Careugio

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

Careugio

Stat:	Italia
Region:	Piemont
Provincia:	Provincia ëd Lissandria
Nòm 'n italian:	Carrosio
Coordinà:	Latitudin: 44° 39′ 33.9′′ N Longitudin: 8° 49′ 56.9′′ E Mostra an sla carta
Autëssa:	254 m s.l.m.
Surfassa:	6,92 km²
Abitant:	504 (2017)
Comun dj'anviron:	Arquà, Gavi, Votagio
CAP:	15060
Prefiss tel.:	0143
Còdes ÌSTAT:	006035
Còdes fiscal:	B840
Sant protetor:	santa Cros
Festa dël borgh:	14 dë stèmber

Sit istitussional

Careugio (Carrosio an italian, Careuxo an lìgure) a l'é un comun dël Piemont ëd 504 abitant ^[1], ant la provinsa ëd Lissandria.

As treuva ant l'Apenin Lìgure an riva al torent Lèm, an sla strà dla Bochëtta ch'a colega Génoa a Gavi e a la Val Padan-a.

Stòria

Careugio a l'é stàita sota al podèj temporal dij vësco-cont ëd Torton-a a parte dal sécol ch'a fa X, dij marchèis ëd Gavi antra ij sécoj ch'a fan XI e XII. Le pì vèje sorgiss a documento Careugio dël 1006 e 'l sò borgh dal 1141, quand che ij genoèis a cato un castel ch'a sarà peui demolì a la fin dël sécol. La Repùblica 'd Génoa a conced ël pais an feod ai mèmber ëd soe famije pì vajante, tanme ij Castagna, ij Grimàud, ij Di Negro. An séguit, Careugio a dven Feod Imperial, valadì un teritòri ch'a dependìa diretament da l'Imperi Roman Sacrà ma assegnà a la famija Spìnola e, dal 1585, a la famija Salvago. Dël 1625 le trupe ëd Carl Emanuel I ëd Savoja a s'acampo ant j'anviron për dé bataja e a ven-o derobà da j'abitant dël pais. Dël 1735 Careugio a passa al Regn ëd Sardëgna ëd Carl Emanuel III e a costituiss n'enclave piemontèisa ant ij teritòri dla Repùblica 'd Génoa. Ël feod ëd Careugio a l'é assegnà a le famije Gavòt e Mejorà ma a ven scancelà dël 1798 con l'ariv dij fransèis.

A Careugio a s'archeuj na companìa giacobin-a ciamà l'Armà Patriòtica Piemontèisa, che për vàire mèis a agiss con assion militar contra le trupe dij Savòja. Ël pais a ven peui goernà dal comand fransèis e a passa a la Repùblica Lìgure e peui diretament a l'Imperi Fransèis ëd Napoleon Bon-a-part. Dël 1815 a torna al Regn ëd Sardëgna. Dal 1819 al 1859 a l'é comprèisa ant la Provinsa ëd Neuve, sota la Division ëd Génoa e 'l mandament ëd Gavi. Dal 1859, an séguit a la riorganisassion aministrativa dël Decret Rattazzi (Lèj n.3702, 23 otóber 1859) a passa ansema a tut ël Circondari ëd Neuve a la Provinsa ëd Lissandria e al Piemont.

Aministrassion

Ël sìndich a l'é Valerio Cassano (dal 28/05/2007, scond mandà dal 07/05/2012, ters mandà dal 12/06/2017).

Anliure esterne

Sit istitussional

Arferiment

↑ Sorgiss: ISTAT - Bilansi demogràfich al 01/01/2017 [1].

[1] Sorgiss: ISTAT - Bilansi demogràfich al 01/01/2017 [1].

[1]