Cumulus mediocris

Quest articol chì l'è scrivuu in lombard, grafia milanesa.

El cumulus mediocris a l’è ona specie de nivola che la partén al genér di cumul. A l’è l’evoluzion di cumulus humilis, e ‘l gh’hà l’istèssa génesi e l’istèssa struttura.

Compagn che in tutt i cùmul, la soa origin l’è in del sollevàss de l’aria calda e ùmeda; quèll procèss chì el gh’ha de vèss assèe fòrt e che ‘l dura per fà cress on cumulus humilis a fàll diventà mediocris. Di conseguenza el spessor de quèsta specie chì l’è maggior, e ‘l varia de pòch centèn de meter fin a du chilometri circa. ^[1]. Denter ind on cumulus mediocris i corrent che vànn su pòden andà pussée a la svèlta de 5 m/s.^[2]. La base a l’è spiattarada e misa a on’altèzza eguàl de quèlla de alter cumul che pòden vèssegh là visìn. La parte de sora di mediòcris a l’è fada su de gottin de acqua sora-fundùd^[1].

A l’è ona nivola tipica de la matina inoltrada e del princippi de podisnà, e lee la generà nò di precipitazion. In condizion de instabilità atmosferega moderada o fòrt la pò trasformàss in di Cumulus congestus o di cumulonemb, anca a la svèlta^[2].

1. ↑ ^{1,0 1,1} Gabriele Formentini (2009). Temporali e e Tornado (in italian). Alpha Test, 22. ISBN 978-88-483-0992-9. 
2. ↑ ^{2,0 2,1} World Meteorological Organization (a cura di), International Cloud Atlas (in en), Ginevra, Secretariat of the World Meteorological Organization, 1975, Vol. 1. 92-63-10407-7 URL consultad: 13 ottobre 2014.

• World Meteorological Organization (a cura di), International Cloud Atlas (in en), Ginevra, Secretariat of the World Meteorological Organization, 1975, Vol. 1. 92-63-10407-7 URL consultad: 13 ottobre 2014.

• Nivola