Estación de Almería

A antiga estación de ferrocarril de Almería, agora en desuso, foi rematada en 1893 en arquitectura de ferro e cristal. Dise que foi deseñada por Alexandre Gustave Eiffel^{[Cómpre referencia]}, aínda que é máis fiable que fose deseñada por un dos seus discípulos. A súa fachada principal é de tres corpos. Nas súas funcións de estación foi substituída polo edificio lateral da estación intermodal, que ademais concentra o maior tráfico de autobuses da provincia.

Desde 2005 os trens foron desprazados á nova estación intermodal, situada uns metros antes da antiga, que como o seu propio nome indica une servizos ferroviarios e por estrada. Foi a primeira estación intermodal construída en España.

O tráfico ferroviario foi sempre escaso en Almería. Tradicionalmente chegaba só a liña Moreda-Guadix-Almería de vía única electrificada, que nunca tivo gran tráfico de viaxeiros. A electrificación só se usaba para os trens de mineral cara ao Marquesado, debido ás fortes pendentes. Unha vez que o servizo de mercadorías desaparece tralo peche das minas, a electrificación (3.000 V) desactívase. É estación términi de trens.

Actualmente chegan a esta estación os seguintes trens:

• R-598: procedente de Sevilla cubrindo a liña A-3 de media distancia, 4 trens por sentido.
• Arco García Lorca: procedente de Barcelona. Non circula a diario, pois o tren alterna o destino dunha das súas gallas e circula un día ata Moreda e outro ata Almería.
• Talgo: procedente de Madrid, 2 trens por sentido.

Prevese a chegada da alta velocidade a esta estación desde Murcia (2012-2015^{[Cómpre referencia]}).

O tráfico de autobuses é significativamente maior có de trens, e cobre case todos os destinos españois posibles. Tamén parten de aquí autobuses interurbanos que comunican Almería con outros concellos da provincia.

Wikimedia Commons ten máis contidos multimedia na categoría:  Estación de Almería