Tryntje

Tryntje
Taxonomische indêlienge
Ryk: Animalia (Bêestn) Stamme: Chordata (Chordabêestn) Klasse: Aves (Veugels) Orde: Passeriformes (Zangveugels) Familie: Fringillidae (Vienkachtign) Geslacht: Spinus
Sôorte
Spinus spinus Linnaeus, 1758

Tryntje (Spinus spinus of Carduelis spinus, Sijs in't Nederlands) is e zangveugeltje út de familie van de vienkn.

Het Tryntje kud je vele zien in de winter, ip vetbollekes. Z'én e bitje de maniern van mêezekes, en eetn geirne oundersteboovn. Z'én wok de grotte van e mêezeke, mo ze zyn felder gekleurd in't geel met groen.

Tryntjes én e langde van à peu près 12 centimeters.

Vulgroeide vintjes zyn geel-groene met e bitje zwort ip under kopke, de rik is in stripkes, geel-groen en zwort. De búk ét (contraire an de vlasvienke), wok e gestript dessingske. Under vleugels én e gele strepe.

Het vulgroeide wuvveke is e bitje grysder van kleur, en ét gin zwort ip under kopke.

Ze leevn vele in groepkes.

Tryntjes hangn véle oundersteboovn vo t' eetn. Z' eetn geirne zadjes van verschillende boomn lik de trynnebotte (vandoa de naome) en berkn.

E tryntje ét e bitje de vlucht van e mêezeke. Kort en me vele snakskes. Oa je ze in e groepke ziet vliegn, ton is't lik e mierenest.

Tryntjes kommn over hêel Europa voorn, en wok in't oostn van Azië.

Ze zittn dikwils in dennebussn, mo 's winters zie je ze mêestol by trynnebottn.

Ofbeeldiengn die ier by passn ku je vien in de categorie Spinus spinus van Wikimedia Commons.