Antoni Vivaldi

 

Prin fî de famee, Antoni Vivaldi al nâs vinars ai 4 di març dal 1678 a Vignesie. In chê dî, un grant taramot al tache il Venit. Al ven batiât in cjase parcè, pene nassût, al jere za in pericul di vite jessint malât. Al ven alore batiât di Margherite Veronese, la femine che lu veve fât nassi e che viodeve di lui. Al ven batiât uficialmenti te glesie di San Zuan Batiste in Bragore dongje cjase sô ai 6 di mai. Il pari al jere Zuan Batiste Vivaldi (1655-1736), fi di un sartôr brescian, che tal 1666 al jere vignût a stâ a Vignesie. La mari Camile Callicchio, fie di un sartôr ancje je, vignude a Vignesie di cualchi an. Sposâts in tal 1676, i Vivaldi a àn vot fîs, di cui doi muarts piçui.

Il pari, barbîr, une vore passionât di musiche, al jentre intal 1685 come violinist inte basiliche di San Marc in chel timp capele privade dal Dôs e no catedre dal vescul. Lis funzions a jerin nome par ocasions particolârs. I musiciscj de capele a jerin une vore prestigjôs e simpri in tal 1685 al jentre come Mestri il famôs Zuan Legrenzi.Insiemit a chest e al di lui coleghe Antoni Lotti, Zuan Batiste Vivaldi al fonde il Sovegno dai musiciscj di Sante Cecilie une confraternite di musiciscj venezians. Al scomençâ dal 1689, Vivaldi pari al sune il violin ancje tal teatri San Zuan Grisostomo e tal Ospedâl dai mendicjants.

Antoni Vivaldi al impare a sunâ il violin dal pari e za di zovin al jere talentuôs. Al ven acetât di zovin te Capele dal Dôs.Il fât di jessi entrât zovin in un ambient musicâl al fo fondamentâl par la sô educazion musicâl e par il sô talent, tant che Vivaldi al rive a cjapâ il puest di sô pari, violinist pitost cognossût te sô ete. Il pari al influençarâ une vore il fî, te vite e soredut in te cariere musicâl.

 

Cuant che Vivaldi al à 10 agns, al ven indreçât te vite di glesie, al ven mandât a studiâ te scuele parochiâl. No si sâ plui nuje di Vivaldi fin al 18 di setembar dal 1693, cuant che al ven tonsurât de bande dal Patriarcje di Vignesie Badoâr. Al tache a studiâ teologje te glesie di San Zimignan prime, e te glesie di San Zuan in Oleo daspò, tal timp la sô famee e jere a stâ a San Martin. Ancje s'al studiave, nol bandone la musiche:la sô abilitât cul violin lu puarte intal 1696 a sunâ come violinist in sorenumar te basiliche di San Marc tes funzions di Nadâl. Il 23 di març dal 1703 al ven ordenât predi, e daurman al ven clamât il predi ros par vie dal colôr dai cjavei. Al continue a vivi cu la famee e a lavorâ dongje dal pari. In tal 1704, al ven dispensât dal dî messe, par vie de sô salût (al sufrive di asme bronchiâl).

 

Tal stês timp, Vivaldi al ven sielzût come mestri di violin des autoritâts dal Piu Ospedâl de Pietât cun une paie di 60 ducâts ad an.

Fondâde tal 1346, cheste istituzion religjose, e jere la plui prestigjôs dai lûcs finanziâts de Serenissime Republiche fondâts par meti i fruts bandonâts, i fîs no ricognossûts, e i fîs des fameis che no podevin permetisi il manteniment. I fruts a restavin fin ai 15 agns par lâ a imparâ un mistîr. Sieradis come intun convent, lis frutis a ricevevin une educazion musicâl di prin ordin, che e faseve di lôr, cjantantis e musiciscj di valôr, te pratiche dal cjant (cualchidune di lôr e podeve cjantâ la part di tenôr e di bâs)e in ducj i istruments. A vegnivin dividudis seont il lôr talent: a la base a jerin lis figlie di coro. Chês cun plui esperience a jerin lis privilegiate di coro, che a podevin cjantâ ancje al di fûr de istituzion e jessi domandadis in matrimoni.Te cime a jerin lis maestre di coro, frutis che a podevin insegnâ a lis plui zovinis. Vegnivin organizâts concierts publics e a paiament.In ducj i ospedai a jerin ancje un mestri dal coro (maestro del coro), responsabil de istituzion musicâl, un organiste, un profesôr d'istruments e altris profesôrs specializâts.

