Leterature latine

La leterature latine si fas partî par tradizion tal 240 p.d.C., cul prin dram di Livi Andronîc.

La leterature latine si divît in doi grancj tocs:

• chê classiche, che e rive fin al amont de antighitât, vadì fin al periodi tra la colade dal Imperi roman (476) e la calade dai Langobarts (568); e je chê che e si studie di plui e e corispuint ai timps che il latin lu fevelave la int;
• chê neolatine, unevore trascurade, ancje se i autôrs a son tancj; al è il periodi che il latin lu savevin dome i studiâts, parcè che tal fevelâ si jere davuelzût tes lenghis romanzis.

La prime part, chê classiche, si scompartis ancjemò in cinc parts:

• il periodi des origins, de nassince de lenghe ai prins documents leteraris atôr de prime vuere puniche (241 p.d.C.);
• il periodi arcaic, dal 241 p.d.C. ae muart di Sile (78 p.d.C.);
• il periodi d'aur, dal 78 p.d.C. ae muart di August (14 d.d.C.), che si torne a dividi in doi tocs plui piçui:
  • il periodi di Ciceron, dal 78 p.d.C. a sô muart (43 p.d.C..);
  • il periodi di August, dal 43 p.d.C. ae muart (14);
• il periodi di argent, dal 14 ae muart di Traian (117);
• il periodi de decjadince, dal 117 in ca fin al principi de ete di mieç.

I prins documents de lenghe montin al VI secul p.d.C., ma ditestemoneancis leteraris scuasit no 'nd' è; al è il periodi che la leterature plui influent su chê latine, chê greghe, no si jere ancjemò fate sintî diretementri. O podìn dividi i genars leteraris de prime antighitât romane in doi categoriis: i documents ufiziâi e chei privâts. Tai prins si cjatin:

• i cjants religjôs (come il Carmen Arvale e il Carmen Saliare), cul antîc viers saturni, che si cjantavin tes funzions;
• i Annales pontificum, vadì lis cronachis dai pontefiçs massims, che a son ladis pierdudis o cuant che i Gals Senons sachizarin e devastarin Rome tal 390 p.d.C. o forsit pe trascurance di chei che a vevin di vuardâju;
• lis innomenadis leçs des XII taulis, che a forin butadis jù tal 452 p.d.C..

Invezit dal secont ordin cjapin part:

• lis inscrizion funebris, che i siôrs ju fasevin fâ in viers e jemplâ di lauts a la lôr cjasade (difat chest genar di inscrizions funebris à non elogium);
• lis neniae, che a vignevin cjantadis des feminis de famee o di altris che a vignivin paiadis a pueste ai funerâi dai passûts, simpri incensant la briade dal muart;
• lis laudationes funebres, orazions pronunziadis dai sanguins dai rics par innomenâ lis virtûts dai lôr defonts, che par ordenari a jerin simpri straordenaris, cjolint ancje chi il bon par magnificâsi des brauris, presumudis o veris, dai basavons (si ricuarde cuant che Cesar tal memoreâ sô agne Julie si svantave che la lôr cjasade vignive di Romul e dai dius);
• i carmina convivalia, che i siôrs scoltavin intant che a fraiavin a banchet, là che ur plaseve sintî ancje chi trop che a jeria bulis e gloriosis lis lôr fameis;
• i carmina trimphalia, che i soldâts indreçavin ai condutôrs dilunc lis fiestis triomfâls pes vitoriis, là che a vevin miôr di scherzevuls insolencis che no di compliments e mignognulis (al è innomenât chel che i cjantarin a Cesar, che i disevin, maliciôs, che al jere marît di dutis lis feminis e femine di ducj i marîts);
• lis orazions: Rome jere une republiche e i siei abitants jerin famôs par lâ simpri par proces e tribunâi;
• il teatri popolâr, cun genars diviers, come la atelane, che e veve mascaris tradizionâls fissadis, e i fesenins, là che si svilanavin cun osenitâts e scrovariis.

