Alfred Michaux

Alfred Michaux
Persona informo
Naskiĝo	5-an de julio 1859 (1859-07-05) en Pas-de-Calais
Morto	en 1937, antaŭ majo en Boulogne-sur-Mer
Lingvoj	Esperanto
Ŝtataneco	Francio
Okupo
Okupo	esperantisto advokato
Esperanto
Esperantisto numero	6305
v • d • r

Alfred MICHAUX [mi:ŜO:] estis franca advokato kaj pionira esperantisto. Li naskiĝis la 5-an de julio 1859 en Clenleu en la franca departemento Pas-de-Calais, apud Boulogne-sur-Mer, do Bulonjo ĉe Maro, kaj mortis en 1937 en Boulogne-sur-Mer, Bulonjo ĉe Maro.

Li profesie agis kiel advokatestro en Bulonjo. Tre agema, li prezidis societon por infanoj laŭleĝe punindaj; okupiĝas pri sportoj, ktp. Li studis kaj povis paroli la planlingvon „Neo-Latin“ de E. Courtonne. Al Esperanto li estis varbita de Louis de Beaufront. La unua kongreso en Boulogne dum 1905 restos lia gloro. Li iniciatis, preparis kaj sukcesigis ĝin. En la 7-a de aŭgusto 1904 okazis en Calais (Kalezo) kunveno de 120 esperantistoj. Kelkaj proponis, ke tian feston oni rekomendu en la venontaj jaroj. Tiam Michaux ekkriis: „Nu, mi invitas vin la venontan jaron en Boulogne por vera, grava Esperantista Kongreso“. Tiu historia frazo estas la fonto de niaj UK-j.

Dum la unua UK li gastigis L.L. Zamenhof. Lia praktika senco kuraĝigis la aŭtoron de la lingvo kaj efike helpis al la granda sukceso kaj al la decidoj alprenitaj. Michaux viciĝis inter la plej varmaj kaj agemaj propagandistoj de tiu epoko. Li faris sennombrajn paroladojn en Francio kaj ankaŭ en Belgio, Nederlando, Britio: Li prezidis la Societon Internacian de Juristoj Esperantistaj. Li opiniis, ke en kelkaj medioj (ekz. kuracistoj) oni ne povas sukcesigi alian lingvon ol la latinan, kaj li proponis utiligi latinon simpligitan „Romanal“. Tiu provo ne havis sukceson. Krom multaj artikoloj en francaj ĵurnaloj li verkis: Kun Paul Boulet:, Nouvelle methode pour apprendre seul l' Esperanto, 1905, Libera Evolucio aŭ Akademio, 1908, Catechisme de l' Esperanto.

Li estis ano de Academia pro Interlingua.

• Libroj kaj aliaj dokumentoj de kaj pri Alfred Michaux en la Kolekto por Planlingvoj kaj Esperantomuzeo de la Aŭstria Nacia Biblioteko (germane)
• Artikoloj de kaj pri Alfred Michaux en Elektronika Bibliografio de Esperantaj Artikoloj (EBEA)
• Nekrologo en revuo Esperanto (UEA) Majo 1937, p. 40.

Ĉi tiu artikolo baziĝas (parte aŭ tute) sur artikolo el la Enciklopedio de Esperanto. La originala teksto kontroleblas en interreta arkivo de la fonto.