澳門

22°10′N 113°33′E / 22.167°N 113.550°E / 22.167; 113.550

澳門特別行政區 Região Administrativa Especial de Macau（（葡萄牙文）） Macao Special Administrative Region（（英文））
通稱：澳門
旗 徽
國歌：《義勇軍進行曲》
澳門位置
屬地（實轄）
幅員 國土：32.9平方公里
海岸線長	41公里[1]
時區	澳門標準時間：UTC+8
國民
人數	以下係2020年[2]嘅估計數字 人數：696,100 人口密度：16,921/km2
官方語言	粵語 葡萄牙文
民族	中國籍 (88.4%) 葡國籍 (1.4%) 菲律賓籍 (4.6%)
主要宗教	睇#宗教
主要節日	睇#節假日
行車方向	左面[3]
家用電源 電壓：220伏[3] 插座：英規 頻率：50赫茲[3]
政制
國家憲法	澳門特別行政區基本法
國家結構形式	特別行政區
國家政權	中華人民共和國
政制	一國兩制
法律體系	大陸法系
其他領袖（三權分立） 行政（行政長官）：賀一誠 立法（立法會主席）：高開賢 司法（終審法院院長）：岑浩輝
經濟
GDP（國際匯率） 以下係2024年嘅估計數字 總計：▲ $546.77億[4] 人均：▲ $78,962[4]
中央銀行	澳門金融管理局
貨幣	澳門元（又嗌「葡幣」、「葡紙」）（MOP，$）
資訊
立國歷史 立國日期：1999年12月20號 立國事件：政權由葡萄牙移交中國
國家象徵	市花：蓮花
國家代碼	MO / MAC / 446
國際域名縮寫	.mo
國際電話區號	+853
現役軍人數	中國人民解放軍駐澳門部隊1,000人

澳門
澳門嘅繁體寫法同埋簡體寫法
中文名
繁體字	澳門
簡化字	澳门
字面意思	Bay Gate
標音 官話 - 中文拼音 Àomén - 國際音標 [ɑ̂ʊ̯mə̌n] - 注音符號 ㄠˋ ㄇㄣˊ 第啲官話 - 小兒經 اَوْمٍ ‎ 閩語 - 閩南語白話字 Ò-mn̂g - 閩東語平話字 Ó̤-muòng 吳語 - 拉丁化 au去men平 粵語 - 粵拼 Ou3mun2 - 國際音標 [ōu.mǔːn] - 耶魯拼音 Oumún 客家話 - 客家話拼音 Au4 mun2
Macau Special Administrative Region
繁體字	澳門特別行政區（澳門特區）
簡化字	澳门特别行政区（澳门特区）
標音 官話 - 中文拼音 Àomén Tèbié Xíngzhèngqū (Àomén Tèqū) 閩語 - 閩南語白話字 Ò-mn̂g Te̍k-pia̍t Hêng-chèng-khu 吳語 - 拉丁化 au去men平 deh入bih入 ghan平tsen去chiu平 粵語 - 粵拼 Ou3mun2 Dak6bit6 Hang4zing3 Keoi1 - 國際音標 [ōu.mǔːn tɐ̀k̚.piːt̚ hɐ̏ŋ.tsēŋ kʰɵ́y] - 耶魯拼音 Oumún Dahkbiht Hàhngjing Keūi 客家話 - 客家話拼音 Au4mun2 Tet6piet6 hang2zin4ki1 (Au4mun2 Tet6ki1)

澳門（粵拼：ou3 mun4*2^{[註 1]}；葡文：Macau）係華南嘅一埠兼一城，喺廣東珠江口西南面，東望九洲洋，南望南海。舊時係葡萄牙殖民地，特別行政區喺1999年12月20號成立，全名澳門特別行政區（葡文：Região Administrativa Especial de Macau；縮寫：RAEM；英文：Macao Special Administrative Region；縮寫：MSAR）。歷史上有梳打埠（so1 daa2 bou6）^[5]、蠔鏡（hou4 geng3）、馬交（maa5 gaau1）、濠江等嘅別稱。

澳門有三個部份，分別喺駁住中國大陸嘅澳門半島、南面嘅氹仔同路環，後兩者曾經係兩個島，不過已經畀路氹城嘅填海工程二合為一。澳北接廣東珠海，拱北關閘係通道通。澳西海邊望出去，有珠海嘅灣仔同橫琴。隔九州洋可見香港大嶼山。

