Vulva
Golèt, Antiflla • Nèssence
|
Cél articllo est ècrit en arpetan supradialèctâl / ORB lârge. | 
|
Vulves a difèrentes femèles (doux-três avouéc pêls râsos), viues dês los pieds.
| Sistèmo | Aparèly gènitâl femenin, vagin de l’homo |
|---|---|
| Vascularisacion | Artère pudendâla de dedens |
| Drènâjo vênox | Vênes pudendâles de dedens |
| Drènâjo limfatico | Ganguelyons enguinâls supèrficièls |
| Inèrvacion | Nèrf pudendâl |
| Embriologia | Plant gènitâl, plês urogènitâls |
| Nom latin | Pŭdendum mŭlĭĕbre |
|---|---|
| Noms vèrnâcllos |
chiéz les femèles : Golèt [ɡɔ.ˈlɛ]en savoyârdAntiflla [ã.ˈti.fla]en vâldotenchiéz les bétyes : Nèssence [nɛ.ˈsɛ̃s], [ne.ˈsɛ̃.si], [nə.ˈsɛ̃.sə]en arpetan |
La vulva [ˈvyl.va][N 1] (que vint du latin VULVA « matrice ») est l’ensemblo des orgânos gènitâls de defôr a la femèla et pués a quârques femèles chiéz los mamifèros nèteyèros et marsupiâls.
Los noms vèrnâcllos por la vulva chiéz les femèles sont lo golèt [ɡɔ.ˈlɛ] en savoyârd ou ben l’antiflla [ã.ˈti.fla] en vâldoten, pendent que celi chiéz les bétyes est tot-adés la nèssence [nɛ.ˈsɛ̃s][N 2] en arpetan.
L’orgâno comprend en passent lo mont du pubis, les grantes potes, les petiôtes potes, lo cllitoris, l’aglland du cllitoris, lo bulbo du vèstibulo, lo vèstibulo vulvèro, lo miat urètrâl, lo golèt vaginâl, les gllandes de Bartolin et les gllandes de Skène. La vulva empâre lo vagin et endirèctament l’utèrus per ses potes vaginâles de dedens et de defôr. Los muscllos du planchiér pèlvien rempâront les estructures de la vulva ; d’ôtros muscllos du triangllo urogènitâl apôrtont étot sotin.
Les artères pudendâles assuront l’apôrt sanguin a la vulva, pendent que les vênes pudendâles de dedens drènont lo sang vênox en defôr de la vulva. Los vèsséls limfaticos transpôrtont la limfa en defôr de la vulva de vers los nuods limfaticos enguinâls. El est inèrvâye per lo nèrf pudendâl, lo nèrf pèriniâl, lo nèrf ilio-enguinâl et lors branches. La borrâ sanguina et los nèrfs de cél orgâno participont a l’èxcitacion sèxuèla, que sèrvét u mècanismo de reproduccion.
Notes et rèferences
[changiér | changiér lo tèxto sôrsa]Notes
[changiér | changiér lo tèxto sôrsa]- Prononçont asse-ben [ˈvyl.və] et [vylv] d’aprés los patouesants.
- Prononçont étot [ne.ˈsɛ̃.si] et [nə.ˈsɛ̃.sə] d’aprés los patouesants.
Vocabulèro
[changiér | changiér lo tèxto sôrsa]Rèferences
[changiér | changiér lo tèxto sôrsa]- (fr) Rogiér Verèt, Dikchonéro Fransé - Savoyâ - Dictionnaire Français - Savoyard [PDF], 10éma èdicion reviua et ôgmentâye, 2023, p. 3971 [→ golè].
- (fr) Èmê Chenâl et Rèmond Vôterin, Nouveau dictionnaire de patois valdôtain, 2nda èdicion reviua et ôgmentâye, Quârt, Musumeci, 1997, pp. 87 [→ antifl a, pl. e] et 1183 [→ nessence].