Pôc timp daspò jessi stât nomenât mestri, lis frutis dal ospedâs scomencin a jessi cognossudis par le lôr ativitât musicâl, ancje fûr i confins talians.Vivaldi scrîf par lôr tancj concerts, cjantadis e musiche sacre, tant che Charles de Brosses croniste musicâl de epoche, al scrivarâ impressionât: Le musiche eccezzionâl je chê dai Opedâi, indulâ le "putte" cjantin come agnui e sunin il violin, l'organ, l'oboe, il violoncel, il fagôt; insome, nissun istroment i fâs pore.

In tal avost dal 1704 le sô paie e ven puartade a 100 ducâts, al ven nomenât ancje insegnant di viole all'inglese e intal 1705 al ven incjariât de composizion e de esecuzion dai concierts, la paie e ven puartade a 150 ducâts par an, zontât ae ativitât di scrivi la musiche pes Messis de Pietât e pes fameis dai siôrs di Vignesie.

 

Vê a disposizion musiciscj e cjantants di talent, cence vê pinsîrs di numar, timp o cost, al jere vantagjôrs par Vivaldi che cussì podeve liberâ dute la sô creativitât e sperimentâ dutis lis combinazions dal organic strumentâl. La direzion musicâl dal Ospedal de Pietât e ven dade a Francesc Gasparini mestri di coro, musicist di valôr, ma une vore ocupât a scrivi oparis pal teatri Sant'Agnul. Par chest motîf, Gasparini al lassave dut intes mans di Vivaldi, che al jere deventât di fât, il principâl animadôr msicâl dal ospedâl. Ogni an, la direzion dal Ospedâl e votave se tignî o no i profesôrs. Ancje se Vivaldi al ven raramentri metût ae votazions, in tal 1709 al piert il puest par 7 votos cuintri e 6 a favôr. Daspò jessi stât libar professionist par plui di un an, intal 1711 al ven clamât di gnûf tal Ospedâl de Pietât, simpri daûr votazion de direzion dal Ospedâl. Di sigûr la direzion e veve capît l'impuartance di Vivaldi tal insegnament musicâl de scuele. Intal 1713 Vivaldi al devente responsabil de ativitâts musicâl dal Ospedâl, e in tal 1716, maestro de' concerti (mestri dai concerts). I studîos a son rivâts ae conclusion che, ancje cuant al jere libar, Vivaldi al à scrît simpri musiche par l'Ospedâl, ancje in forme privade.

 

Vivaldi intal 1705 al jere incjariât di isegnâ la composizion dai concierts alis frutis dal'ospedâl. Duncje, si scuen pensâ che al jere za afermât come composidôr a chel timp. Lis sôs oparis a jerin cognossudis, parcè a jerin za in circolazion sot la forme di copie scrite a man, pratiche comun a ducj i composidôrs dal timp. Vivaldi al decît alore di falis stampâ dal editôr plui cognossût di Vignesie, Josef Sala.

 

Si tratave di dodîs sunadis di cjamare a trê (suonate da camera a tre) dediadis al cont Anibal Gambara, un nobil venezian. Chestis sunadis di cjamare a jerin vonde tradizionâls, tal stîl corelian. Tal stês an, Vivaldi al partecipe a un conciert organizât dal abât di Ponpone, ambassadôr di France. La sô famee e jere a stâ intun apartament intal cjamp dai SS. Filip e Jacum, daur de basiliche di San Marc. Intal 1706, Vivaldi pari e fi, a jerin segnalâts intune guide par visitadôrs stranîrs, come i miôrs violiniscj de citât.

Le musiche diven le sô principâl ativitât parcè in te sierade 1706, Vivaldi bandone le ativitât pastorâl par concentrasi miôr su le musiche. Il parcè di cheste decision, Vivaldi lu scrîf in une letare dal 1737, disint che no podeve dî messe par vie de strettezza di petto, sarès a dî le dificoltât di respirazion e il mâl tal pet che il compositôr veve (il mâl veve di jessi une forme di asme bronchiâl) Ma cualchidun dîs che jere ancje un atri parcè.Si diseve che Vivaldi, disint la messe, cuant i vignive tal cjâf l'idee di une fughe, cjapât da l'emozion, bandonave l'altâr par cori te sagrestie, par scrivile di corse.Une volte mitude te cjarte l'idee musicâl, al tornave a dî messe. Ma bisugne ancje dî che Vivaldi, par dute le sô vite, no bandone mai il breviari e il vistît di predi.Il compositôr Ernst Ludwig Gerber al dîs ancje che Vivaldi al jere une vore religjos.Doncje il mâl che lu tormentave, al jere di sigûr il parcè Vivaldi no podeve dî messe.