澳門開埠已經有四五百年，畀當時嘅葡萄牙人睇中，喺1557年同大明租地一居，成爲葡萄牙殖民地。到咗1999年12月20號，澳門主權正式成為中華人民共和國嘅一部分。

大清嗰陣，澳門喺香港開埠之前，係所有歐洲人等入省城嘅地方。所以係繁華嘅貿易港。直至1841年香港開埠，先至畀香港替代。之後轉以娛樂同旅遊事業爲主，賭業係經濟命脈之一。

澳門喺明代史書中記載稱為「蠔鏡」（濠鏡），澳門當時係葡萄牙同中國貿易嘅主要補給港口。葡萄牙人登陸澳門之後，問當地人呢度地名叫乜嘢，因為喺媽閣廟旁邊，當地人以為佢哋問嗰間廟於是就回答「媽閣」，就噉樣澳門就被命名為「Macau」（粵語「媽閣」葡文譯音）。澳門原本屬於廣東香山（家下中山市）。1557年，葡萄牙人向當時大明政府取得居住權，成為第一批進入中國嘅歐洲人。最初由果阿親王管轄，1623年，葡萄牙政府委任馬士加路也為首任澳門總督。

1844年9月20號，葡萄牙女王瑪麗亞二世宣佈澳門做「自由港」；1849年，葡萄牙唔再向中國交澳門嘅地租。1851年，葡萄牙佔領氹仔。1864年，葡萄牙再佔領路環。1883年，葡萄牙再佔領望廈、青洲。1887年，當時嘅葡萄牙政府迫清政府簽訂《中葡和好通商條約》，規定「葡國永駐管理澳門以及屬澳之地與葡區治理它處無異」^[6]。1896年，葡萄牙企圖再佔領附近嘅大小橫琴島，但唔成功。1908年，葡萄牙要求展界，並劃定澳門嘅界址。1961年，葡萄牙海外部確定澳門為旅遊區，特准設賭。同年澳門政府頒佈《承投賭博娛樂章程》。喺1974年，澳門首條陸路連接工具──澳氹大橋落成啟用之前，民間或運輸往來兩離島同灣仔都只有船，曾經有航班。

葡萄牙人喺澳門一直擁有特權或者特殊地位，普遍居民對呢個情況多多少少都唔滿意：呢種不滿，從1849年8月29號沈志亮殺死亞馬留總督開始，直到1966年12月3號，因為文化大革命以及氹仔坊眾學校事件而觸發嘅「一二三」事件為止嘅情況可以睇到。1974年4月25號葡萄牙革命，新政府實行非殖民地化政策，承認澳門唔係殖民地，而係中國領土。中葡兩國政府喺1986年開始為澳門問題展開合共四輪談判，1987年4月13號兩國總理喺北京簽訂《關於澳門問題的聯合聲明》同埋兩個附件。聯合聲明話，澳門地區（包括澳門半島、氹仔島同路環島）係中國嘅領土，中華人民共和國會喺1999年12月20號對澳門恢復行使主權，而1993年3月31號喺北京，由全國人大通過並經當時國家主席江澤民頒佈嘅《澳門特別行政區基本法》（共九章145條另加三附件）成為相當於澳門嘅「憲法」。

1999年12月20號零時喺澳門新口岸交接儀式會場（拆咗，現分別改建為「文化中心廣場」同「澳門回歸賀禮陳列館」），由中、葡兩國元首見證澳門第127任總督韋奇立同澳門特區行政長官何厚鏵交接澳門政權，第日朝早澳門人歡迎駐澳門解放軍之下，中華人民共和國正式對澳門行使主權。根據《基本法》，澳門特區行政長官係五年一任，最多可以連任一次。

澳門位於中國東南部沿海，地處珠江口西岸，北回歸線以南，由澳門半島、氹仔（古稱潭仔）同路環兩個小島組成（據地圖繪製地籍局測量，東望洋山眺望台望遠鏡旁邊嘅石柱參考地理坐標：北緯22°11'47"、東經113°32'58"，標高91.2米）。澳門最高處係路環疊石塘山山頂，即而家媽祖像座落處（標高172.4米）。