La culture greghe si faseve ben sintî pal Mediterani, ma e fo la cjapade di Tarant, citât de Grande Grecie espugnade tal 272 dilunc de vuere cuintri Pir re d'Epîr, a causionâ un contat diret fra i Romans e i Grêcs; la influence de lôr culture, che e jere la plui prestigiose, tacà a parturî efiets atôr dal 240, cuant che Livi Andronîc, che si comence di lui a enumerâ i autôrs latins, butà fûr la sô prime comedie. Andronîc jere la dite juste par dâ aes letaris romanis la lusigne di Grecie che ur coventave par scomençâ la lôr storie, stant che al jere propite di Tarant e di marilenghe greghe. O podarìn duncje dî che la leterature latine nasseve za madure, cence partî de produzion popolâr, vignint fûr di une tradizion za ben cressude, come un ramaç gnûf tun vecjo arbul, chel de leterature greghe, cun dute la sô storie. Bisugne dî che intant che chê latine e butave lis primis gheadis chê greghe veve za passât la sô fase classiche e jere tal periodi dal elenisim, un stîl baroc, fat di finecis, preciosetâts, efiets sorprindints, voe di stupî i letôrs e erudizion, robis favoridis ancje dal passaç definitîf e complet de fase aurâl a chê scrite; la democrazie e lis citâts libaris de Grecie classiche jerin coladis e tai reams elenistics nol jere plui spazi pal impegn civic e politic, cussì la leterature pierdè il so rodul public e si concentrà sul individui e sui sitiments e no su la ricjercje de sapience pal miorament de societât. Si sfantave cussì la concezion tipiche de grecitât classiche de leterature come di un fat coletîf, tant che la aministrazion dal stât, e chê deventave robe privade e risiervade a piçui circui di studiâts (ve parcè che la erudizion e lis finecis cjatavin simpri plui puest te pruduzion leterarie: cumò i letôrs rivavin a lampâlis).

Ciert si sintì di subit la influence dal elenisim, stant che i autôrs latins no podevin jessi francs de mode dal timp, però i efiets plui rivoluzionaris a rivarin dome plui tart, parcè che di une bande Rome no jere ancjemò pronte a acetâ une culture cussì moderne e cussì divierse, di chê altre il canâl là che a vevin di passâ ducj lis novitâts dal mont grêc jere la Grande Grecie, che, come dispes tocje ae coloniis, e veve une culture tradizionâl: cussì tai prins agns la influence greghe fo soredut de grecitât classiche. Chel che de Grecie classiche nol rivà a Rome son la filosofie, che e jere masse ingropade par jessi comprindude tal Lazi arcaic e ur varès savoltât masse il sisteme dai valôrs (gjavant cualchi câs, come il pitagorisim, che e veve une antighe tradizion te Italie disot), e il teatri comic, parcè che al meteve in sene personaçs impuartants de vite publiche, che, se si podeve fâ a Atene, nol jere une buine idee intune societât come chê romane (ind' si visà ben Nevi, che la sô olse insuride i costà salât). Duncje il teatri comic (Livi Andronîc, Nevi, Plaut) cjatà a model la comedie gnove, di etât elenistiche e di cheste e cjatà i metris, il stîl e ancje lis tramis, biel che chel tragic (Livi Andronîc, Nevi, Pacuvi) supave dut dai autôrs classics, come Eschil, Sofocli e Euripit. Intant a nassevin ancje i poems, cu la traduzion de Odissee di bande di Livi Andronîc e cul Bellum Poenicum di Nevi.

