Ttqiyun   patis hido seediq we asi ka mtduwa mtaqi, ado ini hari lgelu ka hei ma tghuwe hari tmalang ka toma bahak, kika maha hridan hari kntlexan hei  ma daha ka tnlangan dara duri. Netun mbeyax miiyo cncaman ini qtaqi de, maha tbbulic urac ma ini beyo tmalang ka tnlangan dara daha ka toma bahak, stkemun ka urac dara duri. Netun niqan kesun ini hari osa tnqiyan de,maha mrana mnarux ini beyo tmalang ka tnlangan dara, ado tnlangan dara maha pknarux toma bahak ma thetur dara ma kana kesun mnarux urac ma dara peni.

Tqqiyun patis hido seediq klaali ge mmteru dehuk mmsepac,so maxal patis hido ka mtaqi keeman de pkmalu naq toma bahak, ini hrinas ceka rabi maxal daha patis hido ka mtaqi, so pkdungusi ka ttqiyan de maha malu naq tnqiyun duri, ini naq hari kbserux duri.kika naqah kbsiyaq mtaqi uri, niqan ka spatis na patis mesa knkingan ali hmrinas maxal patis hido mtaqi ka seediq keeman we, so hari maha niqan  kesun hetur dara duri.

Ini hari klai qmita ka kesun mnarux tnlangan dara nii, ani si pkeeyux ma peepux ka tnlangan dara nii, duma naq we maha msaadux ma setuq ka urac tnlangan dara nii.kika kesun spatis daha snpegan Kowmingcenkangsu peni,dehuk hari teru Pasento  ini daha hari klai mesa niqan mnarux mkala tnlangan dara nii ka seediq knlangan(Taiwan) ,dehuk mnarux tunux ma so amah qmita ka doriq, mnarux teerang ma ini hari eyah baro ka hengak  peni,duma naq we niqan kesun pkrana naqah mnarux kii di mosa pqita ising di.

Netun ini osa tnqiyan de, ini klai ka hhuwaun ka mnarux tnlangan dara , anu seediq hndure ado mbqerus meepah, ini hari ptuku ka ndaan, sriso hari mangal mnarux mkala tnlangan dara nii da, asi ka suangao hari mekan Na ka puuqun ta mgrebu ceka naali ma keeman peni, keegu hari ka Kawciya ssama ma hei qhuni, uuqun Kawsansussiyenwe,pgklaan mugi  ma so demux peni,mllamu ssama daha ka hei qhuni, ma tlamun pstarin, laxi ka tmaku daha ka sino, ini hari kseyang ma iya qbqerus meepah duri.

• https://health.udn.com/health/story/5977/7891302?from=udn-search_ch1005
• Tseeru na mptgesa Aking Puhuk (桂素芳) ka pnatis nii.