2003年統計嘅澳門面積為27.5平方公里（三個島嶼加上填海總和），由1866年開始澳門不斷進行填海（1840年澳門半島面積只有2.78平方公里）；人口方面：據統計暨普查局資料，截至2005年9月30號嘅居住人口估計為482,000人，以華人為主，佔總人口嘅97%，葡萄牙人（包括喺澳門土生土長嘅葡人）同埋其他外國人就佔3%。中文同葡文係現行嘅官方話。居民日常生活用語係粵語。大部分居民識普通話，另外重有一部份祖籍福建嘅居民識閩南話。此外英文喺澳門作為商業及旅遊用語同埋部分學校嘅教學語言而流行。

澳門喺廿一世紀初，大興土木。2005年10月底舉辦完第四屆東亞運動會，其中主場館「澳門蛋」喺2005年7月開幕。除此以外，漁人碼頭、澳門科學館。

澳門 氣候圖表
㋀	㋁	㋂	㋃	㋄	㋅	㋆	㋇	㋈	㋉	㋊	㋋
32   18 12	59   18 13	83   21 16	217   25 20	362   28 24	340   30 26	290   32 26	352   31 26	194   30 25	117   27 22	43   23 18	35   20 14
溫度用攝氏（℃）嚟記 降雨量單位係毫米（㎜） 出處：世界氣象組織（WMO）
英制單位換算 ㋀ ㋁ ㋂ ㋃ ㋄ ㋅ ㋆ ㋇ ㋈ ㋉ ㋊ ㋋     1.3   64 54     2.3   64 56     3.2   69 61     8.6   76 68     14   83 74     13   87 78     11   89 79     14   88 79     7.6   86 77     4.6   81 72     1.7   74 64     1.4   67 57 溫度用華氏（℉）嚟記 降雨量單位係英吋

澳門屬於副熱帶濕潤氣候，每年以十月中至十二月天氣最好同最穩定，陽光充沛之餘唔會太炎熱，濕度唔高，最為舒服。澳門春季唔明顯，五月底初夏時受海洋性氣候影響，炎熱潮濕吹西南風，重不時有熱帶氣旋（即颱風）或者西南季候風低壓槽帶來嘅長時間暴雨，十月秋季來臨，十一月底天氣轉涼，而北方冷空氣亦準備喺12月入侵，成一波波寒流，寒流（或者叫冷鋒）來臨前後幾個鐘氣溫可急降超過十度，所以時時喺年初兩個月錄得嗰年最低氣溫。

澳門半島同氹仔島有三條大橋駁埋。一者，一九七四年十月開嘅嘉樂庇總督大橋，俗稱澳氹大橋或舊大橋。二者一九九四年三月開嘅友誼大橋。三者，二零零五年一月九號開嘅西灣大橋，雙層行車。重有蓮花大橋，由路、氹兩島間外十字門填海而成嘅路氹城，駁去珠海市橫琴島。橋係第二個關卡，駁去中國大陸。東面離香港六十公里，好天嗰時，可以隔洋望到香港大嶼山，計劃緊嘅港珠澳大橋一篤，會駁去澳門東北角嘅東方明珠。

澳門除咗內港碼頭，同埋喺新口岸嘅外港碼頭之外，喺1995年11月，位於澳門氹仔東側嘅澳門國際機場正式營運，據機場資料顯示：澳門國際機場2005年全年客運量為425萬高峰人次，特區政府會斥資60億澳門元填海擴建用來增加客運量，機場主要同內地城市同埋亞洲主要城市有航班往來。

澳門以「堂區」作為行政區劃單位，每一個堂區以嗰區最有代表性嘅教堂作為堂區名。澳門而家有七個堂區，分別係：

• 澳門半島
  • 花地瑪堂區（俗稱北區，包括青州、台山、黑沙環、筷子基同埋水塘）
  • 聖安多尼堂區（即花王堂區，喺澳門西部，包括新橋同沙梨頭；著名嘅大三巴牌坊一帶亦位於本堂區）
  • 大堂區（中區、新馬路以北部分、南灣、水坑尾、成個新口岸填海地段、東至新口岸港澳碼頭，成條環半島公路去到媽閣南端，包括澳門旅遊塔同立法會）
  • 望德堂區（包括荷蘭園、東望洋山、塔石一帶）
  • 風順堂區（亦稱聖老愣佐堂區，包括八十年代尾進行南灣湖填海嘅成個媽閣半島，包括媽閣山、西望洋山、新馬路以南部分）
• 氹仔
  • 嘉模堂區（包括氹仔島同澳門國際機場，另外重有澳門大學喺橫琴嘅新校區）
• 路環
  • 聖方濟各堂區