Rome, davuelzude cul incuintri cu la Grecie, jere aromai pronte a gustâ e a preseâ i fins pomis dal elenisim e circui di inteletuâi, come chel dai Sipions, fasevin di dut par supâ il plui pusibil la culture greghe, instradâts di personaçs vignûts di jevât, come Polibi e Cratete di Mal. Di jevât al rivave un sintiment di umanitât che la int romane nol veve mai sintût: si scomençave a cjalâsi dentri e a fâsi domandis, parcè che e jere la prime volte che si contave l'omp tant che individui. Chest sintiment si nasave ben tes comediis di Terenzi, che plui che fâ ridi fan pensâ, e al veve vût un precedent in chês di Cecili Stazi. Difat lis comediis son un bon spieli de situazion: planc a planc, pierdevin dut il lôr gnerf comic par deventâ pinsirôs (a la fin dal II secul tes togadis di Afrani di ridi nol jere propite nuie). A ispirâsi a chel sintiment a jerin soredut chei dal circul dai Sipions, che a cirivin di capî ce rodul vevin di vê Rome e i Romans tal mont, come ur tirave Polibi a fâ rifles su chês robis. La atenzion pal individui e pai sintiments causionà ancje la introduzion de poesie di argument subietîf, là che si tacave a cjalâ la leterature come alc di privât: Lucili scomençà a sbeleâ ducj chei che al veve in piche tes sôs sataris, ordinant chel genar seont il gnûf gust plui fin e musirât. Une altre novitât che e rivà di jevât, simpri leade a la gnove atenzion pe interioritât, fo la poesie d'amôr, che le tacarin a scrivi Levi e i altris poetis dal circul di Lutazi Catul, tal ultim periodi, là che prin lu veve fat dome Eni. Propite chest fo un dai promotôrs plui risolûts e plui scoltâts de virade de culture daûr dal elenisim, stant che al veve supât a pen chel stîl e chel mût di vivi e di sintî e di pensâ e che al spirave a vignî l'institutôr de gnove poesie; al tacà ancje a scrivi poesie epiche in esametris, viers tipics de leterature greghe, che dopo ducj lu imitarin, bandonant l'antîc metri saturni. Cuintri di lui e di dute le schirie dai riformadôrs a jerin chei che a crodevin tal valôr de salde e rigorose culture romane tradizionâl e che a suspitavin che chestis insiliosis novitâts le varessino fade sfantâ, vuidâts di Caton il censôr, che al jere chel plui reazionari e intransigent; la resistence jere pluitost resolude, tant che si pensà ben di parâ vie e tornâ a mandâ indaûr ciertis filosofs vignûts de Grecie, par pôre che la lôr filosofie cjapàs pît, ma aromai al jere masse tart e la culture romane nol podeve che cjalâ simpri plui a jevât.

Aromai supade la ideologie dai Grêcs, tal mont roman chel antîc spirt di partignince e chel sens di cuarp che lu vevin simpri unît si jerin ben flapîts, lassant il puest a un insolit individualisim: al puest dal scuintri tra lis classis, a jerin lis lotis di grancj personaçs e la int si crevave par lôr, i menadôrs plui potents e carismatics, bandonade la virile scletece dai antenâts, si compuartavin come siôrs orientâi e a tratavin il stât come un domini personâl e i poetis puartavin al ultin grât la dimension privade che chei plui vecjos di cualchi gjenerazion a vevin puartât dentri. Cussì a vignerin fûr i poetis gnûfs (Catul 'nd' ere il plui impuartant), che a poesiavin cence interessâsi par nuie di cuistions publichis, ducj cjapâts a vivi lis lôr emozions e a esprimilis te maniere plui fine pussibil, curant cun perizie certosine i viers, cul esempli dai erudîts e abilissins eleniscj. Intant si spandeve ancje l'epicureisim, che, predicjant la ricercje dal plasê invezit che de virtût, par zonte midiant la vite cuiete e fûr di man e il bandon dal impegn politic (robis di no crodi pai Romans di paste antighe), al lave cuintri ducj i valôrs dal mos maiorum; cheste gnove filosofie strià Lucrezi, che 'ndi deventà il propugnadôr plui ardint, e al formà il spirt di Virgili e Orazi, che a varessin dât une contribuzion altissime ae poesie tai decenis sucessîfs, aromai al timp di August. Il partît di Juli Cesar incjarnà chestis gnovis tendencis di orientalisim, là che i conservadôrs come Ciceron, te politiche e te culture, jerin invezit dispes leâts a Pompeu, stant che a speravin di cjatâ in lui un difensôr des tradizions republicanis e dal implant instituzionâl dal stât, che al riscjave di deventâ un regn come chei orientâi. Propite Ciceron, in plui di stravolgi di gnove lûs la oratorie, al tratà par prin di filosofie stoiche, che, cheste sì, si combussave e messedave benon cui ideâi de vecje romanitât.

