Puasa (bulan)
Puasa[1][2] (hurup Arap Gundul: فواس atawa فواسا) atawa Ramadan[3] atawa Romdon[2] (hurup Arap Gundul: رمضان) ada bulan kesembilan di dalem almenak Selam atawa Hijriah. Ni bulan punya nama di basa Arapnya – Ramaḍān (basa Arap: رمضان), nyang asalnya deri kata رمض r-m-ḍ 'ngelekep, panas nyenget'.
Terdisi
[permak | permak sumber]Ni bulan ada dianggep atu bulan paling istimèwa ama paling ditunggu-tunggu ama banyak umat Selam deri mana-mana antéro dunia, sebab ni bulan diyakinin ada banyak berekah di dalemnya. Orang Selam pada nglakonin ibadah puasa sebulan jengkep, ibadah terawé, ama laèn-laèn ibadah, masup juga' ibadah jakat pitrah nyang pardu dibayarin sebelonnya sembahyang lebaran. Kaga' cuman pengrayaan nyang sipatnya èmang ibadah, melèngken juga' ada laèn-laèn keriaan nyang sipatnya budaya, kaya' arak-arakan, buka' bareng, èns.
Di sebagèan orang Selam punya terdisi, ada juga pengrayaan Malem Nujululkur'an (hurup Arap Gundul: مالم نزول القران; basa Arap: نزول القرآن nuzūl al-Qurʾān 'mudunnya Kur'an'), ya'entu atu malem nyang diyakinin sebagé malem di mana Bagènda Nabi Muhammad nerima wahyu deri Malaèkat Jabra'il di Goa Hira.[4] Di Indonésia, biasanya dirayain saban malem 17 Puasa. Di ni keriaan, biasanya orang pada ngatamin ramé-ramé dah tu Kur'an ampé kelar.
Selaèn entu malem, ada lagi atu malem paling istimèwa nyang namanya Malem Laèlatulkadar[5] (hurup Arap Gundul: مالم ليلة القدر; basa Arap: ليلة القدر 'malem kemuliaan, malem takdir'). Ni malem diyakinin ama semua orang Selam sebagé malem nyang di dalemnya ada pahla nyang setumbra-tumbra, hata lebi baè' deri serèbu bulan.[6] Diyakinin, sepagémana ada kesebut di dalem hadis, Malem Laèlatulkadar adanya di sepulu malem belakangan di bulan Puasa.[7][8] Mangkanya dah tu, orang pada ramé-ramé nimbrung i'tikap di mesigit. Ada nyang pol sepulu malem akir jengkep, ada nyang cuman malem ganjilnya doang.
Ruju'an
[permak | permak sumber]- ↑ Grijns, C.D. (1991). Jakarta Malay. J. 2. KITLV Press. h. 119. Serènta juga' dengen macem pengocapan laènnya, kaya' Puasa', Puasè, Puase, Puase', Poasa, atawa Poasa'.
- ↑ a b Chaer, Abdul. (2009). Kamus Dialek Jakarta. K. Rép. Jakarta: Penerbit Masup Jakarta.
- ↑ Grijns, C.D. (1991). Jakarta Malay. J. 2. KITLV Press. h. 119. Selaèn entu, di masarakat juga' ada mashur pengocapan Romadon.
- ↑ Sehe, Sarbin. (7 April 2023). "Hikmah Peringatan Nuzulul Qur`an - Syiar Ramadhan ke-16 1444 H". Kanwil Kemenag Prov. Sulut. Dicomot 21 Juni 2023.
- ↑ Juga' ada nyang ngocapnya Laèlatulgadar atawa Laèlatulkodar.
- ↑ Kur'an, 97:3.
- ↑ Ṣaḥīḥ al-Jāmiʿ, no. 1029.
- ↑ H.R. al-Ṭabrānī, no. 11796.