另外，路氹城現時並唔屬於任何一個堂區。

澳門嘅政治環境比較簡單，除咗因為中國內地對澳門嘅影響自「一二·三事件」以來已經主導咗當地社會生活之外，亦都因為澳門承襲咗葡萄牙嘅比例代表制有關。比例代表制容許立法會以每隊參選隊伍所得到嘅票數比例去決定議席點樣分配，使到主流意見同埋另類意見都可以同時有代表佢哋嘅聲音。^[7]

澳門主要收入來自旅遊業同博彩業（即賭博）。2002年，博彩業收入提供四成以上嘅國民生產總值，而2004年度財政總收入嘅七成半來源於賭博專營權嘅直接稅收。

1950年代至1970年代，爆竹、火柴同神香係澳門三大傳統手工業（各有大小工場以及山寨廠等形式）。踏入1970年代，製衣、針織、彩瓷、電子、玩具同人造花等行業取代上述傳統手工業並支配澳門經濟。到1980年代，因為配額制度關係，紡織品（多數係出口成衣）同埋新興產業包括其他輕工業（例如玩具、人造花同埋電器產品）佔較重要地位，美、法同前西德係澳門嘅出口大國。

但自1993年下半年起內地宏觀調控，物業市場轉冷，曾經有唔少空置嘅未開工地盤充斥澳門半島新口岸區，嗰區有唔少「爛尾樓」同空置商用樓宇。紡織業紛紛北上設廠同時關閉澳門廠房以減少工資成本，加上回歸前治安唔好同埋金融風暴，當時澳門經濟幾乎停滯不前，1996年至1999年更經歷經濟負增長（最多達-4.6%，1998年）。

自特區成立後，改善治安之餘，澳門定位為博彩旅遊業發展嘅城市，而且2003年內地開展港澳個人遊方式來澳門後，內地居民來澳門加為方便。根據澳門統計普查局資料，2005年澳門入境旅客總數為1,871萬人次，較2004年上升12.2%。旅客主要來自中國大陸（佔總數55.9%，當中50.95%係個人遊）、香港（佔總數30%）同埋台灣（佔總數7.9%）。對外貿易方面，據經濟局資料，2005年全年總出口貨值198.2億澳門元，較2004年下跌12.1%，出口產品以紡織、成衣類為主，出口貨值下跌15.1%至180.7億澳門元，佔整體出口貨值77%，非紡織品出口方面以機器設備同零件以及鞋類為主；而進口就上升12.3%，達313.4億澳門元，貿易逆差115.2億澳門元。進口商品以消費品、原料及半製品居多，主要貿易夥伴包括有美國、歐盟、中國內地、日本同埋香港等。

由於2004年帶動澳門經濟強勢增長嘅行業主要都係博彩旅遊業，然後帶動埋建築業、服務性行業、餐飲業同保險業都略有增長。咁對於過度依賴單一產業驅動經濟發展嘅澳門存有隱憂；最先出現喺人力資源暫時短缺方面，衍生一批低學歷嘅人員暫時寄居喺娛樂場工作；另一方面由於經濟強勢長下物價開始飛漲，近年亦開始有炒賣旺區物業嘅現象，而唔少港資地產公司紛紛喺澳門設立分公司，而港資化妝品公司、便利店等亦大舉喺澳門開設分店，呢種現象係過去前所未見嘅，特區政府喺2005年提高投資移民嘅申請資格後，投資移民申請個案減少超過七成，但只可以小程度上竭止炒風。

但由於賭權嘅開放對象係外資，呢種情況喺本地生產總值同人均本地生產總值嘅數據中係睇唔到嘅，換言之，本地居民收入並非同人均本地生產總值同步增長（據2005年4月23號《華僑報》社論觀點）；北區大部分低收入居民生活質素跟唔上超過三成高速增長帶來嘅通漲，生活質素出現倒退狀況。特區政府喺2005年3月1號設立「綜合生活素質研究中心」以助整體提高生活素質。該中心除咗同社會各界舉行多場諮詢會以及舉辦同生活質素有關嘅講座之外，已委託香港大學進行第一輪澳門居民綜合生活素質調查。並喺12月15號公佈中期調查報告。有輿論認為，該中心現時重停留喺探索階段，未見較大成效。