Copât Juli Cesar dai reazionaris de republiche, il stât al veve di sielzi tra Marc Antoni e Otavian; da un pont di viste culturâl e politic voleve dî la continuazion des sburtadis al monarchic e dissolût mont di jevât che i dave za Cesar (ancje Antoni jere ingolosît des molis e dulcis seduzions che a vignivin dal orient) o ben la tutele des tradizions e des instituzions de republiche sot il podê assolût di Otavian, che al varès fat di garant. Cussì chest, podint contâ ancje sui conservadôrs, rivà a fâ fûr il riversari e si sigurà la vitorie. I Romans, che, scanâts e scunîts des triments violencis des vueris civîls, a volevin dome pâs e recuie, i larin daûr vulintiron, cun fidance e sperance: la propagande dal regjim, fasint jeve sul scuniment de int e su spietis messianichis e di palingenesi che si nasavin tal aiar (a jerin i agns juste prin de vignude di Crist e il clime jere chel), prometeve une gnove ete pe la umaunitât intire, che e sarès tornade indaûr ae etât dal aur. Cheste spiete plene di sperance si cjate ben te IV Bucoliche di Virgili, che al sintive ben chel desideri di pâs: come varessino podût lui e Orazi, dopo vê viodûts e vivûts ducj i orôrs des veris civîls evitâ di avodâsi al epicureisim e a la ricercje de cuietece di une vite piçule piçule e lontane dai grants sconcuas? E no a varessin podût nancje poesiâ intune maniere convulsive e patetiche e fâ sclopetâ e scjocâ i viers intun mût frenetic, cui efiets ardîts dai arcaics (cjale Plaut e Pacuvi), cussì la lôr poesie veve dentri lis cartaristichis plui tipichis dal judiziôs pinsîr classic: e jere misurade, controlade e judiziose, scrite cuntun stîl pulît, seont i principis dal aticisim, mediât de finece dal elenisim, che aromai Rome e veve supât ben. La propagande di August, cun ducj i leterâts plui leadis al podê (i poetis dal influentissin circul di Mecenât, il storic Tît Livi e i altris) mostrave duncje il gnûf regjim come la condizion e la tutele necessarie par tornâ a meti sù la republiche cul so spirit plui profont e essenziâl, ma lu faseve cuntun sintiment e cuntun ordin mai viodûts e la leterature insvorave dut cuntun tic di tradizion greghe, ma cjapade soredut di chê classiche.

Dut diviers il câs di chei che, masse zovins par vê vivût chês vueris orendis, a profitavin de capitâl par vivi a la beade e gjodi dal moment di bondance, creant un gnûf clime di fiestose lizerece: a jerin tant diviers di Virgili e di Orazi Properzi e Ovidi! Tibul sossolave une vite serene in campagne, ma, diviers dai savis Virgili e Orazi, al jere ancje lui biel invuluçât tal amôr e tal sintiment e al viveve par chel, come ducj i poetis dal circul di Messale (Ovidi cun lôr).

