Kaija Parve

Kaija Helinurm, bit 1990 Kaija Parve, (russisch Кайя Ахтовна Парве; * 14. Juni 1964 in Tallinn) is en ehmalige Biathletin ut de fröhere eestnisch Sowjetrepubliek, de hüüdigen Republiek Eestland. To hör aktiv Tiet is se för de Sowjetunion antreeden, hüüd is se eestnisch Staatsbörgerin. Mit söben Weltmeestertiteln is se en vun de spoodriekst Biathletinnen överhoopt.

Parve fung 1971 mit den nordischen Skisport an un wessel denn to'n Biathlon, as de eersten Biathlon-Weltmeesterschapen för Fruen 1984 plaant wurrn. Hör Trainer weern Helgi Kivi, Aita Pääsuke un Tõnu Pääsuke. Se hörr mit to de eersten in disse Sportaart spoodriek Athletinnen. 1984 kemm se in' Sprint up Platz 7 un wurr Veerte in' 10-km-Wettbewarv. In de Staffel wunn se mit Wenera Tschernyschowa un Ludmilla Sabolotnjana ehr eersten Titel bi Weltmeesterschapen, dornah hett se bit 1988 fiev Mal in de Reeg Gold mit de sowjeetsch Staffel bi Weltmeesterschapen haalt. Ok in de Eenzeldisziplinen weer Parve spoodriek: 1985 wurr se Weltmeesterin in' Eenzel vör Sanna Grønlid un Eva Korpela as ok 1986 in' Sprint vör Nadija Bjelowa un Eva Korpela. Doröverherut reck se 1985 in' Sprint un 1987 in' Eenzel noch twee Sülvermedaillen.^[1][2]

Hör best Saison in' Weltcup harr Parve 1984/85 as Darte in de Gesamtwertung. Se weer dormit de eerst un bit to de Saison 1988/89 de eenzige sowjeetsch Athletin, de en Platzeeren ünner de dree best Athletinnen in den Gesamtweltcup recken dee. Parve wurr 1985 un 1986 jewiels to de eestnisch Sportlerin vun dat Johr wählt.

1982 hatte se all an de Pädagogisch Universität Tallinn en Utbillen to en Sportlehrerin anfungen un disse later ok afslooten. De eerst vun hör dree Döchter keem 1989 to Welt. 1990 hett se de eestnischen Lichtathleten Marek Helinurm heiraadt un nehm de Naam vun hör Mann an. Nah dat Enn' vun hör sportlich Loopbahn nehm se en Anstellung bi de eestnisch Arbeitslosenversekerung an. Hör Dochter Ulla-Maarit Helinurm is ebenfalls Biathletin.^[3]

1. ↑ Т.И. Раменская (2005): История биатлона (Geschichte des Biathlon) (russisch). ФИЗКУЛЬТУРА И СПОРТ, Moskau. Afropen an’n 16. Dezember 2008.
2. ↑ История биатлона (Geschichte des Biathlon). Afropen an’n 16. Dezember 2008.
3. ↑ Märt Roosna (14. Januar 2012): Kaija Parve-Helinurm: tütar on minust andekam ja ambitsioonikam. Afropen an’n 14. Dezember 2014.