Kristallwater

Kristallwater is Water, wat in Kristallens bunnen is, sünnerlich vun Soltens. Substanzens, de Kristallwater hebbt, warrn faaken ook Hydrat naamt.

T.B. gifft dat Natriumsulfat Na₂SO₄ ahn Water un ook as Dekahydrat. Dat ios denn dat Glaubersolt, wat 10 Watermolekülens pro Soltformel bunnen hett: Na₂SO₄ · 10 H₂O. Twüschen de Formel vun dat Solt un dat Water kümmt een lütten Punkt, de na baben sett is. Kann ook een x sien.

Dat Kristallwater kann de Eegenschapen vun den Kristall anners moken. T.B. de Smeltpunkt, de wat deeper liggen kann. Un af un an ook de Klöör, t.B. bi dat Koppersulfat, wat ahn Water witt is un mit fiev Water denn blau ward.

Woans dat Water bunnen is, is ünnerscheedlich. Dat kann sien, dat een koordinative Binnung dor is as in dat Koppersulfat, över Waterstoffbrüchens oder blots so as bi de Zeolithens.

Tomeist is dat Kristallwater nich fast bunnen un geiht bi Wärme rut (Calcineeren, Brennen). So dröögte Kristallens kriggt geern ehr Water wedder, dorüm warn se för dat Dröven vun Lösemedel un Gasens bruukt.

Wenn de Kristallens Kristallwater opnehmen deiht, denn ward Energie as Hydratationswärme frie.

Een Bispeel is de Gips, wat Calciumsulfat is. Den ward dör Brennen (hitt moken) dat Kristallwater rutdreewen. Denn ward de brennte Gips mahlen un is nu hill dorop, wedder Water to kreegen. Dorbi ännert sick de Struktur vun den Kristallens un de Gips ward hart.

• Dihydrat CaSO₄ · 2H₂O ward op 110°C hitt mookt, denn ward dorut CaSO₄ · 1/2H₂O, de brannte Gips (Hemihydrat).
• Bi 130°C ward dorut Stuckgips.

Een anner Bispeel is dat Kobaltchlorid, wat to Kieselgel tosett ward. Denn is dat Blaugel. Dat Kobaltchlorid is blau, wenn dat keen Kristallwater hett. Kümmt Water dorto, denn ward dat rosa. Un denn mutt dat Blaugel, wat to'n Dröögen nahmen ward, sülvens dröögt warn.