Sigalens

Segon Dauzat e Rostaing, lo nom de Sigalens vendrè deu preïndoeuropèu *sik-, «montanha», varianta de *sek-, damb sufixe doble -ala e -incum^[1]. Segon Ernèst Negre, se tractarè de l'occitan segal, «segle», e sufixe -enc; serè donc un segalar, un seglar; Jacques Astor opina tanben per lo sens de segalar, tèrra prauba (son citats per Bénédicte Boyrie-Fénié). Bénédicte Boyrie-Fénié, en l'abséncia de fòrmas ancianas, aima mèi demorar prudenta e causeish pas, sense refusar l'idèia de segalar prepausada per Negre e Astor^[2].

Deu costat de la toponimia prescientifica, donem l'opinion de l'abat O'Reilly : lo nom de la comuna vendrè deu nom latin Situs Alanorum, lo lòc deus alans, pòble scite deu Caucàs. Lo nom inicial serè vengut Sit. Alanus pui Sig.Alens^[3]. Es desprovesida de probabilitat fonetica, çò que sa data de publicacion excusa completament.

• Alhats Vielh (nom supausat) : véser Alhats.
• Glayroux (nom francés), probablament Glairós : benlèu d'un nom latin d'òme Clarius, mès carré trobar lo sufixe; mèilèu deu latin glareosus, « gravelós, plen de grava », per definir la natura deu sòu (lo vilatge es dens lo baish d'un travèrs)
• Montclarits^[4] (Monclaris en francés), escrit Monclarits sus la mapa de Cassini^[5]. Sembla un derivat de Montclar (véser Montclar (Òlt e Garona), dab un sufixe que poiré èster -ic (lo pus probable) o -in (au plurau pr'amor de la pluralitat deus abitants); dens lo segond cas, -ins auré poscut desvolopar un -t- de transicion (-ints), com, benlèu, a Alhats, véser toponimia. La dificultat es que quand i a una fòrma diminutiva, i a normalament un nom shens diminutiu a l'entorn, donc aciu un Montclar. La grafia probable es Montclarics.

• La comuna se creèt en 1851, deu territòri d'Alhats ^[6] e tanben de Granhòs. Èra formada de quate parròpias : Alhats Vielh (nom supausat), Sigalens, Glayroux (en francés), e Montclarits, las duas darrèras seccions vengudas de Granhòs, dab un dobte per Montclarits (informacions contradictòrias) ^[7].

• Avant la refòrma cantonala de 2014, aplicada en 2015, la comuna èra deu canton d'Auròs; es adara deu canton de Le Réolais et Les Bastides (en francés), donc Lo Reulés e las Bastidas.

• Comunas de Gironda

1. ↑ Albert Dauzat, Charles Rostaing, Dictionnaire étymologique des Noms de Lieux en France, reedicion Librairie Guénégaud, 1984, p. 657
2. ↑ Bénédicte Boyrie-Fénié, Dictionnaire toponymique des communes : Gironde, ed. CAIRN, Pau, 2008, p. 349-350
3. ↑ Abat Patrice-John O'Reilly, Essai sur l'histoire de la ville et de l'arrondissement de Bazas, 1840, pagina 478
4. ↑ .
5. ↑ https://www.geoportail.gouv.fr/donnees/carte-de-cassini
6. ↑ http://cassini.ehess.fr/cassini/fr/html/fiche.php?select_resultat=36315
7. ↑ https://web.archive.org/web/20130124070328/http://gael.gironde.fr/pages/Histo_commune.pdf , a Grignols e a Aillas

•   Portau de Gasconha