Knud Johannes Vogelius Steenstrup
Knud Johannes Vogelius Steenstrup (* 7. September 1842 in Høstemark Mølle im Aalborg Amt; † 6. Mai 1913 in Frederiksberg) weer en däänsch Geoloog un Gröönlandforscher.
Steenstrup weer de Neffe vun den Zoologen Japetus Steenstrup. He hett 1863 en Afsluss in Pharmazie maakt un weer af 1866 Assistent an dat Geologisch Museum in Kopenhagen. Dor bleev he bit 1889, as he däänsch Staatsgeoloog in de Landsupnahm wurr.
He hett all tosommen negen Reisen nah Gröönland (ünner annern mit Harald Moltke un Morten Pedersen Porsild) ünnernommen, de bit to tweeeenhalf Johre düer deen. Dor sammel he ünner annern Plantenfossilien ut den Miozän vun Nordwestgröönland, de vun Oswald Heer (Flora fossilis arctica) bearbeit wurrn. He wies, dat Iesenblockvörkommen, de Adolf Erik Nordenskiöld up de Diskoinsel funn un för Meteoriten hull, in Wohrheit in’ Basalt entstunnen. En Grootdeel vun sien gröönlännsch Sammlung gung bi en Brand in Slott Christiansborg 1884 verloren.
He hett ok de Morphologie vun Dünen in Däänmark ünnersöcht.
Steenstrup weer Ehrenliddmaat vun de Mineralogical Society of Great Britain and Ireland. 1906 wurr he Ehrendokter vun de Universität Kopenhagen un 1902 Liddmaat vun de Königlich Däänsch Akademie vun de Wetenschapen. Af 1896 weer he Liddmaat vun de wetenschaplich Kommission för Gröönland.