Hermann Mayer Salomon Goldschmidt

Hermann Mayer Salomon Goldschmidt (* 17. Juni 1802 in Frankfort an’n Main; † 10. September 1866 in Fontainebleau) weer en düütsch-französchen Astronom un Kunstmaler.

Goldschmidt weer de Söhn vun en jöödschen Koopmann in Frankfort. He hett eerst in’t Ünnernehmen vun sien Vadder mitarbeit, wenn sik denn aver de Maleree to, de he in Paris studeer. Dor hett he denn ok as Maler arbeit.

1847 füng he denn aver mit de Astronomie an un hett vun de Finster in sien Masardenwahnung ut twüschen 1852 un 1861 veerteihn Asteroiden opdeckt. To de dormoligen Tiet löös he dormit John Russel Hind af, as de, de de meisten Asteroiden opdeckt harr. De intressanteste dorvun is togliek ok de lüttste dorvun: (44) Nysa, den he 1857 funnen harr. De Asteroid is för sien Grött vun ~70 km bannig hell un wiest en licht gele Klöör, de dat Mineral Enstatit toschreven warrt. Dör sien Form as en Schiev wiest (44) Nysa en snaaksche Lichtkurv wiel sien Rotatschoon vun ruchweg sössenhalf Stünnen. Dat weer bit dorhen eerst an een annern Lüütplaneten faststellt worrn.

In’n April 1861 hett Goldschmidt dat Opdecken vun en negenten Maand vun’n Saturn künnig maakt, den he twüschen de Bahnen vun Titan un Hyperion funnen harr un Chiron nöömt hett. Man sien Opdecken künn vun keen annern Astronom bestätigt warrn. De Naam is laterhen denn för den snaakschen Asteroiden (2060) Chiron övernahmen worrn. En negenten Maand hett offiziell 1898 William Henry Pickering mit Hülp vun Fotografie maakt. Dat weer de Maand Phoebe, wat Saturn sien butensten Maand is, de 2004 vun de Ruumsond Cassini-Huygens fotografeert weer.

För sien Arbeit un Leistung is Hermann Goldschmidt 1861 mit de Goldmedaille vun de Royal Astronomical Society uttekent worrn. Bito is na em de Asteroid (1614) Goldschmidt nöömt, as ok de Maandkrater Goldschmidt. In’t Johr 1868 is wegen den hunnersten Asteroiden in Pariser Gedenkmünt rutgeven worrn, op de Goldschmidt blangen dree annere Mehrfackopdeckers to sehn weer.

• Karl Christian Bruhns: Goldschmidt, Hermann. In: Allgemeine Deutsche Biographie (ADB). Band 9, Duncker & Humblot, Leipzig 1879, S. 338 f.
• Willy Jahn: Goldschmidt, Hermann Mayer Salomon. In: Neue Deutsche Biographie (NDB). Band 6, Duncker & Humblot, Berlin 1964, ISBN 3-428-00187-7, S. 610 f.

• Publikatschonen vun H. Goldschmidt in’t Astrophysics Data System
• N.N.: Hermann Goldschmidt. Astronomical register, vol. 4 (1866), p. 256. (Naroop, engelsch)