Gorbals

The Gorbals (Skots-Gaelies: Gort a' Bhaile) is 'n stadsbuurt van Glasgow, Skotland aan die suidoewer van die Clyderivier.

In die laat 19de eeu het die industrialisering hier nadelige uitwerkings soos oorbevolking veroorsaak. Baie bewoners het hulle vanweë hul nabygeleë werkgeleenthede hier gevestig, of omdat hulle geen ander behuising kon bekostig nie. Die Gorbals het sodoende tot 'n krotbuurt ontwikkel. Alhoewel daar pogings onderneem is om die buurt te herontwikkel, het sulke maatreëls gewoonlik slegs daartoe gelei dat ander sosiale misstande soos dakloosheid en verspreidende siektes ontstaan het.

Ná die Tweede Wêreldoorlog was die Gorbals die eerste krotbuurt in die Skotse metropool waar wetgewing voorsiening vir herontwikkeling en die bou van veelverdieping-woonstelblokke gemaak het. In die laaste dekades is sommige ou geboue gesloop om plek te maak vir 'n mengsel van nuwe sosiale en privaat behuising. Ander woonhuise word opgeknap en verbeter.

Die plaaslike Caledonia Road-kerk word as een van die merkwaardigstre voorbeelde van sakrale boukuns in Glasgow beskou. Die voormalige Presbiteriaanse kerkgebou, wat in die 1850's volgens planne van Alexander "Greek" Thompson opgerig is, het in 1965 'n brand ten prooi geval. Dit is tans 'n indrukwekkende bouval.