Soricomorfos

Soricomorfos Soricomorpha Rango fósil: eoceno medio - actualidade
Sorex minutus
Clasificación científica
Reino: Animalia Filo: Chordata Subfilo: Vertebrata Clase: Mammalia Infraclase: Placentalia Superorde: Laurasiatheria Orde: Soricomorpha Gregory, 1910
Familias e Subfamilias
Véxase o texto

A dos soricomorfos (Soricomorpha) é unha orde de mamíferos placentarios.^[1]

Até hai poucos anos, as especies que hoxe integran a orde formaban un grupo importante dentro da antiga orde dos insectívoros. Porén, demostrouse que esta orde era polifilética, polo que varias novas ordes separáronse del, como a dos afrosorícidos (que inclúe os tenrecs e as toupas douradas), a dos macroscelideos (as musarañas elefante) a dos erinaceomorfos (que alberga aos ourizos e aos ximnuros), deixando só catro familias que son as que comprende esta nova orde, como se mostra máis abaixo.^[1]

Posteriormente demostrouse que Soricomorpha era un grupo parafilético, porque os sorícidos compartiron un antepasado común máis recente cos erinaceidos que con outros soricomorfos.^[2] Demostrouse que a reunión dos Soricomorpha e os Erinaceidae era un grupo monofilético, coñecido por algúns autores como a orde dos Eulipotyphla.^[3]

Entre outras especies pertencen á orde dos soricomorfos as toupas e as musarañas.

A orde dos Soricomorpha foi creada en 1910 polo paleontólogo estadounidense William King Gregory (1876-1970), pero non foi adoptada fóra da paleontoloxía até os inicios do século XXI, grazas aos avances da xenética.

O nome científico Soricomorpha está formado pola unión dos elementos do latín científico soric-, raíz derivada do xenitivo de sōrex, -icis, "rato", e tamén "musaraña", e -morpha, forma neutra derivada do grego antigo μορφή morphé, "forma", usando a vogal -o- como elemento de unión para facilitar a pronuncia. Literalmente: "os que teñen forma de musaraña".

A orde dos soricomorfos divídese en catro familias.^[4]

• Orde Soricomorpha
  • Familia (†) Nesophontidae Anthony, 1916
  • Familia Solenodontidae Gill, 1872
  • Familia Soricidae G. Fischer, 1814 ^[5]
    • Subfamilia Crocidurinae
    • Subfamilia Soricinae
    • Subfamilia Myosoricinae
  • Familia Talpidae G. Fischer, 1814 ^[6]
    • Subfamilia Scalopinae
    • Subfamilia Talpinae
    • Subfamilia Uropsilinae

As especies do xénero Nesophontes, único da familia dos Nesophontidae, parece que sobreviviron á extinción plistocena tardía, polo menos sábese que cinco especies existiron en América en época poscolombina.^[7]

Wikimedia Commons ten máis contidos multimedia na categoría:  Soricomorfos

Wikispecies posúe unha páxina sobre:  Soricomorfos

• Madsen, O.; Scally, M.; Douady C. J. et al. (2001): "Parallel adaptive radiations in two major clades of placental mammals". Nature 409 (6820): 610–614.
• Murphy, W. J. et al. (2001): "Molecular phylogenetics and the origins of placental mammals". Nature 409 (6820): 614–618.
• Wilson, D. E. & Reeder, D. M., eds. (2005): Mammal Species of the World: A Taxonomic and Geographic Reference 3rd ed. Baltimore, Marylando, USA: The Johns Hopkins University Press. ISBN 978-0-8018-8221-0.
• Yates, T. L. (1984): "Insectivores, elephant shrews, tree shrews, and dermopterans" en Anderson, S. & J. K. Jones, Jr., eds. Orders and Families of Recent Mammals of the World. Nova York: John Wiley and Sons, pp. 117–144.

• Laurasiaterios
• Insectívoros
• Taxonomía dos mamíferos

• Soricomorpha na ADW. Con amplísima información, imaxes e bibliografía (en inglés)
• Soricomorpha na EOL. Con información das familias (incluída a extinta), numerosas imaxes e mapas de distribución (en inglés)