Bradley Wiggins

Informasi pribadi
Jeneng jangkep	Bradley Marc Wiggins
Jeneng celukan	Wiggo/The Kilburn Flyer
Dhuwur	1.90 m (6 ft 3 in)
Bobot	69 kg (152 lb; 10 st 12 lb)
Rékor tandhing
Tim saiki	Pensiun
Disiplin	Balap Sepédhah
Posisi	Pembalap Sepédhah
Kategori	Individual pursuit Time trialist All-rounder
d r b

Bradley Wiggins yaiku salah sawijining pembalap pit kang asalé saka Inggris. Bradley Wiggins duwé jeneng jangkep yaiku Bradley Marc Wiggins lan duwé gelar saka karaton Britania Agung Sir Bradley Wiggins. Wiggins lair ing kutha Gènt, Bèlgia surya kaping 28 wulan April taun 1980, yèn diétung umuré wis ngancik 39 taun.^[1] Wiggins biyèn sepisan naté didhapuk minangka pembalap sepédhah paling mumpuni ing Britania Agung kuwi lumrah jalaran préstasi kang dipikolèhi déning dhèwèke yaiku dadi pembalap Inggris Raya kang menangi lomba balap sepédhah kelas donya yaiku Tour de France ing taun 2012.^[2]

Bapaké Bradley Wiggins yaiku Gary Wiggins satemené yaiku uga pembalap sepédhah saka Ostrali.^[3] Wiggins lair dudu saka kulawarga kang sugih blegedhu, nalika isih enom Linda ibuné kudu utang dhuwit akèhé 50 èwu poun kanggo nyokong gegayuhané Wiggins dadi pembalap sepédhah lan dhèwèké rumangsa kapotangan budi marang ibune.^[4]

Wiwitan kariré Bradley Wiggins wis katlacak nalika dhèwèké isih ing tingkat yunior kanthi olèh juwara ing kajuwaraan Junior Track Championship ing taun 1998. Awit saka kuwi dhèwèké banjur menangi manèh enem kajuwaraan donya ing trèk balap, telu individual pursuit, loro team pursuit, lan siji ing Madison. Kang gawé gilap manèh yaiku rékoré Winggins yaiku dadi pembalap sepédhah kang menangi medhali emas kaping telu ing Olimpiadhe kanthi urut-urut ing nomer individual pursuit (Olimpiadhe Athena 2004 lan Olimpiadhe Béijing 2008), sarta ing nomer team pursuit (Olimpiadhe Béijing 2008 lan Olimpiadhe Rio de Janéiro 2016), lan sawisé pangowahaning nomer balap menyang trèk aspal nomer time trial.^[5]

Lelakoné Wiggins ing balap sepédhah luwih suwé dilakoni bareng klub saka Prancis kang uga asring nggayuh suksès. Kuwi ora kalebu dhèwèké nalika olèh rangking kapapat ing kajuwaraan balap sepedhah kang kaloka yaiku Tour de France, kang sadurungé Wiggins didhapuk minangka pembalap kang nyekel kategori time trial kang bisa dadèkaké dhèwèké juwara ing Tour de France taun kasebut. Sawisé alihan menyang tim Sky, Wiggins mimpin pikolèhan poin kanggo timé, nanging ing taun 2010 dhèwèké amung bisa rampung balapan ing rangking 24. Malah setaun sawisé Wggins nemahi kacilakan. Ing taun balap 2012 dhèwèké mimpin pikolèhan poin umum jalaran menang ing séri Paris - Nice, Tour de Romandie, lan Critérium du Dauphiné. Telung balapan gedhé ing sajeroning kalèndher balap sepedhah lan dadèkaké dhèwèké pentholan balap sepédhah kang digadhang-gadhang bakal menang balapan Tour de France taun kasebut. Wiggins kasil ngrebut jèrsi kuning (pratandha pimpinan balap miturut poin) nalika balapan ngancik séri kapitu lan ngukuhaké kamenangan Wiggins kang tuméka saiki isih diéling-éling amarga séri kuwi nempuh jarak kang adohé 2300 km.^[6]

Bradley Wiggins yaiku pembalap sepédhah kang bener-bener mumpuni, kabukti dhèwèké wis akrab karo préstasi ing tingkat donya, mèh saben taun ing kariré dhèwèké mesthi olèh gelar.

