王羲之

王羲之
字	逸少
出世	303年 琅邪郡臨沂縣（山東）
死	361年（57–58歲） 會稽郡剡縣金庭（浙江）
別名	書聖 王右軍
職業	書法家 右軍將軍
活躍時期	東晉
知名作品	蘭亭集序 樂毅論 黃庭經 十七帖 快雪時晴帖
配偶	郗璿
仔女	7仔1女
父母	王曠 衛氏

王羲之wong4 hei1 zi1（303年—361年），字逸少jat6 siu3，係一位東晉嘅書法家，精通好多種書體，俾人叫做書聖。王羲之做官做到右軍將軍，所以又有人叫佢做王右軍jau6 gwan1。佢最出名嘅書法作品係《蘭亭集序》，有「天下第一行書」嘅稱號。

王羲之喺西晉太安二年（公元303年）出世，鄉下係琅邪je4郡臨沂ji4，家下屬於山東省。琅邪王氏係魏晉時期嘅名門望族，出過唔少達官貴人。例如王羲之阿爺王正就做過尚書郎，太爺王覽做到光祿大夫，王羲之個伯父王導後來仲做埋東晉嘅丞相。^[1][2]

王羲之老竇叫王曠，阿媽係衛氏，仲有個阿哥叫王籍之。西晉末年嘅八王之亂政治内鬥嗰陣，王羲之老竇第一個提議後來嘅東晉開國皇帝司馬睿南遷。^[1]於是喺王羲之十歲嗰年，佢全家就同其他士族一齊跟住司馬睿渡江走佬，搬咗去依家南京嗰頭。

王羲之喺廿一歲嗰年娶咗太尉郗ci1鑒個女郗璿做老婆。據講當時郗鑒派人去王府睇下邊個啱做佢女婿，啲王氏子弟就個個執到姿姿整整噉等住俾佢揀中。唯獨係王羲之一個人攤咗喺東面張床度，仲突住個肚食嘢，成幅闊佬懶理噉嘅樣。郗鑒知道咗之後，好欣賞佢份人又真又豁達，就決定嫁個女俾佢。^[1][3]成語「東床快婿」就係噉嚟嘅，依家用嚟比喻一位好女婿。^[4]

王羲之後來同佢老婆一共生咗七個仔、一個女，其中有幾個寫書法都唔錯。^[1]佢細仔王獻之都係一位好出名嘅書法家，佢哋兩父子喺書法界合稱叫「二王」。^[2]

王羲之廿三歲開始做官，開初做嘅係秘書郎，負責執宮入面啲藏書。佢之後又做過江州刺史、將軍幕僚呢啲細官仔，但就係噉拒絕朝廷嘅徵召，唔肯入朝做侍中或者吏部尚書。^[1]比起其他差唔多家族背景嘅人嚟講，其實王羲之嘅仕途開始得算遲。有人話噉係因為佢同佢伯父王導政見不合，而王導係東晉大官，所以王羲之入朝拖得就拖。

王羲之信奉道教，認為食仙丹可以做神仙或長生不老，正因為咁，佢就有長期啪藥、食仙丹嘅習慣。佢嘅晚年，因病投放更多嘅時間去深山入便採集藥石服食，但係，藥石並冇令到佢長命，反而可能傷咗佢嘅身體，最後响健康狀況日益惡化嘅情況下，喺59歲嗰年（361年）就與世長辭，死後葬喺孝嘉鄉濟度寺（而家嘅浙江嵊州金庭鎮），反而佢老婆郗璿就好長命，90歲先去世。