Fruch

En botanica, un fruch (var. fruit, frut, hrut) es l'estructura portagrana de las plantas de flors que se forma a partir de l'ovari après la florason.

Los fruches son lo mejan per lo qual las plantas de flors (sonadas tanben angiospèrmes) difusan sas granas. Los fruches comestibles especialament se son dempuèi longtemps propagats en fasent servir los movements dels umans e dels animals dins una relacion simbiotica qu'es un mejan per dispersar sas granas per un grop e de nutricion per l'autre ; de fach, los umans e nombroses animals son venguts dependents dels fruches coma font de noiridura. En consequéncia, los fruches representan una fraccion substanciala de la produccion agricòla mondiala, e d'unes (coma la poma e la granada) an aquesit de significacions culturalas e simbolicas estendudas.

Dins lo lengatge corrent, "fruch" designa normalament las estructuras carnudas (o produches) associadas a las granas de plantas que son generalament sucradas o acidas e comestiblas a l'estat brut, talas que las pomas, las bananas, los rasims, los citrons, las iranges e las fragas. Dins l'usatge botanic, lo tèrme «fruch» compren tanben nombrosas estructuras que son pas comunament sonadas «fruchs» dins lo lengatge corrent, talas que las noses, las bajòca de mongetas, los grans de milh, las tomatas e los grans de blat.