Schoolsystem vun Uganda

De eersten Scholen geev dat üm 1890 in Uganda. De Missionare vun anglikaansche un kathoolsche Kark hebbt jem grünnt. 1924 geev dat de eerste högere School, dat Makerere-Kolleg, dat 1963 Deel vun de Universität Oostafrika woorn is un siet 1970 as Makerere-Universität ene egenstännige Universität billt.

1950 geev dat 53 högere Scholen in Uganda. Blots dree hören den Staat to, dree weren privat, de Rest weer vun de Karken.

Noch bet 1974 hebbt de Scholen tomehrst engelsche Schoolmaterialien un Lehrplään bruukt. 1975 hebbt se egene Lehrplään opstellt. Doch in de Tiet vun Idi Amin un de twete Tiet ünner Milton Obote güng dat bargdal mit de Qualität vun de Utbillung an de Scholen in Uganda.

1989 güngen 18 Perzent vun den Staatshuusholt vun Uganda in de Bildung.

De Natschonale Raat för Högere Utbillung is 2003 insett worrn un hett de Opgaav, Översicht över de Hoochscholen in Uganda to öven.

Dat Schooljohr is indeelt in dree Delen. De eerste geiht vun Februar bet April, de twete vun Mai bet August un de drüdde vun September bet Dezember. Dortwischen sünd jümmer dree Weken Ferien, na’n drüdden Deel duurt de Ferien sogor meist söss Weken.

Schooluniformen sünd in Uganda wiet verbreedt. Se hebbt faken ok en Teken vun de School dor op. Dat Utsehn vun de Uniform bestimmt dorbi jede School sülvst.

De Vörschool in Uganda warrt nich vun den Staat kuntrolleert, de Vörscholen sünd privat organiseert. Üm un bi teihn Perzent vun de Kinner besöcht Vörscholen.

Na de Volksschool gaht de Kinner, wenn se söss Johr oolt sünd. De Volksschool duurt söven Johr lang. Na de söövte Klass maakt de Kinner ehr Grund-Afslussexaam. Wenn de good utfallt, köönt se op de högere School gahn.

Siet 2006 warrt in de eersten dree Johren de Ünnerricht in de inheemschen Spraken afholen. Vun Anfang an warrt aver Engelsch lehrt, dat vun de veerte Klass an de Ünnerrichtsspraak is.

1989 güngen üm un bi 2,5 Millionen Kinners na de Volksschool (Klassen 1-7, 6-12 Johr oolt). 1980 weren dat noch 1,3 Millionen wesen. Todem güngen 80.000 op private Scholen. So bedrievt to’n Bispeel de Orthodoxe Kark 35 Scholen mit 10.000 Schölers.

Alltohoop weren dat 1989 en beten mehr as 50 Perzent vun all Kinners twischen söss un twölf Johren, de na School güngen. Blots 61 Perzent sünd de vullen söven Johren na School wesen, 25 Perzent hebbt dat op en högere School schafft.

De högere School duurt op den O-Level veer Johr lang, de Kinner sünd denn 13-16 Johr oolt. An de O-Level slutt sik de A-Level an, de noch wedder twee Johr duurt (de Schölers sünd denn 17-18 Johr oolt).

265.000 Schölers güngen op högere Scholen, 216.000 dorvun op den O-Level, 22.000 op den A-Level. 22.000 güngen na Lehrerseminars (veer Johr lang) un Technische Instituten (dree Johr lang), 4.400 op högere Lehrerseminars (+ 2 Johr) un Technische Instituten. De Afsluss op den O-Level is nödig, dat de Schölers na Universitäten oder Lehrerseminars gahn köönt.

De bekanntste högere School is dat Königliche Kolleg Budo in de Neegd vun Kampala.

Uganda hett veer apentliche un veerteihn private Universitäten. Todem gifft dat üm un bi 50 Institutschonen mehr, de högere Bildung anbeden doot.

Anerkannte Institutschonen (Tallen vun 2003/2004):

• 4 apentliche Universitäten
• 12 private Universitäten
• 10 natschonale Lehrerseminare
• 5 technische Hoochscholen
• 5 Handelshoochscholen
• 5 Institute för Bueree un Tucht
• 1 forstweertschopliche Hoochschool
• 2 genossenschaftliche Hoochscholen
• 1 Institut för Hotelwesen un Tourismus
• 4 medizinsche Institute
• 2 Beroopsinstitute
• 2 meteoroloogsche/geoloogsche Institute
• 3 Managementinstitute

Denn gifft dat noch negen Universitäten un twölv annere Institute, de noch kene Lizenz vun den Natschonalen Raat för Högere Utbillung hebbt.

1. ↑ http://lcweb2.loc.gov/frd/cs/uganda/ug_appen.html#table3

• Websteed vun dat Ministerium för Utbillung un Sport (engelsch)