Batalha de Lemberg
La batalha de Lemberg es un ensemble de batalhas que se debanèron dau 26 d'aost au 11 de setembre de 1914, au començament de la Premiera Guèrra Mondiala, lòng de la frontiera entre Russia e Àustria-Ongria. Opausèt plusors armadas russas totalizant 1,2 milions d'òmes a plusors armadas austroongresas gropant un milion d'òmes e s'acabèt per una victòria russa.
Lo debanament dei combats es tradicionalament devesit en doas fasas. Dau 26 d'aost au 6 de setembre, leis armadas austroongresas assaièron d'avançar rapidament en direccion de Brèst-Litovsk per blocar lo camin de fèrre entre Kiev e Varsòvia. Pasmens, après plusors succès iniciaus, aquela ataca foguèt rebutada a Gnila Lipa entre lo 29 e lo 30 d'aost. A partir dau 6 de setembre, lei Rus capitèron de rompre lei defensas austrianas engatjadas dins l'ofensiva entraïnant l'afondrament d'una partida de l'armada austroongresa. Per restablir sa posicion, leis Austroongrés deguèron abandonar sa basa de Lemberg e recular de 160 km dins lei Carpats. Perdiguèron ansin 430 000 tuats, bleçats e presoniers còntra solament 225 000 per lei Rus[1][2].