Cu le difusion de sôs oparis e par vie di jessi un dai miôrs violiniscj di Vignesie, Vivaldi a scomence a frecuentâ le aristocrazie, soredut Palaç Ottoboni.In tal 1707, tal mieç di une fieste dade dal princip Ercolani, ambassadôr dal imperadôr d'Austrie, Vivaldi partecipe a une sorte di gare musicâl cuintri a un atri predi-violiniste, don Zuan Rueta, musicist cumò dismenteât, ma in te epoche protezût da l'Imperadôr in persone.Cheste al jere un onôr riservât nome par i musiciscj che gjoldevin de pui alte considerazion. Tal stês periodo i pui grancj composidôrs son di passaç a Vignesie: Alessandri Scarlatti, il pui cognossût composidôr napoletan al fâs rapresentâ al teatri San Zuan Grisostomo (chel indulà al sunave il pari di Vivaldi) tal timp dal carnavâl dal 1707, dôs de sôs oparis:Mitridate Europatore e il trionfo della Libertà.L'an daspo, sô fî Domeni Scarlatti, famôs sunadôr di clavicembal, al vâ a studiâ cu Gasperini, che al jere deventât amî di sô pari.E ancje Georg Friedrich Heandel, il composidôr pui famôs dal timp, ven a stâ a Vignesie, indulà le rapresentazion de sô opare Agrippina, simpri tal teatri San Zuan Grisostomo, il 26 di dicembar dal 1709, varâ un sucès trionfâl.No si cjatin testemoneancis, ma cun ducj chests composidôrs atôr par Vignesie lasse pensâ che Vivaldi no à di sigûr mancjât le ocasion di cognossju, e che forsît lu àn pocât a scrivi oparis.

 

Vivaldi al à ancjemò ocasions di cognossi personaçs de aristocrazie:tal mês di dicembar dal 1709 fin al mês di març dal 1709 al ven a Vignesie in visite privade il re Fidrì IV di Danimarche, vignût a Vignesie cu le intezion di gjoldi plui che al podeve dal famôs carnavâl. Rivât il 29 di dicembar, la dî daspò al asist a un concert al Ospedâl de Pietât, dirizût par Vivaldi.Il re di Danimarche al à di vê sintût pui di une volte i concerts des frutis dal Ospedâl, dirizudis dal lôr maestro di violino tant che il re di Danimarche lassarâ Vignesie cu le opus 2 di Vivaldi, sarès a dî lis dodîs sunadis par violin e bâs continuât, stampât dal editôr venezian Antonio Bortoli.Il re, amant de musiche taliane e des bielis feminis, al puartarâ cun lui ancje dodîs ritrats in miniature, fâs par lui de famose artiste Rosalbe Carriera.

Il rapuart cu il re di Danimarche al e' forsit leât al sô rapuart cu le direzion dal Opedâl de Pietât.Le votazion dal mês di fevrâr met fin al sô lavôr.Da chest moment fin al mês di setembar dal 1711, di Vivaldi si sâ pôc e nuje.So pari cjate lavôr come violiniste tal teatri Sant Agnul, un dai tancj teatris indulà vegnivin rapresentadis oparis.Al e' forsit in chest teatri che Vivaldi cognôs Francesco Saturnini, impresari associât a Gasperin. Si sâ che al e'stât a Brescie tal fevrâr 1711.

 

No tant content dal lavôr dai editôrs venezians che vevin publicât lis sôs oparis, Vivaldi incarghe il famôs editôr musicâl Estienne Roger e ai sôi sucessôrs, la publicazion de sô gnove opare, l'Estro Armonico une racuelte di dodis concerts par istroments a cuardis in tal 1711.Dedicade al erêt dal Granducât di Toscane Ferdinant III cheste opare al segne il passaç dal "concerto grosso" al concert dal soliste modern.

 

Il vê sielzût chest editôr olandês, puartarâ Vivaldi a jessi cognossût in dute europe. Il manuscrit dal 'Estro Armonico al finirâ tes mans di Johann Gottfried Walther, grant amatôr di musiche taliane, cusin e amî di Johann Sebastian Bach.

