Tsai Ing-wen

Tsai er menntuð í lögfræði og utanríkisverslun. Hún útskrifaðist með LL.B-gráðu frá Háskólanum í Taívan, mastersgráðu frá lagadeild Cornell-háskóla og doktorsgráðu frá Hagfræði- og stjórnmálavísindaskóla Lundúna. Hún vann síðan sem prófessor við lagadeild Soochow-háskóla og Chenchi-háskóla. Árið 1993 var Tsai útnefnd til ýmissa opinberra embætta og varð þar á meðal samningamaður Taívans við Alþjóðaviðskiptastofnunina og einn höfunda stefnu Lee Teng-hui um milliríkjasamskipti Taívans við Kína á meginlandinu.

Þegar Chen Shui-bian, frambjóðandi Lýðræðislega framfaraflokksins (DPP), varð forseti Taívans árið 2000 varð Tsai ráðherra meginlandsmálefna utan flokks. Hún gekk í Lýðræðislega framfaraflokkinn árið 2004 og sat í stuttan tíma á löggjafarþingi Taívans. Eftir það varð hún varaforsætisráðherra þar til meðlimir ríkisstjórnarinnar sögðu af sér árið 2007. Tsai var kjörin formaður Lýðræðislega framfaraflokksins árið 2008 eftir að flokkurinn bað ósigur í forsetakosningunum það ár.

Tsai bauð sig fram í borgarstjórakosningum Nýju-Taípei árið 2010 en tapaði fyrir öðrum fyrrverandi varaforsætisráðherra, Eric Chu. Tsai varð frambjóðandi Lýðræðislega framfaraflokksins í forsetakosningum ársins 2012 eftir nauman sigur í forkjöri flokksins og var þá fyrsti kvenkyns forsetaframbjóðandi úr stórum stjórnmálaflokki í lýðræðissögu Taívans. Tsai tapaði fyrir sitjandi forsetanum Ma Ying-jeou úr Kuomintang-flokknum og sagði í kjölfarið af sér sem flokksleiðtogi DPP.

Tsai bauð sig fram til forseta á ný fyrir Lýðræðislega framfaraflokkinn árið 2016.^[3] Í þetta sinn vann Tsai afgerandi sigur með um 58 prósentum atkvæða en keppinautur hennar, Eric Chu, hlaut aðeins 32,5 prósent.^[4]

Tsai vann endurkjör í forsetakosningum sem haldnar voru þann 11. janúar árið 2020 með rúmum 57 prósentum atkvæða gegn Han Kuo-yu, frambjóðanda Kuomintang.^[5] Han Kuo-yu hafði lagt áherslu á nánara samstarf við meginlandsstjórn Alþýðulýðveldisins Kína en Tsai hafði lagt áherslu á áframhaldandi sjálfstæði Taívans og hafnað möguleikanum á því að Taívan geti sameinast meginlandsstjórn Alþýðulýðveldisins líkt og Kínverjar vilja. Sigur Tsai og Lýðræðislega framfaraflokksins þótti merki um talsverð umskipti í taívönskum stjórnmálum þar sem stuðningur við hana hafði áður verið farinn að dala og flokkurinn hafði beðið ósigur í héraðskosningum árið 2018. Talið er að batnandi efnahagur hafi aukið stuðning við Tsai og að fjöldamótmælin í Hong Kong hafi gert marga Taívanbúa afhuga möguleikanum á því að gangast undir stjórn Alþýðulýðveldisins undir formerkjum „eins lands, tveggja kerfa“ líkt og gert er í Hong Kong.^[6]

1. ↑ The China Post (27. desember 2015). „DPP vice-presidential candidate lists his proposals to help young people“. www.chinapost.com.tw (enska). Afrit af upprunalegu geymt þann 5. mars 2021. Sótt 28. desember 2017.
2. ↑ Ministry of Foreign Affairs brochures MOFA-EN-FO-105-011-I-1 (also appearing in Taiwan Review, May/June 2016) and -004-I-1.
3. ↑ Stefán Rafn Sigurbjörnsson (16. janúar 2016). „Allt stefnir í fyrsta kvenforseta Taívan“. Vísir. Sótt 16. janúar 2024.
4. ↑ Kristján Róbert Kristjánsson (16. janúar 2016). „Tsai Ing-wen sigraði á Taívan“. RÚV. Sótt 16. janúar 2024.
5. ↑ Samúel Karl Ólason (11. janúar 2020). „Sjálfstæðissinnar vinna yfirburðasigur í Taívan“. Vísir. Sótt 11. janúar 2020.
6. ↑ „Lýðveld­issinni end­ur­kjör­inn for­seti Taív­an“. mbl.is. 11. janúar 2020. Sótt 11. janúar 2020.