Samtgemeenbörgermeester

De Samtgemeenbörgermeester is na dat Neddersassische Kommunalverfatensgesett (NKomVG) de Börgermeester in en neddersassische Samtgemeen. Dat is blangen den Samtgemeenraad un den Samtgemeenutschuss een von de dree Orgaans von en Samtgemeen (§ 7 Abs. 2 Nr. 3 NKomVG). Anners as de Börgermeester in de Gemenen, de Deel von en Samtgemeen sünd (dor wählt de Gemeenraad na § 105 NKomVG en ehrenamtlichen Börgermeester ut siene Midd), warrt de Samtgemeenbörgermeester direkt von de Börgers wählt un is hauptamtlich aktiv. De Amtstied is in’n Regelfall fiev Johr (§ 80 Abs. 3 NKomVG i.V.m. § 33 Abs. 2, S. 1 NGO). Bet 31. Dezember 2013 weren dat noch acht Johr (§ 80 Abs. 1, S. 2 NKomVG a.F.). Wenn de Samtgemeenbörgermeester keen Loopbahn von’n gehobenen allgemenen Verwaltungsdeenst hatt hett, mut in de Verwaltung en annern Beamten vörhannen ween, de dat hett.

De Samtgemeenbörgermeester is dör sien Amt automaatsch Liddmaat in’n Samtgemeenraad un in’n Samtgemeenutschuss (§ 45 NKomVG). De Rääd von de Gemenen, de in de Samtgemeen tohoopslaten sünd, köönt dat Amt von’n Stadt-/Gemeendirekter von’n Börgermeester von de Gemeen op’n Samtgemeenbörgermeester överdregen (§ 106 NKomVG).

Na § 81 Abs. 2 NKomVG köönt in de Samtgemeen bet to dree ehrenamtliche Viez-Samtgemeenbörgermeesters wählt warrn.

Bevör Neddersassen 1996 de Eengleisigkeit beslaten hett, weer de Samtgemeenbörgermeester noch en Ehrenamt. Dat Leid över de Verwaltung harr vörher de Samtgemeendirekter. De Övergang von de Tweegleisigkeit na de Eengleisigkeit is aver nich direkt ümsett worrn. Dat keem jümmer eerst mit de nächsten Wahlen. Dat hett mehr as teihn Johr duurt, bet de Övergang kumplett weer.