Belle Epoque
De Belle Epoque (Frans vo de Schôonn tyd) was een periode in de Europeesche geschiedenisse, die begost in de loate 19ste êeuwe en deurde tout den êeste weireldoorloge.
Achter den oorloge wierd er me nostalgie gepeisd an dien tyd, surtout in Frankryk.
De Belle Epoque wierd anzien als een goudn tydperk deurdat er achter de Frans-Duutschn oorlog (1870-71) een periode van vrede was tusschn de grôotmachtn in Europa van mêer of 40 joar.
‘t Leevn verbeterde ook deur de nieuwe technologien, lik d’êeste auto’s en vliegers en de telegrafie. Bedryvn mostn nie langer mi werkn me stoom moa kostn gebruuk moakn van elektriek, de nieuwe energiebronne. D’r wierdn sportverênigingen ipgericht en deur de voruutgank van de geneeskunde en de hygiëne gink de leevnsverwachtienge flink nor omoge.
Ip cultureel vlak wast er 't begun van de film en de fotografie. Ook van nieuwe kunstvormn lik impressionisme en Art Nouveau (Jugendstil genoemd in centroal Europa) en realisme en naturalisme in de literateure, me schryvers lik Guy de Maupassant en Emile Zola.
De Belle Epoque was ook de periode van cabaret en de can-can, een dans die styf populair was in de Moulin Rouge, de nachtclub in Parys. ’t Geloof en de morele weirdn wierdn in vroage gesteld. Vôorbeeldn zyn de fascinoatie vo absint en de werkn van Henri de Toulouse-Lautrec.
De Belle Epoque was wel nie vor iederêen even schône. D’r woarn verschillige sociale klassn en nie iederêen wierd gelykig behandeld.
|
Mêer ofbeeldiengn die ier by passn ku je vien ip Belle Epoque ip Wikimedia Commons. |