Metis (Maand)

Metis is de binnenste Maand vun den Planeten Jupiter, sowiet bekannt. De Maand weer 1979 vun den Astronom Stephen P. Synnott opdeckt worrn op Biller, welke de Ruumsond Voyager 1 maakt harr. Toeerst kreeg he de Beteken 1979 J 3. Na de Titanin Metis ut de greekschen Mythologie is de Maand 1983 nöömt worrn.

Ümloopbahn

Metis löpt nöög an den Jupiter noch binnen vun dat Ringsystem. Dormit warrt Metis to de Amalthea-Grupp rekend. Wohrschienlich is Metis ok en Born för de Partikels, de den Ring bildt. De Maand löpt noch binnen vun den geostatschoonären Bahnradius üm den Jupiter un is dorbi de starken Tiedenkräft vun den groten Planeten utsett. Wiel de Maand lütt noog is, warrt he vun disse Kräft nich tweireten, aver sien Ümloopbahn warrt jümmers wieter afsaken, bit he jichtenswann op den Jupiter stört. Vundaag hett he en middleren Afstand vun’n Planeten vun ungefäähr 127.969 km un bruukt vör een Ümloop 7 Stünnen 4 Minuuten un 48 Sekunnen.

De Maand liggt binnen vun de Roche-Grenz för fletig Maanden. D. h., en Saak op de Bavenflach vun Metis warrt vun de Gravitatschoon vun den Jupiter wegtogen. De Fluchtsnelligkeit vun 24,3 m/s gellt deswegen blots piel to’n Jupiter.

De Ümloopbahn hett en Exzentrizität vun 0,0012 un is dormit meist kreisrund. Gegen den Äquater vun’n Jupiter is se üm 0,8° kippt.

Opbo un Egenschoppen

De Bavenflach vun Metis hett en Albedo vun 0,05 un is dormit bannig düster. De Dörmeter vun den Maand is ungefäähr 43 km. Vun wegen de Dicht, de bi 2,8 g/cm³ liggt, warrt vermodt, dat Metis to’n Halfpart ut Wateries un to’n annern Halfpart ut Silikat-Steen tohopensett is.

Maanden vun den Planeten Jupiter

Ahn Naam: S/2003 J 2 | S/2003 J 4 | S/2003 J 9 | S/2003 J 10 | S/2003 J 12 | S/2003 J 16 | S/2003 J 18 | S/2003 J 19 | S/2003 J 23 | S/2010 J 1 | S/2010 J 2 | S/2011 J 1 | S/2011 J 2 | S/2016 J 1 | S/2017 J 1 | S/2017 J 2 | S/2017 J 3 | S/2017 J 5 | S/2017 J 6 | S/2017 J 7 | S/2017 J 8 | S/2017 J 9

Kiek ok na bi: List von de Jupiter-Maanden