Se August al veve scomençât il so regn cun tantis sinceris sperancis e si passave un periodi prospar di otimisim, al è vêr che par meti sù chel gnûf sisteme di podê e chel gnûf ordin si jere poiât, par fuarce di robis, su di un sostegn clopadiç e balarin, che i sgriave e preiudicave dut l'ecuilibri: par vinci la vuere cuintri Marc Antoni al veve doprât une schirie di legionaris e al veve vût ancje di paiâju, robe che al veve fat confiscant cjamps ai agricoltôrs, come il puar Virgili, e assegnantju a lôr, ma cussì al mandà in sbrui dut il sisteme agricul e al fasè sparî une intere classe sociâl, chê des piçui possidents; il risultât fo che, sfantât chel sisteme di produzion e rimplaçât di di fisissins cumierçs cul orient, e madracave la crise, tes cassis imperiâls nol rivà plui un bec e tal esercit di braçs, che ju si tirave dongje dai terenârs, jere propite miserie, biel che une inmense fulugne di pucefadiis, plebeus che di lavorâ no vevin voie o pussibilitât (al jere za plen di sclâfs che a fasevin dut gratis) ma il pan jerin ustinâts a pretindilu, si ingrumavin e si intrapavin e jemplavin la capitâl. La politiche dai imperadôrs par solit fo di disfamâju e contentâju e tignîju bons. Di plui, chei dal senât si passevin di fêl a viodi che August ur veve gjavâts vie ducj i podês e il pês politic di sot dal nâs e mastiavin clauts. Insome, nol jere un clime masse seren. Muart August al lassà la gjate di petenâ a Tiberi, che no si interessà masse e j lassà cressi il pêl; po a rivarin Caligule e Claudi, o lis feminis de famee e i liberts che lu dopravin come pipinot, che a continuarin a gjavâ podês ai senadôrs, che a bulivin. Cuant che il diademe lu cjapà Neron, che al vignive conseât dal judiziosissin Seneche, i burascjôs rapurats cul senât scomençarin a bonâsi e a dâ jù il bol, ma po al pensà ben di cambiâ politiche, cjocant lis vueris esternis e riformant il fisc, fasint paiâ di plui ai paurs, vadì ai senadôrs, che no a agraderin par nuie, e par zonte al tacà a fâ di dut par svicinâ Rome al implant statâl e culturâl dai reams espotics di jevât, puartantsi di re: jal sperdonarin e Neron fo sassinât.

Biel che i imperadôrs jerin ancjemò leâts al model dal periodi di August (Tiberi scrivè viers cul gust misurât dai aticiscj e Neron componè poems inspirâts a Omêr e Virgili, crodint che la culture dal timp di August e fos dome imitazion dai Grêcs), i literâts, almancul dai timps di Caligule e Ciaudi, jerin scuasit ducj de bande dal senât e a chê tradizion antighe si rapuartarin, dissoterant chel stîl aromai lât in vieri dal asianesim slusignât e sclopetant e plen di efiets sunsurons, soredut sot Neron, bandonant la classiche misure che a vevin doprât i poetis di August. Al tornave a vivi ancje chel vecjo stoicisim intransigent, chel di Caton uticens e di Ciceron (Persi, Lucan) e la leterature tornave a jessi une arme uçade e strozadore par bataiis politichis, come te Trasformazion di Claudi in coçâr, scrite da Seneche dopo la muart dal imperadôr.

Intant Petroni cjalave e pinzeve il gnûf cragnôs mont, plen di vizi e interessât dome ai plasês, dai carieriscj e dai adulatôrs che si jerin insiorâts in curt profitant de coruzion dal vecjo spirt de republiche e de rovine des instituzions tradizionâls e furducjant tal gnûf ambient de cort, là che al nasseve un gnûf gust mondan, dut di salot, fat di artificis sflandorôs e erudizion (il stîl di Curzi Rûf è un esempli che al va propite a pinel, ancje se i studiôs no a son sigûrs su cuant che al vivè).

• Paolo Fedeli, Storia letteraria di Roma, Napoli, Ferraro, 2004
• Ettore Paratore, Storia della letteratura latina, Bologne, Sansoni, 1957