Pietissem

Questa pagina è scritta en puter.

Pietissem significha ün movimaint infra il cristianissem chi s'ho sviluppo daspö il principi dal 17evel tschientiner e chi exista fin a hozindi. Il pietissem es sto istoricamaing in prüma lingia ün fenomen protestant.

Ün trat caracteristic dal pietissem es l'accentuaziun cha'l cristiaun singul stopcha fer experienzcha cun Gesu Crist e river a la tschertezza da salvamaint tres üna renaschentscha consciainta. Da grand'importanza es la pietusited individuela e quella in cumünaunzas da concristiauns renaschieus in uschedittas ecclesiolas (latin per baselginas respectivmaing raspedinas).

Per part es il pietissem integro illas baselgias uffizielas, per part s'organischa'l dadour, cu impustüt il pietissem radical.

Il motiv dad intuner la magiurennited da l'individuum ed insomma la scuvierta da la persuna i'l sen da persunalited collia il pietissem cun ün movimaint contemporaun dal temp modern tampriv, cul sclerimaint.

• Martin Brecht, Klaus Deppermann, Hartmut Lehmann, Ulrich Gäbler (edituors): Geschichte des Pietismus (= Istorgia dal pietissem) Toms 1–4. Göttingen 1993–2004. (Ouvra fundamentela)

• Pietissem i'l lexicon ecumenic da senchs
• Cumischiun istoric per la perscrutaziun dal pietissem