澳門賭業於1847年喺葡萄牙管治之下開始合法化，自此以後，澳門以「東方蒙地卡羅」之名廣為世界所知，賭業更成為澳門經濟一個重要部份。第一個博彩專營權牌照於1937年發畀泰興娛樂公司，但該公司經營太保守，未能完全發揮賭業嘅經濟潛能。當時該公司只有中式博彩項目提供。到咗1962年，政府將所有形式嘅博彩嘅專營權牌照改發畀澳門旅遊娛樂有限公司（簡稱澳娛，簡稱STDM）。牌照於1986年續期十五年，2001年尾屆滿。

2002年，澳門特別行政區政府唔再發出博彩專營權，改為向三間公司發出博彩經營權牌照，分別係澳門博彩股份有限公司（簡稱澳博，STDM嘅子公司），永利度假村（澳門）股份有限公司，同埋銀河娛樂場股份有限公司（已被收購，家下屬銀河娛樂集團有限公司名下）。其中澳博將牌照轉批畀美高梅金殿超濠股份有限公司（美高梅）；銀河轉批畀威尼斯人（澳門）股份有限公司，即三個賭牌五個經辦商，現時澳博正營運十六間賭場；銀河正營運兩間賭場；威尼斯人正營運一間賭場；永利同美高梅未有賭場營運。另2006年3月5號永利公司宣佈將澳門博綵牌照轉批畀新濠博亞娛樂有限公司（簡稱新博），有待澳門特區政府批准。

博彩業喺澳門嘅經濟中扮演重要角色。好多遊客鍾意喺澳門賭博，亦有好多本地人經常出入賭場。總括嚟講，博彩業喺澳門可以分成五大類：賭場賭博、賽馬、賽狗、彩票同埋足球博彩。

澳門人口發展^[8]

年份	1993	1994	1995	1996	1997	1998	1999	2000	2001	2002	2003	2004	2005	2006	2007	2008
人口數目（萬）	39.00	40.36	41.50	41.52	41.94	42.52	42.96	43.15	43.63	44.05	44.67	46.26	48.43	50.99	53.18	54.31
年份	2009	2010	2011	2012	2013	2014	2015	2016	2017	2018	2019	2020	2021	2022	2023	2024
人口數目（萬）	53.33	54.06	55.74	58.20	60.75	63.62	64.68	64.49	65.31	66.74	67.96	68.31	68.32	67.28

澳門有22座建築同埋8個廣場，尤其係前地嘅「澳門歷史城區」已經喺2005年7月15號列入世界文化遺產名錄。

澳門旅遊局同文化局將2006年定為「2006澳門世界遺產年」，並合辦多項文化以及促銷活動，向全世界宣傳。而旅遊局亦考慮喺暑假延長呢啲旅遊景點嘅開放時間，方便遊客。活動已於2月18號喺大三巴牌坊正式啟動。吸引包括中國、香港、台灣、日、韓、歐、北美及澳洲遊客重臨澳門。

• 澳門嘅街道名牌，以葡萄牙嘅瓷磚畫（azulejos）藝術作為藍本。佢藍色同白色嘅主調，配以中文同葡文嘅街道名，成為澳門嘅地方特色之一。喺葡萄牙管治時期，街道名牌嘅葡文名一般佔咗名牌四分之三嘅面積，中文就佔四分之一。澳門特別行政區成立之後，將街道名牌嘅設計修改，中葡文街名各佔名牌面積嘅一半，中文喺上，葡文喺下。而街道嘅中文名亦都由原本嘅直書改為橫書。目前民政總署正逐步更換澳門嘅街道名牌，其中氹仔同路環嘅街道名牌已經全部改用新設計，澳門區舊有嘅街道名牌設計亦都逐漸減少。

• 澳門有唔少名字冗長嘅街道名，喺華語地區來講係非常罕見。呢啲街名大多以葡萄牙軍官政要，或歷史人物嘅名命名，然後以粵語音譯出來。比較多人識嘅有：沙嘉都喇賈罷麗街、士多紐拜斯大馬路、爹美刁斯拿地大馬路、華士古達嘉馬花園等。另外有啲主要街道嘅原名好冗長，大家習慣另外改個易啲記嘅名甚至令到大家唔記得原名。好似俗稱新馬路嘅亞美打利庇盧大馬路、俗稱荷蘭園正街或荷蘭園大馬路嘅肥利喇亞美打大馬路、俗稱提督馬路嘅罅些喇提督大馬路等。亦有一啲以街名嘅諧音而衍生嘅謔稱，例如將沙嘉都喇賈罷麗街叫做「沙煲罌罉街」、巴素打爾古街叫做「巴素打你屁股街」等。

