Populatie (biologie)
Dit artikel is gesjreve (of begós) in 't Sint-Joasters. Laes hie wie v'r mit de versjillende saorte Limburgs ómgaon.
'n Populatie is 'n groep organisme van dezelfdje saort die neet in tied of plaats vanein zint gesjeie en dus (theoretisch) mit einanger kinne veurtplantje.
De gruèdje van 'n populatie varieertj in de loup van d'n tied, mer liek op de langen doer rónjelóm e bestump aevewich te sjoegkele. De populatiegruèdje hèngk aaf van:
- de vröchbaarheid en gebaortes: 't aantal naokómmelinge of eier de vrouwelik individu;
- de mortaliteit: de aafnaam van 't aantal individue in 'n tiedseinheid door sturfdje;
- de migratie: de oetwusjeling van individue tösse populaties van 'n saort; ónger te verdeilen in:
- immigratie: 't zich vestige in 'n populatie in 'n anger gebeed;
- emigratie: 't zich vestige oet 'n populatie in 'n anger gebeed.
Väöl van dees factore zint aafhenkelik van de populatiedichheid en waere gereguleerdj door biotische factore, wie 't dao-zeen van aete, jagendje dere en 't veurkómme van krenkdjes en van abiotische factore, wie de minimum- en maximumtemperatuur, raengerval en doer van de snieëbedèkking.