Paleolitikum

Zaman Batu Tuo atau Paleolitikum (Yunani: παλαιός (palaios) — purba dan λίθος (lithos) — batu) adolah zaman nan punyo ciri khas barupo pakambangan alaik-alaik batu. Zaman iko mancakuik sakitar 95% maso prasijarah teknologi manusia.^[1] Zaman iko bamulo dari panggunoan alaik batu partamo dek hominin sakitar 3,3 juta taun nan lalu hinggo akhia Pleistosen sakitar 11.650 taun nan lalu.^[2] Zaman Paleolitikum digantikan dek zaman Mesolitikum, dek tu maso transisinyo babedo-bedo di satiok wilayah.

Jiko divisualisasikan kondisi manusia paliang awal. Inyo sadonyo jantan-tino batalanjang, indak ado api, indak ado rumah, tanpa paralatan dan sanjato, bahkan alun mangarotia bahaso, dan indak ado apo-apo kacuali tangan dan utak inyo untuak mancari makan dan malindungi diri dari binatang di sakitar inyo. Indak ado manusia liar nan hiduik bagitu randah ajak manusia paliang awal iko, pasangan Manusia paliang awal iko mamulai sagalonyo tanpa kabudayaan. Inyo haruih mamparolehnyo malalui usaho-usaho tanpa bantuan, nan inyo lakukan surang.^[3]

Alaik dan sanjato partamo manusia iyolah sagalo sasuatu nan ado di tangan inyo, Sabuah rantiang gadang pohon dapek manjadi tombak; tungkek kayu nan godang dapek manjadi alaik panokok; samantaro babatuan nan didapek sacaro sambarangan dapek manjadi piluru katiko dilantiangan atau digunoan sabagai alaik pukul untuak mamacah kacang dan manghancuakan tulang-tulang gadang. Akhianyo, manusia manamukan ide bahwa alaik nan dibantuak dapek digunoan dangan labiah baiak daripado alaik indak babantuak, dan kudian manusia mulai manyumbing dari batu api manjadi kapak batu, pisau batu, mato tombak, alaik bor, dan lain-lain, Obyek-obyek samacam iko banamo paleolith (batu tuo), dan pariode katiko obyek-obyek iko dibuek karanonyo dikana sabagai paleolitikum atau Jaman Batu Tuo. Jaman Batu Tuo iko tampaknyo mulai di tahapan interglacial katigo dan mungkin balangsuang labiah dari saratuih ribu taun.^[3]

Indak dibutuhkan katarampilan khusus untuak manyumbing batu api di sapanjang ciek Sisi atau duo Sisi batu, hinggo batu tasabuik babantuak simeteris. Tapi latihan manjadikannyo samporono, dan Jaman paleolitikum sabagian gadang manunjuakán kamajuan pantiang dalam pambuatan obyek-obyek, indak hanyo alaik batu, tapi juo paralatan dari tulang, gadiang mamoth, dan tanduak ruso kutub. Baragam jinih paralatan babedo, diadaptasi untuak panggunoan khususnyo, dibuek sacaro bertahap. Labiah lanjuik tantang paralatan nan alah disabuik, awak dapek manamukan alaik penusuk, baji, gargaji, alaik bor, alaik paek, tombak baduri, dan bahkan paralatan nan bagitu rapi ajak palontar tombak tulang dan kayu digunoan juo sabagai gagang sanjato dan paralatan sahinggo sanjato dan paralatan dapek digunoan dangan labiah efektif. Manusia paleolitikum baraja mambuek api. Tapi bagaimana caronyo, awak indak ube. Mungkin inyo manggesekkan sapotong kayu jo batu api dan kudian manimbulkan parcikan api nan jatuah ka tumpukan daun atau lumuik kariang, Babarapo manusia liar masih malakukan hal iko, dek tu labiah sariang inyo mambuek api dangan caro manggosokkan duo potong kayu basamo-samo. Panamuan api mambuek manusia dapek mamasak makanan, daripado mamakannyo mantah-mantah, Inyo manggunoan juo api untuak mangasapi dagiang ikan hinggo dapek disimpan untuak wakatu nan lamo. Api digunoan juo untuak malindungi diri di malam hari dari binatang-binatang bueh dan untuak mambuek rumah guo inyo manjadi nyaman. Labiah lanjuik, panggunoan api mamungkinkan manusia mambaka tanah liek manjadi gerabah dan malelehkan logam, tapi langkah-langkah gadang iko indak balangsuang di jaman paleolitikum.^[3]

