Teknik listrik

Teknik listrik atau teknik elektro (bahaso Inggrih: electrical engineering) adolah salah satu bidang ilmu teknik manganai aplikasi listrik untuak mamanuhi kabutuhan masyarakaik.^[1] Teknik listrik malibaikan konsep, parancangan, pangambangan, jo produksi parangkek listrik dan elektronik nan dibutuahkan dek masyarakaik. Insinyur listrik adolah kaum profesional nan mamegang paranan pantiang dalam mangambangkan dan mamajuakan teknologi tinggi dalam dunia komputer, laser, panjalajahan angkasao, telekomunikasi, energi, dan aplikasi lainnyo dari parangkek dan sistem elektronik. Teknik listrik bakarajo samo jo insinyur dari area lain mode teknik kimia, teknik mesin, dan teknik sipil untuak marancang, mangambangkan, dan mambantu produksi babagai macam produk dan jaso mode sistem distribusi energi, komputer pribadi, sistem satelit, radio ganggam, sistem radar, mobil listrik, jantuang buatan, dan lain-lain nan malibaikan komponen listrik dan elektronik.

Ado duo kagunoan utamo dari kalistrikan, iyolah sabagai sarana untuak mangirimkan dayo listrik dari satu tampek ka tampek lain dan sabagai sarana untuak mangiriman informasi.^[1] Sacaro tradisional, bidang teknik listrik dapek dibagi ka dalam tujuah area spesialisasi barikuik ko:

Teknik tanago listrik mamiliki sijarah nan panjang, dimulai pado taun 1879 saat Thomas Alva Edison bahasil manciptokan lampu pijar nan dapek digunoan sacaro praktis.^[1] Dalam wakatu babarapo taun Edison mambangun sistem distribusi tanago listrik aruih saarah di saputaran kota New York nan dapek manyuplai sakitar 400 lampu. Pado akhir taun 1880an distribusi aruih listrik manggunoan aruih bolak-balik mulai bakambang dan digunoan hinggo saat iko.^[2]

Teknik tanago listrik adolah satu-satunyo bidang nan sacara khusus bakaitan jo pambangkitan dan transmisi dayo listrik dari satu tampek ka tampek lain.^[1] Iko adolah spesialisasi tatuo dari teknik tanago listrik.

Teknik elektromagnetik manjambatani aplikasi listrik sabagai pamindahan energi dan transfer informasi.^[1] Teknik elektromagnetik bakaitan jo interaksi antaro medan magnet dan medan listrik, sarato aruih listrik. Gamba di sampiang malukihkan spektrum galombang elektromagnet nan bakisar dari galombang frekuensi randah hinggo sinar gama. Dangan adonyo teknik iko dimungkiankanlah telekomunikasi radio, televisi, komunikasi satelit, radar, dan sadonyo bantuak komunikasi nirkabel lainnyo.

Teknik telekomunikasi bafokus pado rekayasa jo ilmu nan dibutuahkan untuak mangirimkan informasi dari suatu tampek ka tampek lain.^[1] Sistem telekomunikasi dapek mamanfaatkan galombang elektromagnetik, babagai macam kabel listrik, atau serat optik untuak pangiriman informasi. Salah satu hal pantiang nan dijawek jo teknik telekomunikasi adolah bagaimano caro mangodekan informasi ka dalam sinyal listrik. Pakembangan teknik telekomunikasi alah membuek banyak sistem mutakhir untuak mangodekan informasi untuak dikirman dan untuak manyarikan informasi dari sinyal.

Teknik komputer adolah salah satu spesialisasi nan bakambang paliang capek dalam dunia teknik listrik.^[1] Teknik komputer maliputi parancangan sistem parangkek kareh dan program komputer. Sistem komputer bakisar dari komputer gadang atau disabuik jo mainframe nan digunokan dalam dunia pabankan, rekayasa, dan sains hinggo komputer pribadi nan digunokan sacaro paorangan hinggo balakangan juo digunokan sacaro komersial.

Teknik elektronika adolah teknik nan bahubuangan jo babagai material dalam babagai konfigurasi atau struktur nan dapek mangatua aliran aruih listrik.^[1] Dalam teknik elektronika dikana dan digunokan babagai komponen mode diode, transistor, dan sirkuit tapadu untuak mambangun parangkek kareh. Hasil dari teknik elektronika digunokan sacaro langsuang jo bidang lain mode teknik komputer dan teknik telekomunikasi jo sirkuik taintegrasi sabagai salah satu kamajuan tagadang nan paliang dimanfaikan.

Rakayaso sistem mamanfaaikan prinsip-prinsip matematika untuak mamodelkan dan manjalehkan sistem kompleks dan mampradiksi kahandalannyo badasarkan analisis teknik.^[1] Badasarkan deskripsi matematis dari sabuah pamasalahan, saurang insinyur dapek maramalkan hal "bagaimano jiko..." pado kondisi nan ado dan mambuek solusi nan optimal .

Sistem kandali (control system) bakaitan jo sistem elektronik nan dirancang untuak maagiah pangaturan capek jo tapek tahadok suatu parintah.^[1] Teknik sistem kandali sangaik banyak dipalajari dalam teknik listrik. Sistem kandali indak tabateh pado sistem elektrikal melainkan hinggo pangandalian sistem kimia, sistem hidrolis, dan sistem mekanik lainnyo.