Asiria
Asiria, acc la Impero Asirian, ia es un rena e impero mesopotamian de Asia sude-ueste antica. Lo ia esiste como un stato de posible tan temprana com la sentenio 25 aec (en la forma de la site-stato de Axur) asta sua colasa entre 612 e 609 aec, estendente la periodos de la eda de bronze temprana a la eda de fero tarde. De la fini de la sentenio 7 aec (cuando la Impero Neo-Asirian ia cade) a la sentenio 7 media ec, lo ia survive como un cosa jeopolitical, per la plu parte renada par potias stranjer como la Impero Partian e la Impero Sasanan entre sentenio 2 aec e sentenio 3 ec. En la parte final de acel periodo, Mesopotamia ia deveni un sentro major de Cristianisme Surian e la loca de nase de la Eglesa de la Este.
Un rena xef parlante linguas semitica, Asiria ia es sentrida sur la Rio Tigris en Mesopotamia norde (oji, Irac norde, Suria norde-este, Turcia sude-este, e franjes norde-ueste de Iran). La asirianes ia deveni la renores de imperos multe potiosa en alga periodos. Composada de un parte grande de la "cuna de sivilia", cual incluida Sumer, la Impero Acad, e Babilonia, Asiria ia ateni la culmina de susedes tecnilojial, siensal, e cultural per sua eda. A sua culmina, la Impero Neo-Asirian de 911 a 609 aec ia estende de Cipros a Iran, e de Armenia e Azerbaijan a Arabia e Egipte.
La nom "Asiria" deriva d la nom de la site capital de Axur, cual dati de 2600 aec, orijinal un de multe statos en Mesopotamia cual ia parla la lingua de Acad. En la sentenios 25 e 24 aec, la res asirian ia es xefes pastoral. De la sentenio 24 tarde aec, la asirianes ia deveni su la controla de Sargon de Acad, ci ia uni tota la popla cual ia parla acad e sumer en la Impero Acad, cual dura de sirca 2334 a 2154 aec. Pos cuando la Impero Acad ia cade, la parte grande de Asiria cual resta ia formi un rejion jeopolitical e un provinse de otra Imperos, an ce entre la sentenio 2 media a sentenio 3 tarde, un colie de renas asirian peti ia comensa en la formas de la sites-statos de Asur, Adiabene, Osroene, Bet Nuhadra, Bet Garmai, e Hatra.
La rejion de Asiria ia cade su la controla seguente de la Impero Median de 678 a 549 aec, la Impero Acemenan de 550 a 330 aec, la Impero de Alexandro en la sentenio 4 tarde, la Impero Seleucan de 312 a 63 aec, la Impero Partian de 247 aec a 224 ec, la Impero Roman de 116 a 118 ec, e la Impero Sasanan de 224 a 651 ec. La concista par la arabis muslim de la area en la sentenio 7 media ia desolve final Asiria como un cosa singular, pos cual la restas de la popla asirian (alora cristian) ia deveni gradal un minoria etnical, linguistical, cultural, e relijial en sua abitada orijinal, survivente asta aora como la popla nativa de la rejion.