Will Reuland

De Will Reuland, gebuer den 3. Oktober 1920 zu Gréiwemaacher an do den 29. Abrëll 1997 gestuerwen, war e lëtzebuergesche Schoulmeeschter, Journalist a Lexikograph.

Will Reuland
Gebuer	3. Oktober 1920 Gréiwemaacher
Gestuerwen	29. Abrëll 1997 Gréiwemaacher
Nationalitéit	Lëtzebuerg
Aktivitéit	Journalist, Lexikograph, Enseignant

De Will Reuland huet, no Zwangsrekrutéierung a Krichsgefaangenschaft, als Schoulmeeschter geschafft. Hie war an enger ettleche Veräiner a Confrerien, déi sech ëm de Muselwäin an de gudde Kascht gedréint hunn.

Hie war jorelaang Lokalkorrespondent vun e puer Zeitungen, hat d'Redaktioun vum Lëtzebuerger Wënzer a vun der Zäitschrëft vun der Confrérie Saint-Hubert, an huet an der Revue de la Jeunesse an an der Warte matgeschafft. Zanter 1959 huet hien, op Radio Lëtzebuerg, d'Muselchronik animéiert, an och am Saarländischer Rundfunk, zesumme mam Léon Blasen, eng Emissioun iwwer de Lëtzebuerger Wäi gemaach.

Vun 1961 u war de Will Reuland Member vun der Dictionnaires-Kommissioun, déi de Lëtzebuerger Dictionnaire ausgeschafft huet, an huet sech do ëm d'Musel-Variante vum Lëtzebuergesche gekëmmert. Hie gouf 1963 Member vun der Linguistescher Sektioun vum Institut grand-ducal, a vun 1991 bis zu sengem Doud där hire President.

1973 huet en, zesumme mam Henri Rinnen, d'Kleines Deutsch-Luxemburgisches Wörterbuch publizéiert, dat an iwwer 10 Oploen nogedréckt gouf. De Succès huet si encouragéiert, och e Petit dictionnaire français-luxembourgeois auszeschaffen.

De Will Reuland ass och Auteur vu Gedichter a vu Jugenderënnerungen, déi an zwee Bicher, Jempi an d'Jempien I an II verschafft goufen.