Bach, che al jere a Weimar, al reste cussì entusiasmât dal stîl di Vivaldi, che al cure le trascrizion dai concerts dal "Estro Armonico" par clavicembal.Bach al resterâ une vore influenzât dal stîl di Vivaldi.

Dal mês di setembar dal 1711, Vivaldi al torne di gnûf mestri di musiche ae "Pieta'". In tal 1712 a Brescie, Vivaldi scrîf il sô capolavôr di musiche religjose, il Stabat Mater.

In te Vignesie dal XVIII secul, la opare jere il gjenar musicâl pui popolâr. Jerin tancj teatris in concorence jenfri di lôr. Chel che si è simpri crodût il prin lavôr teatrrâl di Vivaldi, l'"Ottone in villa" (RV 729) al fo rapresentât tal Teatri des Graciis di Vicence in tal mês di mai dal 1713.Gnovis ricercjis an puartât al 1705 le prime opare di Vivaldi pal teatri, il "Creso tratto dalle fiamme" di Jaroni Palani, pal Teatri S.Angelo di Vignesie . In tal 1714 Vivaldi al devente impresari e diretôr teatrâl dal Teatri S.Angelo, indulâ al fâs rapresentâ la sô segonde opare: l'"Orlando finto pazzo" (RV 727)Ma cheste opare no a il sucès che Vivaldi al sperave e par "salvâ" la stagjon Vivaldi al presente l'"Orlando" za puartât in scene l'an prime cun cualchit zonte.In tal 1716 Vivaldi al fâs rapresentâ "Arsilda regina di Ponto" che al fo un sucès, cussì ancje l' "Incoronazione di Dario" (RV 719). In tal stès moment le Pietât domande a Vivaldi le realizaziòn di doi lavôrs par la glesie: il "Moyses Deus Pharaonis" (RV 643) lât piardût e il "Juditha Triomphans" (RV 644) un dai lavôrs di Vivaldi pui cognossûs.Vên comissionât par lis celebrazions de vitorie de Republiche di Vignesie cuintri i Turcs e le reconcuiste de isule di Corfù. Lis parts vocals, sedi chês di femine sedi chês di om, vegnin interpretadis dutis da lis frutis de Pietât.L'organic musicâl comprindeve ancje istroments come il flauto, clarins, oboe d'amôr e mandolins par mostrâ le bravure des frutìs tal sunâ istroments rârs.

Le sô ativitât di compositôr dal gjenar pui di mode lu puarte a jessi criticât in un scrît dal 1720 clamât "il Teatri alla Moda" publicât anonim, ma scrît dal compositôr e leterât Benedèt Marcello. Marcello al jere un leterât e magjstrât venezian, e al jere ancje un compositôr di valôr, stimât ancje da Johann Sebastian Bach, ma al veve une opinion pui aristocratiche de musiche e no viodeve ben le bande pui "popolâr" de produzion oparistiche de sô epoche e dut chel che al jere di mode.I riferiments a Vivaldi jerin un anagrame dal non di Vivaldi (ALDIVIVA) e une sorte di caricature. Chest scrît al criticave certis robis dal teatri musicâl de epoche, ma no semeê che al fôs riferît ae ativitât musical di Vivaldi.

In tal 1717 ven ofiart a Vivaldi, l'incaric prestigjôs di mestri di capele da cjamare dal princip Filp d'Assia Darmstadt, governatôr di Mantue e grant appassionât di musiche. Vivaldi alore si trasfèris in te citât lombarte e al reste par trê agns. Di chest periodo (1720) restin amancul tre oparis, il Tito Manlio (RV 738) e varis cjantadis e serenadis. Daspo di chest periodo, Vivaldi al è a Milan, indulà, in tal 1721 al presente il drame pastorâl La Silvia (RV 734)e in tal 1722 l'oratori L'Adorazione delli tre re magi al bambino Gesu' (RV 645 lât pierdût) Simpri tal 1722 Vivaldi al va a Rome, invitât dal pape Benedet XII a sunâ par lui.tal 1725 al torne a Vignesie, dulâ tal stês an al compon cuatri lavôr teatrai.

Chest al e' il periodo dulâ Vivaldi compon la so opare pui cognossude, "Le quattro stagioni", cuatri concerts par violin, dulâ vegnin rapresentâs in musiche, lis senis de nature. Le idee di cheste opare je nassude tal periodo de sô permanence in tes camagnis atôr Mantue.

