Bretoens
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Bretoens (inheims Brezhoneg, Fraans Breton) is 'n Keltische taol gesproke in (veural) 't weste vaan de Fraanse regio Bretanje. De taol is neet oontstoon oet 't aw Gallisch meh oet de taol vaan de Britte, die mèt d'n inval vaan de Angele en Sakse nao 't vastelaand vlöchte. Daodoor is 't Bretoens hendeg èng verwant aon 't Cornish en 't Welsh. 't Bretoens weurt nog door zoe 300.000 minse gesproke. In de aofgeloupe ieuw is 't aontal sprekers hendeg aofgenome, meh door 't stèrk regionaal geveul vaan de Bretoene is 't neet te verwachte tot de taol oetsturf. Door de sjovinistische Franse legislatie is in Fraankriek geine pläöts voor meenderheidstaole wie 't Bretoens es officieel taol. Väöl kinder liere de taol evels op particulier sjaole boe inkel of veurnaomelik Bretoens gesproke weurt.