Grantgóldmol
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
De grantgóldmol of weusdjególdmol (Letien: Eremitalpa granti) is 'n saort aan zougdere vanne góldmolfemielje. 't Bieës is inheimsj ane wèskös van Zuud-Afrika en zuudwèstelik Namibië en zie netuurlik laefgebied besteit oet druueg gebiede, veurnamelik zenjetige weusdjes. De saort wuuertj bedreig door 't verluus aan laefgebiede. 't Is de ènsigste saort van 't geslech Eremitalpa.
Juus wie al anger góldmöl geliekene de möl ze kwa boew, al zeen ze neet nej-verwantj, en zeen ze aangepas aan e gravendj laeve. De veurpuuet zeen gewaore toet graafklawwen en in taengestèlling toette meiste anger saorten inne femielje haet edere poeat drie klawwe. De stert is neet zichbaar; hae haet gein oearsjelpe; de ouge zeen bedèk mit vach enne móndj kèntj 'ne laerechtige lel dae ouch deentj veur 't grave.
Grantgóldmöl höbben 'n lang, ziejechtige vach, die gries is gekluuerdj bieje jónge en zenjetig bie ajer bieëster. Mit 'n lingdje van 7,5 toet 9 cm en e gewich van 15 toet 25 g is 't bieës 't kleinste van zien femielje.
In taengestèlling toet väöl anger góldmöl make grantgóldmöl bao noeatj blievendje tunnele. Ze zwumme door 't zandj op slechs inkel centimaeter ónger of zelfs oppe oppervlakdje dewiel ze veur aetes zeuke. 't Bieës is veurnamelik 's nachs aktief en ras zich euverdaag in klein grotten ónger versjoelendje plantje. Deze góldmol is e solitair bieës en zie wirkgebied is gemiddeldj 4,6 hektaar.
Boete termiete en anger óngewerveldje ètj de grantgóldmol ouch reptiele, wie skinke.