Gunung Merapi

Gunung Merapi (ketinggian puncak 2.930 mdpl, di taon 2010; Jawa: ꦒꦸꦤꦸꦁ​ꦩꦼꦫꦥꦶ, tukerhurup: Gunung Merapi; hurup Arab Gundul: ݢونڠ مرافى) entu gunung api nyang letaknya di pusernya Pulo Jawa èn jadi atu gunung api nyang paling nyala atawa getap di Indonésia. Dia punya lamping bekidulnya masup ke dalem guwernemen Kabupatèn Slèman, D. I. Yogyakarta, èn belalornya masup ke dalem wilayah Propinsi Jawa Tenga, ya'entu Magelang Kabupatèn bekulon, Boyalali belètan, èn Klatèn di bekidul-wètan. Daèrah hutan di kitaran puncaknya uda jadi daèrah Taman Nasional Gunung Merapi sederi taon 2004.

Enni gunung ada punya kemungkinan bencana banget lantaran menjuntrung catetan nyang mutahir, Gunung Merapi uda meletus saban dua-lima taonan èn kitaran gunungnya entu daèrah nyang padet penduduk. Sederi taon 1548, enni gunung uda meletus ampé 68 kali. Magelang Kota èn Yogyakarta entu dua kota gedé nyang paling deket ama enni gunung, jaraknya kurang deri 30 km deri dia punya puncak. Di lèrèngnya masing ada penduduk ampé ketinggian 1.700 mèter èn jaraknya cuman 4 km deri dia punya puncak. Lantaran pentingnya, gunung Merapi jadi atu deri 16 gunung api di dunia nyang keitung dalem proyèk Decade Volcanoes.