Buma grande
La teoria de la Buma grande es la model cosmolojial la plu asetada per la universo de la periodos la plu temprana conoseda tra sua evolui intera seguente. La model descrive como la universo ia grandi de un state de multe alta densia e temperatur, e ofre un esplica completa per un estende larga de fenomenos, incluinte la abunda de elementos de lus, la fondo de microonda cosmolojial, la strutur en la proportio grande, e la lege de Hubble. Si la leges de fisica conoseda ta es estrapolada a un situa de densia la plu grande, la resulta es un singularia cual es tipal asosiada con la Buma grande.
Fisicistes no ia deside esce esta indica ce la universo ia comensa de un singularia, o ce la sabe corente no sufisi per descrive la universo ancora. Mesuras de la rapidia de crese de la universo indica ce la Buma grande ia aveni sirca 13.8 bilion anios a ante, cual es donce regardada como la eda de la universo. Pos la crese comensante, la universo ia fria sufisinte per permete la forma de particulas suatomal, e plu tarda, atomes simple. Nubes jigante de esta elementos primeval plu tarda ia fusa par gravita como areolas de materia oscur, ultima forminte la stelas e galasias vidable oji.
Pos ce George Lemaitre ia nota prima en 1927 ce la universo cresente pote es trasada a retro en tempo a un punto singular de orijina, siensistes ia construi sur sua idea de crese universal. La comunia siensal ia es divideda entre la suportores de du teorias diferente, la Buma grande e la teoria de State stable, ma un estende larga de suporta empirical ia favore forte la Buma grande, cual es aora asetada cuasi universal. En 1929, de la analise de desloca roja, Edwin Hubble ia conclui ce la galasias vaga de lunlotra; esta oserva es coerente con la ipotese de un universo cresente.
En 1964, la fondo de microonda cosmolojial ia es descovreda, cual ia es suporta esensal per la model de la Buma grande, car la teoria ia predise la esiste de un fondo de radia tra la universo de ante ce lo ia es descovreda. Plu resente, mesuras de la desloca roja de supranovas ia indica ce la crese de la universo es aselerante, un oserva atribuida a la esiste de enerjia oscur. La leges fisical conoseda pote es usada per calcula la cualias de la universo en detalia a retro en tempo a un state comensante de densia e temperatur estrema.
| La sistem solal | model | |
| Planetas: | Mercurio | Venus | Tera (Luna) | Marte | Jupiter | Saturno | Urano | Netuno |  |
| Planeta nana: | Ceres | Pluto | Eris | |
| Otras: | Sol |Stela | Sintur de asteroides | Galasia | Nebulosa | Buco negra | Buma grande | |