Cheste opare segne un gambiament te concezion musicâl: Vivaldi fâs un descizion in musiche dal scori de aghe dal flum, dal cjant dai ucèi, dal uacâ dai cjans, dai muscjins, dal vâi dai pastôrs, de tampieste, dai balarins cjocs, de gnot, de lis scenis di cjace. A ogni concert je zontade un scrît in rime dal stês Vivaldi cu le descrizion de scene mitude in musiche. Vegnin publicâs come i prins cuatri concerts di une recuelte di dodîs concerts: Il cimento dell'armonia e dell'inventione Opus 8 publicade a Amsterdam tal 1725 da Michel-Charles Le Cène, che al veve cjapât il puest di Estienne Roger come editôr.

A Mantue Vivaldi cognôs Anna Girò (Anna Maddalena Teseire) in te epoche ancjemò une frute ( si crôt che sedi nassude atôr dal 1710) la sô studentesse pui cognossude, destinade a divignì une cantante liriche famose.

Jenfri dal 1723 e il 1740, Vivaldi al scrîf amancul 15 rapresentazions oparistichis che viodin la partecipazion di Anna Girò. Si e' tant fevelât parsore il rapuart jenfri Vivaldi e Anna Girò, rivant parfin a pensâ a une relazion d'amôr, ma fin a chest moment no son stâs cjatâs documents comprovant cheste teorie.

Une volte rivât al pont pui âlt de sô cariere di compositôr, Vivaldi veve un grum di comisions de bande de fameis de nobiltât di dute l'Europe.Le cjantade nunziâl La Gloria, Imeneo (RV 687) fo scrite pal matrimoni di Luîs XV. L'Opus 9,"la Cetra" ven dedicade al'imperatôr Carli VI.

Vivaldi rive a cognossi l'imperatôr in persone, cuant Carli VI al vâ a Triest par sovraintindi le costruzion dal puart gnûf.A Carli VI plaseve une vore la musiche di Vivaldi, tant che, come al conte l'imperatôr stês, in doi agns, al passe pui timp in companie dal compositôr, che con i soi ministris. A Vivaldi vèn conferît il titul di cavalîr, une medae in aur, e al vèn invitât a Viene.Par ringrazialu, Vivaldi regale a l'imperatôr une copie firmade de opare "la Cetra".Ma cheste opare regalade a l'imperatôr je scuasit completament difarente da chê publicade cun il stês titul, si crôt che par un ritart de stampe, Vivaldi sedi stât costrinzût a meti insieme une colezion di concerts.

In tal 1730, Vivaldi acompagnât da sô pari, al vâ a Viene e a Praghe, indulâ ven rapresentade la sô opare "Farnace" (RV 711).Di chest periodo al e' l'incuintri cun i doi pui grancj scritôrs di oparis talians de epoche: L'Olimpiade e Catone in Utica forin scritis parsore un libret del za cognossût Pieri Metastasio, che al jere divignût tal 1730, poete de cort a Viene. Le Griselda, invezit al è un adatament, de bande dal zovin Carli Goldoni, di un libret di Apuestul Zeno.

 

Ma le vite di Vivaldi, come chê di tancj compositôrs de sô epoche, finîs tal mieç di dificoltâs economichis e umanis.Propît in te sô Vignesie, indulâ Vivaldi al jere pui cognossût e preseât, par colpe dal cambiament di gust musicâl e de afermazion de opare napoletane, Vivaldi al vên daurman dismenteât.Vivaldi alore, al decît di lâ a Viene, dulà al jere stât invitât da Carli VI.

Di sigûr Vivaldi veve tâl cjâf di meti in scene cualchi opare tal teatri di Viene.Ma tal 1737 al sucêt un fât che al segne Vivaldi tal cûr:in te vilie de stagjon de opare a Ferare dulâ Vivaldi al sperave di rifâsi de dificoltâs, vên clamât dal nunzîat apostolic.Il nunziât apostolic comuniche a Vivaldi la proibizion dal vescul, di lâ a Ferare.Cheste decision, motivade dal fât che Vivaldi no diseve messe, e che al jere acompagnât da Anna Girò e atrîs feminis, tae lis gjambis a ducj i progjets di Vivaldi.

In une letare mandade al sô protetôr di Ferare, il marchês Guido Bentivogno, Vivaldi si lamente une vore di chest fât, disint che no podeve dî messe par vie dal mâl che veve da tant timp, e che con dutis lis feminis che lu acompagnavìn, dutis onestis e di comprovade virtût, veve un rapuart di diretôr musicâl.Ma Vivaldi si sfuarce une vore, ma no rive a otegni nuje, e par lui, la mancjade rapresentazion de sô opare je une grande piardite economiche. Par vie di chest fât, Vivaldi decît di lâ vie.

