Lombardia

Per savenn pussee, varda l'articol Lombardia storega.

La Lombardia l'è abitada di temp de la preistoria di popolazzion native, che inn stad pœu sostituid di etrusch prima e di celt pœu. A gh'inn rivad i roman poch prima del nass del Cristo e ghe resten fina al 400/500 dopo de Cristo: intratant Milan a l'è 'n important center de l'Imperi, tant che l'è capital de l'Imperi Roman de Ocident e lilinscì l'è firmad l'Edit de Milan che 'l tolera la religion cristiana.

Borlada Roma ghe riven i Lombard antigh, che hann dad el nom a la Region, e la zona la finiss sota el control del Sacher Roman Imperi del Carlo Magn: in del menter i Lombard germanegh se mes'cen ai popolazzion latine che gh'eren prima: i locai i tachen a descor 'na lengua romanza, un volgar che l'è vun di prim sbozz de la lengua lombarda.

Intorna a l'ann 1000 i Lombard se organizzen in forma comunal, donca ogni gran cità l'era pu o manch autonoma e sotaponuda a l'Imperi: quella situazzion de autonomia chì la va minga ben al Federigh Barbarossa che 'l mœuv guera ai comun che se lien in la Liga Lombarda e riven a bater l'Imperi e a garantìss l'auto-governa in la pas de Costanza.

'Sta Liga chì la resta in pee fina al 1250, quand che in la pupart di comun tachen a desvilupàss i signorie, idest di governa in forma de nobiltà ligad a di famei important. La pussee importanta l'è quella di Vescont, che la deventa pœu fameja ducala cont la fondazzion del Ducad de Milan, e debass el Gian Galeazz Vescont la riva a dominà la pupart de la Lombardia d'incœu e squas tuta la Lombardia storega.

I sò ered inn manch fortunad e perden part del domini, fina a rivà domà a l'Insubria, cont el perder de la Lombardia orientala vers la Republega de Venezzia e di alter zone vers di olter governi.

In del 1453 la riva al trono la fameja di Sforza, che la da gran splendor coltural al Ducad, ma che intorna al 1500 la forniss e la passa al Regn de Franza, per circa 30 agn, e pœu ai Asborgh de Spagna, in d'on period regordad per el malgoverno, e intorna al 1700 a quei d'Austria, che se demostren pussee bon e cont la Maria Teresa d'Austria se renden protagonista di reforme important compagn del cadaster teresian e di prim razzionalizazzion di comun.

In del 1797 la Lombardia la passa sota el regn del Napoleon e i color de la Milizzia urbana meneghina saran a la bas del tricolor catad fœura del leader frances 'me bandera d'Italia. I Lombard, in principi ben orientad vers el nœuv governo, se mostren despess indiferent despœu o adiritura contrari, 'me se pò lensger in di poesie del Carlo Porta dedicade al Giuseppe Prina, pœu brutalment mazzad di milanes in del 1814, o in Paracar che scappee de Lombardia.

Con la Restaverazzion i austriegh tornen in possess de la Lombardia orientala e anca del Veneto e fonden el Regn Lombard-Veneto. In del 1848 i milanes se ribelen a l'Austria, ma infina Radetzky l'è bon de tornà a governà del Castel Sforzesch.

Questa sezzion chì l'è ancamò voeuda. Juta a scrivela

In del 1970 a l'è istituida ofizzialment la Region Lombardia 'me Region a Statut ordinari de la Republega Italiana.

Dal 2015 a l'è dervid on percors per domandàgh al Stat pussee autonomia 'me de articol 116 de la Costituzion. In del 22 de otober del 2017 l'è staa votaa 'l referendum autonomista, che l'ha vest ona vitoria del sì. El 28 de fevrer del 2018 el Roberto Maroni l'ha firmad l'acord cont el governo per fà partì 'l process.^[2]

El so territori l'è formad da una part de montagna a nòrd, cont i Alp e i Prealp e da un tòch de la Pianura Padana a sud; el canton de sudòvest (Provincia de Pavia) el riva a tocà i montagn de l'Apenin.

La Lombardia l'è rica de aqua: gh'è tancc fium che vegnen sgiò di montagne e gh'è anca di lagh, che hann ciapad el post di giazzer che gh'eren in di agn indree. In tra i fium, i pussee gross inn el Pò, l'Ada, el Tisin, l'Oi, el Mens, el Lamber, el Bremb, el Seri; i lagh i pussee important inn quei de Còm, Lugan, Garda, Magior, Isee.

El clima l'è putost temperad: d'invern el fà un poo pussee fregg che in di cost del Mar Mediterani, inveci in estad la temperadura l'è l'istessa. In di montagne el clima l'è de tipo alpin, pussee fresch che in de la Bassa.

La Lombardia l'è abitada fiss (l'è la segonda region d'Italia per densità de popolazzion, despœu de la Campania); tuta la zona intorna a Milan la gh'ha dent pussee de quater milion de abitant, e la so conurbazzion la ghe n'ha ses milion e mez; ma anca el rest de la pianura l'è bell pien, cont un mugg de cità e paes. La part de montagna l'è invezi pussee vœuja, fœura che in di vallade.

Per savenn pussee, varda l'articol Consili Regional de la Lombardia.

La Lombardia l'è spartida in dodes province e 1.546 comun (el pussee popolad l'è quell de Milan, quell men popolad l'è Morteron, in Provincia de Lech, sòta al Resegon).

La Lombardia l'è 'na region a statut ordinari, e l'è governada de na Sgionta; el president incœu l'è el Attilio Fontana.

La lengua locala de la region l’è el Lombard, 'na lengua gall-italega compagna del Piemontes, Ligurin, Romagnœul, Emilian e, per 'na quai part de studios, anca al Venet, e gall-romanza, ’me i olter lengov gall-italeghe, el franzes e i lengov d’oïl, el ocitan e i lengov d’oc, el catalan e, infina, i lengov reto-romanze ’me el furlan, el romancc e el ladin.

El Lombard el se spartiss in dò variant principai:

• el insuber, det anch lombard ocidental o cis-abduan (de qua del fium Ada): insubregh inn el milanes, brianzœu, comasch, laghee, bustoch, bosin, monsciasch, lodesan, noares, ossolan;
• el orobegh, despess ciamad lombard oriental o trans-abduan (de là del Ada): in sta categoria chì a gh’inn el bergamasch, bressan, cremasch, cremones (debatud), trentin ocidental, volt-mantoan;

A gh’è pœu el ram lombard alpin, che el se cata tucc i dialet conservativ de montagna, di vœulte ligad al lombard insuber.

Questa sezzion chì l'è ancamò voeuda. Juta a scrivela

Questa sezzion chì l'è ancamò voeuda. Juta a scrivela

•  
  Bèrghem
•  
  Bressa
•  
  Com
•  
  Cremona
•  
  Lech
•  
  Lod
•  
  Mantoa
•  
  Milan
•  
  Monscia
•  
  Pavia
•  
  Sondri
•  
  Vares

1. ↑ (IT) Legge 16 maggio 1970, n. 281
2. ↑ (IT) Ansa - Autonomia, Maroni: giornata storica

	Region d'Italia
Abruzz • Basilicada • Calabria • Campania • Emilia-Romagna • Friul-Venezia Giulia • Lazzi • Liguria • Lombardia • March • Molis • Piemont • Puja • Sardegna • Sicilia • Toscana • Trentin-Sud Tiroeu • Umbria • Val d'Aòsta • Veneto