Keuievangers

Keuievangers of O-benen (oek wel: ronde benen eneumd, mediese term: genua vara) wil zegen dat der n verdreiing in de benen zit. Bie de knieën zit n knik zodat t scheenbeen naor binnen toe steet in plaotse van wat naor buten toe. Vanwegen de vorm wörden t keuievangers eneumd (je kunnen der tussen de benen zogenaamd keuien mee vangen, deurdat ze blieven steken). Keuievangers bin t tegenover-estelde van X-benen, waor de onderbenen te vere naor buten staon.

Bie de geboorte hebben alle kienders zo'n bietjen keuievangers. t Scheenbeen en t diebeen hebben n butenweerts ebeugen vorm en de vootzolen bin naor mekaar toe-ericht. In t eerste levensjaor veraandert dat zeutjes an: t scheen- en diebeen wörden rechter, en de vootzolen dreien ummeneer. Tegen de tied dat de kienders beginnen te lopen bin de benen zo egreuid dat ze t lichaamsgewicht kunnen dragen.

Mediese problemen an t skelet, zo as de Engelse ziekte of tumoren kunnen de greui van t skelet beïnvleujen, wat kan leien tot keuievangers.