• 廣東話（同香港一樣、廣東話通常係指粵語嘅廣州話）係澳門通用話，喺平民日常生活、做嘢，政府，學校，傳媒用；葡文多數喺政府、法律部門以及同葡萄牙有關連嘅商戶或書局、社區流行；而旅遊景點會廣東話、英文、普通話夾埋用。
• 寫字用繁體中文
• 澳門話（Macanese）係種由葡文、馬來話、粵語、英文、古葡文溝埋些少荷蘭文、西班牙文同埋意大利文嘅話，葡文叫「巴度亞」（Patuá），曾經係澳門土生葡人成日講嘅話。而家差唔多絕跡。最後一個澳門話作家係若瑟·山度士·飛利拉。

• 睇澳門歌手一覽

公眾假期

日期	名	備註
所有星期日	--	--
1月1號	公曆新年	--
春節	農曆正月初一至初三（共3日）	公曆1月底至2月中。春節喺中國民間亦都叫做過年、農曆新年
--	清明節	通常喺公曆4月4號、5號或6號，節氣清明當日。係傳統掃墓祭祖之日
--	耶穌受難日	通常喺公曆3月尾至4月中旬
--	復活節前日	通常喺公曆3月尾至4月中旬
5月1號	勞動節	--
農曆四月初八	佛誕	通常喺公曆5月
農曆五月初五	端午節	通常喺公曆5月尾至6月期間
農曆八月十六	中秋節翌日	通常喺公曆9月至10月初期間
10月1號	國慶日	--
10月2號	國慶日翌日	--
農曆九月初九	重陽節	通常喺公曆10月
11月2號	追思節	--
12月8號	聖母無原罪瞻禮	--
12月20號	澳門特別行政區成立日	--
--	冬至	通常喺公曆12月21號或22號，節氣冬至當日。
12月24號	聖誕節前日	俗稱「平安夜」
12月25號	聖誕節	--

澳門多數居民同其他華人社會一樣，以儒、釋、道以及民間神祇為信仰（觀音同埋媽祖特別流行）。

天主教澳門教區喺1576年1月23號成立，首任主教係賈尼勞（仁慈堂創辦人）。首位華人主教係林家駿主教^[9]。現任主教係黎鴻昇，係首位澳門土生土長嘅華人主教。由於回歸前有大量土生葡人返葡萄牙，教友以華人為主。

聖公會維多利亞教區喺1849年成立，管轄範圍包括澳門。中華聖公會港粵（後稱華南）教區喺1912年成立，管轄範圍包括廣東、香港同埋澳門。1951年因為中國大陸政局轉變，香港以及澳門嘅聖堂脫離中華聖公會港粵教區，成立聖公會港澳教區。而家由香港聖公會教省取代，喺1998年成立香港聖公會澳門傳道地區。

澳門亦係基督新教喺中國嘅第一站。

• 澳門大學（以前叫東亞大學）
• 澳門理工學院
• 澳門旅遊學院
• 聯合國大學國際軟件技術研究所
• 澳門城市大學（舊稱亞洲（澳門）國際公開大學）
• 澳門保安部隊高等學校
• 澳門科技大學
• 澳門鏡湖護理學院
• 歐洲研究學會
• 澳門高等校際學院-現已改名為聖若瑟大學（usj）
• 澳門管理學院
• 中西創新學院

• 葡萄牙里斯本
• 葡萄牙波圖
• 葡萄牙科英布拉（係同過去嘅海島市簽約，海島市即係依家嘅氹仔同路環）
• 瑞典林雪平
• 巴西 聖保羅
• 比利時布魯塞爾（友好協約書）

• 澳門人口
• 澳門通訊
• 澳門交通
• 澳門軍事
• 澳門觀光景點

• 澳門特區門戶網站
  • *澳門特區政府新聞局（繁體中文）
• 澳門印務局
• 澳門城市指南
• 澳門旅遊局
• 澳門格蘭披治大賽車網站
• 政權交接儀式
• 澳門廟宇與節誕
• MacuHub - 中國與葡語國家和地區經貿資訊網（簡體中文）
• 澳門的姊妹城市
• 澳門旅館
• 澳門喺中央情報局《世界概況》嘅資料 （英文）
• 〈マカオ ｜ 外務省〉 (日文)。日本外務省（日文：外務省）。
• "Macau - Department of Foreign Affairs and Trade" (英文). 澳洲外交貿易部（英文：Department of Foreign Affairs and Trade (Australia)）.
• Wikitravel旅遊指南 - 澳門