Molière

Gwarier, kevarwodher ha skrifer a Frynk a veu Molière (1622 – 17 mis Hwevrel 1673). Jean-Baptiste Poquelin o y hanow gwir, ha Molière o y hanow gwari. Ev a skrifas rann a'n komedis an moyha posek yn istori an bys.

Genys veu yn Paris may perghenna y das gwerthji leurlennow. Yn y yowynkneth yth erviras Molière bewa bewnans artydh. Orth 21 bloodh, ev a fondyas kowethyans gwariva, mes yn skon y feu bankskwattyes. Dhyworth 1645 dhe 1658, ev a wrug tour a Frynk gans nebes a'y gowetha.

Diwettha, an Myghtern Louis XIV a wrug Molière omgemeryansek rag an didhan yn lys Versailles ogas dhe Paris. Lowen o Molière dhe gavos an myghtern avel koweth, drefen yth esa lies eskar dhodho, yn arbennek tus posek y'n eglos Katholik Roman. Yma komedis Molière ow tochya gwanderyow mab-den: avi, anhwekter, fayntys, hag own a verwel. Dre worra tus y wariow yn plitys hwarthus, yma hwans dhe Molière didhana hag adhyski y weloryon.

Tartuffe yw onan a'y wariow an posekka, a dhiskwa drog den ow ladra y fordh yn teylu rych. Y wari diwettha a veu Le Malade Imaginaire. Kepar dell wrug yn lies komedi anodho, Molière a warias an bennran. Marow a veu war an wariva dres an peswara performans. Drefen y gudynnow yn kever an eglos, ny veu kummyas dh'y veudhi yn gorflan eglos.