Manusia Jaman Batu Tuo indak diragukan lai malewatkan sabagian bosegh wakatu inyo di ruang tabuko, jo mangikuti hewan-hewan buruan dari ciek tampek ka tampek Iainnyo, dan katiko malam tibo, inyo bakemah di bawah bintang-bintang. Inyo mambuek juo gubuk. Babarapo gamba inyo manunjuakkan struktur kasar gubuak inyo jo sabuah tonggak tunggal di bagian tangah dan kadang-kadang dangan babarapo tiang panyanggo di sisi lainnyo. Pado umumnyo inyo batampek tingga di bawah tepian babatuan dan di guo, ajak nan dilakuan manusia liar kini. Guo-guo kapua, nan salalu sangek dalam dan lapang, jumlahnyo sangek banyak di Eropa barat. Guo-guo tasabuik tampaknyo alah dihuni salamo babarapo generasi salamo barabad-abad. Kumpulan bosegh abu dan arang, paralatan batu, tulang binatang, dan kadang-kadang tulang manusia manutupi lantai guo nan cukuik dalam. Obyek-obyek iko salalu ditamui taparangkok dalam stalaktit nan dibantuak dek aia manganduang kapua nan jatuah dari atap guo. Apo nan dulunyo manjadi rumah manusia guo kini manjadi sabuah museum, nan sadang manunggu panyalidikan dek para ahli untuak mangungkap carito maso lalu.^[3]

Manusia Paleolitikum pado awalnyo pasti hiduik bagantuang pado suplai alam ajak buah beri liar, kacang-kacangan, umbi-umbian, daun-daunan, madu, telur unggeh liar, kerang, dan tempayak, dan juo bagantuang pado binatang-binatang ketek nan inyo dapek bunuah jo lemparan batu dan tungkek kayu. Katiko paralatan inyo bakambang dan katarampilan inyo maningkek, inyo manjadi pamburu ikan, panjerat hewan dan pamburu hewan-hewan gadang. Inyo mambunuah dan mamakan mamoth babulu, kuda nil, bison Eropa, ruso kutub, dan tarutamo kudo stepa, nan saat tu bakambang dalam kumpulan-kumpulan bosegh di saluruah Eropa barat. Ado sabuah Situs Paleolithik di Parancih nan diparkiroan manganduang tulang-tulang saratuih ribu kudo. Kulik dari binatang buruan dijadian alaik palinduang dan pakaian, ajak nan awak katahui dari panomuan alaik pangerik kulik nan tabuek dari batu api dan jarum dari tulang.^[3]

Babarapo panghuni guo iko iyolah seniman barbakat. Inyo manghiasi paralatan batu dan tulang jo ukiran, figur-figur nan tabuek dari tanah liek, patuang-patuang nan tabuek dari batu dan gadiang, dan manutuik dinding guo tampek tingga inyo jo babagai lukisan bawarno sirah, kuniang, coklat, dan warno-warno cerah Iainnyo. Subyek lukisan tu pado umumnyo iyolah binatang, dek tu babarapo representasi bantuak manusia alah juo ditamukan, Lukisan-lukisan paleolitikum tabaiak sungguah mangagumkan, malampaui usaho-usaho manusia liar modern. Manusia nan mambuek lukisan iko jaleh pangamat dakek kahidupan binatang, Para panghuni guo ruponyo alah punyo bantuak kasar agarna, Mayat-mayat nan dikubua di dalam guo kadang-kadang dikalilingi jo parsambahan barupo makanan, paralatan, dan ornamen-ornamen, nan pastinyo ditujuakan untuak si mayik supayo dapek digunoan di alam lain satalah kamatiannyo.^[3]

Ado aspek-aspek lain kabudayaan paleolitikum tantangnyo hanyo saketek atau indak ado nan dapek dipalajari dangan pasti. Awak hanyo dapek mandugo, dari apo nan dikatahui tantang urang liar katiko kini, bahwa di periode nan sangek lampau iko urang-urang mulai bakarajo samo dalam baburu dan mambelo diri malawan binatang dan manusia lain nan jadi musuhnyo, Satiok kelompok anggotanyo saketek babarapo ratuih individu nan paliang gadang basobok populasi masih sangek jarang. Pamarentahan indak diraguan lai alah ado, tapi apakah dipimpin dek para tatuo atau dek para sesepuh komunitas ketek awak indak ube. Mungkin bantuak kaluargo alah ado juo, laki-laki dan padusi mulai hiduik basamo labiah kurang sacaro parmanen di bawah babarapo bantuak parkawinan, Kahidupan sosial manusia sangek kuno, demikian juo agamo, seni dan kebudayaan materialnyo.^[3]