Ma la fortune no jude Vivaldi, tant che pôc dopo jessi rivât a Viene, tal mês di otubar dal 1740, Carli VI al mûr.La muart di Carli VI puarte la Vuere di secesion austriache. La fie di Carli VI, la future regjine Marie Taresie d'Austrie, si viôt costrinzude a scjampâ in Ongjarie. Ducj i teatris de citât vegnin siarâs par un an, lassant Vivaldi cence protezion e cence lavôr.Vivaldi si viôt costrinzût a vendi la sô produzion musicâl par tirâ indenant.

In te gnôt jenfri il 27 e il 28 di luj dal 1741, par vie di une infezion intestinâl o forsit par vie di chel asme bronchiâl che lu veve tant tormentât, Vivaldi al mûr. No ven soterât tal simitieri, ma in une fuesse comun al Sittal Gottsacker di Viene, dongje de Karlskirche. La sô musiche ven dismeteade fin tal mieç dal secul XX, cuant Vivaldi al ven discuviart e al torne al jessi ricuardât come un dai pui grancj compositôrs de sô epoche.

Vivaldi al è stât un innovatôr de musiche dal sô timp.Al a dât pui evidence ae struture formâl e ritmiche del concert cirînt simpri di pui i contrascj armonics e ritmics e inventant temas e musichîs in forme gnove. La fuarce de musiche di Vivaldi al stâ tal fât di jessi di facîl scolte dal grant public, ma plâs ancje a chei che si intindin di musiche classiche. Tal sô timp, Vivaldi al plaseve une vore soredut ai compositôrs todescs, jenfri i cuai: Johann Adam Miller, Ernst Ludwig Gerber e il flautiste e compositôr Johann Joachim Quantz, che al veve scoltât cualchit concert ( di sigûr L'Estro Armonico") di Vivaldi a Pirna, tal 1714, restant une vore impressionât.

 

Le musiche di Vivaldi cjate un bon ricognossiment de bande dai compositôrs todescs, tant che vignî influenzâs.Il compositôr todesc che al cjape di pui di Vivaldi al e' di sigûr Johann Sebastian Bach.

Bach no a mai cognossût Vivaldi di persone, ma ven a cognossince de sô musiche, tant da studiale e da jessi une vore influenzât, soredut de forme dal concert di Vivaldi.Bach studie la musiche di Vivaldi al pont di trascrivi par clavicembal bessôl, i concerts di Vivaldi che pui jerin plasûs, jenfri i cuâi il famôs "Concerto per cuatri violins, arcs e clavicembal op.3 n.10" (RV 580)

Si crodeve che al fôs stât Vivaldi a trascrivi par violin cualchit opare di Bach, ma di recent al e' stât dimostrât che al fô Bach a trascrivi oparis di Vivaldi (in te epoche baroche, trascrivi le musiche di cualchidun al jere un mût di fâ onôr). Vivaldi al jere cognossût e stimât ancje tal ambient musicâl francês.In France Vivaldi al ven ricuardât ancje daspo la sô muart:In tal 1775 Jean-Jaques Rosseau scrîf un adatament par flauto de «Primevere».

Al vèn invezît tacât dai inglês.Charles Avison al diseve che la musiche di Vivaldi jere buine come 2divertiment pai fruts".Ma ancje se cualchidun lu tacave, la musiche strumentâl, di Vivaldi veve sucês e jere stampade in dute l'Europe. In Italie, Vivaldi al veve influenzât tancj compositôrs e veve puartât un grant rinovament soredut in te musiche strumentâl de sô epoche, ma al vên ignorât dai studiôs e daspo de sô muart, i sôi lavôrs teatrâi vegnin daurman dismenteâs, par colpe de mode dal timp, di cirî simpri gnûf autôrs e gnovis musichis.

Vivaldi vèn dismenteât fin al prin Nufcent, indulâ al vèn discuviert di gnûf dai musiciscj de epoche fin a jessi considerât un dai mestris de scuele baroche taliane.

Su Wikimedia Commons al è disponibil contignût multimediâl relatîf a: Antoni Vivaldi

• (inglês) Antonio Vivaldi
• Opare Atenaide
• Biografie complete e oparis
• Vivaldi: Le Quattro Stagioni scolte le opare Magazzini-Sonori
• lis cuatri stagjons
• Concert par violin e orchestre in La minôr RV 356