Ing Olimpiadhe Athéna taun 2004, Wiggins dadi atlét Britania Raya sepisan sajeroning 40 taun kang bisa menangi telung medhali ing sepisan penampilan. Dhèwèké olèh medhali emas ing nomer Pursuit, medhali perak ing nomer Team Pursuit, lan medhali perak ing Madison bareng mitra balapé yaiku Rob Hayles.^[7]

Taun kapindhoné béla tim balap Crèdit Agricole, Wiggins dadi juwara ing nomer Time Trial anèng sirkuit de Lorraine (sèri kawolu) saka kajuwaran Tour de l'Avenir.^[8]

Taun sepisané Wiggins bareng Tim Cofidis, nanging dhèwèké ora menangi apa-apa ing taun kasebut, dadèkaké dhèwèké alihan balap sepédhah saka trèk menyang aspal lan nglakoni debut ing kajuwaran Tour de France.^[8]

Isih bareng tim asal Prancis, yaiku Cofidis dhèwèké balapan ing Dauphiné Libéré lan menang balapan prolog, sadurungé mèlu balapan Tour de France lan kasil ngrampungaké balapan urutan kapat ing Prolog London. Dhèwèké uga bacutaké karir balapé, menang medhali emas ing nomer Individu lan Tim Pursuit ing Kajuwaran Donya.^[8]

Bebungah Bradlèy Wiggins kang paling ngedab-edabi.^[9]

• Dhobel Medhali Emas ing Olimpiadhe Béijing 2008
• Juwara Tour de France 2012
• Medhali Emas ing Olimpiadhe London 2012 nomer Time Trial
• Menang gelar World Time Trial
• Mecahaké rékor UCI Hour 2015
• Medhali Emas kalima sadawaning karir ing Olimpiadhe Rio de Janéiro 2016

Sajegé karir balap Wiggins, dhèwèké wis bélani sakèhing tim balap profésional lan malah naté gawé tim balap dhéwé ing taun 2015.^[8]

• 2016 - Team Wiggins  Britania Raya
• 2015 - Team Sky  Inggris
• 2015 - Team Wiggins
• 2014 - Team Sky
• 2013 - Sky Procycling  Inggris
• 2012 - Sky Procycling
• 2011 - Sky Procycling
• 2010 - Sky Professional Cycling Team
• 2009 - Garmin - Slipstream  Inggris
• 2008 - T-Mobile Track Team  Jerman
• 2008 - Team Columbia  Britania Raya
• 2007 - Cofidis - Le Crédit par Téléphoné  Prancis
• 2006 - Cofidis - Le Crédit par Téléphoné
• 2005 - Crédit Agricole  Prancis
• 2004 - Crédit Agricole
• 2003 - fdjeux.com
• 2002 - fdjeux.com

Atlét emas, mangkono peparabé bebrayan Inggris marang Bradley Wiggins mbiwarakaké pènsiun saka donya balap sepedhah ing taun 2016, nanging pènsiuné Wiggins uga gawa kontroversi jalaran juru latih kang dadèkaké dhèwèké menang pirang-pirang kajuwaran nganggep yèn pènsiuné Wiggins nyebabaké jarak kang adoh kalawan generasi paneruse. Juru latih Wiggins naté kandha manawa pènsiuné Wiggins nggémbol wirang.^[10]

1. ↑ Ariyasni, Yessi Dita. "Profil Olahragawan Balap Sepeda Bradley Wiggins". Merdeka.com. Dibukak ing 2020-01-18.^{[pranala mati permanèn]}
2. ↑ Cycling Weekly, Admin. "Kabèh Pawarta Babagan Bradley Wiggins (Saka Basa Inggris)". Cycling Weekly. Dibukak ing 2020-01-18.
3. ↑ Hood, Edmond (2012-08-08). "Delok Bradley Wiggins Luwih Cedhak (Saka Basa Inggris)". Pezcyclingnews.com. Dibukak ing 2020-01-23.
4. ↑ BBC, Admin (2015-05-10). "Olah Raga Balap Sepedhah (Saka Basa Inggris)". BBC Sport. Dibukak ing 2020-01-23.
5. ↑ Cycling Weekly, Admin. "Kabèh Pawarta Babagan Bradley Wiggins (Saka Basa Inggris)". Cycling Weekly. Dibukak ing 2020-01-23.
6. ↑ Longmore, Andrew. "Biografi Bradley Wiggins (Saka Basa Inggris)". Encyclopædia Britannica. Dibukak ing 2020-01-23.
7. ↑ Fletcher, Patrick. "Pembalap Sepédhah Bradley Wiggins". Cycling News. Dibukak ing 2020-01-23.
8. ↑ ^{a b c d} Fletcher, Patrick. "Pawarta Bradley Wiggins (Saka Basa Inggris)". Cycling News. Dibukak ing 2020-01-23.
9. ↑ Westby, Matt (2016-12-29). "Pawarta Olah Raga Bebungah Karir Sir Bradley Wiggins kang Ngédab-édabi (Saka Basa Inggris)". Sky Sports. Dibukak ing 2020-01-23.
10. ↑ Gordon, Jamie (2017-03-27). "Sir Bradley Wiggins Pènsiun (Saka Basa Inggris)". The Sun. Dibukak ing 2020-01-23.