modelreeks VT 04.0 van die Federale Duitse Spoorweë Deutsche Bundesbahn) voorsien is. Die spoorwa is in 1931 deur die Waggon- und Maschinenbau AG in Görlitz ontwerp en vervaardig.[1]
Die trein het oor 98 sitplekke in twee ruim tweedeklas-kompartemente en 'n verversingslokaal met vier sitplekke beskik. Om hul eksklusiwiteit te beklemtoon was die spoorwaens net soos die bekende Rheingold-sneltrein room- en perskleurig.
Die gereelde treindiens is op 15 Mei 1933 tussen die Berlynse stasie Lehrter Bahnhof en Hamburg se hoofstasie in bedryf gestel. Die afstand tussen dié twee stasies (286 kilometer) is in 'n reistyd van slegs 138 minute afgelê – 'n rekord wat eers 64 jaar later in Mei 1997 deur 'n ICE-hoëspoedtrein van die Deutsche Bahn AG (die huidige Duitse spoorwegmaatskappy) gebreek is.
Die Fliegende Hamburger is as prototipe vir 'n aantal soortgelyke sneltreindienste gebruik wat Berlyn voor die Tweede Wêreldoorlog met ander Duitse metropole soos Keulen, Frankfurt am Main, München en Stuttgart, asook Leipzig met Wesermünde (Bremerhaven) en Keulen verbind het. Vanweë die tekort aan dieselbrandstof, wat oorwegend vir militêre doeleindes benodig is, is die sneltreindienste gedurende die oorlog gestaak. Een van die dieselwaens word vandag in die Duitse Vervoermuseum in Neurenberg vertoon.
Tot en met 15 Desember 2002 het 'n ICE-hoëspoedtreindiens tussen Berlyn en Hamburg die tradisionele naam Fliegender Hamburger gedra.
Verwysings
[wysig | wysig bron]- ↑ (de) Carl Asmus: Die Deutsche Eisenbahn. Die Entwicklung des deutschen Schienenverkehrs von 1835 bis heute. Bath: Parragon Books (sonder jaargetal), bl. 237
Notas
[wysig | wysig bron]- Hierdie artikel, of gedeeltes daarvan, is uit die volgende Wikipedia-artikel vertaal: Fliegender Hamburger
Eksterne skakels
[wysig | wysig bron] |
Wikimedia Commons bevat media in verband met DR 877. |
- (de) Amptelike webwerf van die Deutsche Bahn AG – Fliegende Züge
- (de) "Fliegender Hamburger" Geargiveer 24 Junie 2009 op Wayback Machine
- (de) www.bahnbilder.de – Fotogalery