Ynysoedd Balearig

Ynysfor yng ngorllewin Môr y Canoldir, ger arfordir dwyreiniol Penrhyn Iberia, yw Ynysoedd Balearig (hefyd Yr Ynysoedd Balearaidd ac Ynysoedd Baleares;^[1] Catalaneg: Illes Balears; Sbaeneg: Islas Baleares). Maen nhw'n ffurfio un o gymunedau ymreolaethol Sbaen. Fe'i lleolir yn y Môr Canoldir oddi ar arfordir gogledd-ddwyreiniol Sbaen. Rhennir yr ynysoedd yn ddau grŵp:

• Y Gimnesias: Menorca, Mallorca, Cabrera a rhai ynysoedd llai megis Dragonera.
• Y Pitiusas: Ibiza, Formentera ac ynysoedd bach o'u cwmpas.

Ynysoedd Balearig

Math	ynysfor
Prifddinas	Palma de Mallorca
Poblogaeth	1,149,460, 1,173,008
Daearyddiaeth
Gwlad	Sbaen
Arwynebedd	4,991.66 km²
Gerllaw	Y Môr Canoldir
Cyfesurynnau	39.5°N 3°E
Ffeiliau perthnasol ar Comin
[golygwch ar Wicidata]

Ymddengys fod y gair "Balearig" yn dod o'r iaith Bwneg yn wreiddiol, ac yn dynodi gwlad y "taflwyr cerrig". Roedd milwyr o'r ynysoedd hyn yn enwog am ei gallu gyda ffyn tafl, a gallent eu defnyddio i daflu cerrig bychain bron fel petaent yn fwledi. Gwnaeth cadfridogion fel Hannibal lawer o ddefnydd ohonynt yn eu rhyfeloedd yn erbyn y Rhufeiniaid pan oedd yr ynysoedd ym meddiant Carthago.