Radio Tirol

Radio Tirol is a Regionalradiosenda fi Tiroi und Siidtiroi, dea vom ORF im Råhmn vom Östarreich 2 (Östarreich-Regional) betriem wead. Di Sendunga wean im Låndesstudio Tiroi produziad und ågwicklt.

Scho båid nåch'm Start vo da RAVAG håms in di Bundeslända Relaisstationen zua Iwatrågung vo oam in Wean ausgstråidn Programm arrichtet. In Tiroi håm di easchtn Rundfunkvasuachsprogramm 1926 in Innschbruck und Aldrans ståttgfundn. Di Gschicht vom Låndesstudio Tiroi geht bis in di nåch da französischn Besåtzungszone 1945 arrichtetn "Sendergruppe West" zrugg. Dee håt Studios in Dornbirn und Innschbruck khåbb. 1952 senn åi Sendeånlång ån di Tiroia Låndesregiarung iwagem woan, no friara ois wia in ondan Besåtzungszona. As Programm wår bunt gmischt mit Lokalnåchrichtn und Lokalinformationa und emso mit klassischa Musigg, Höaspüü oda mit Heafoing, dee ma heid "Features" hoaßt. In da Literatuaåbteilung wenn Talente wia da Ernst Grissemann, Axel Corti, Otto Grünmandl oda da Bert Breit herångwåggsn. Zwischn 1954 und 1956 is di ehemåige Sendergruppe West in an ORF iwagfiad woan.

Radio Tiroi is am 1. Oktoba 1967 im Zuge da Eifiarung vo de Stuktuaprogramme vom ORF ois "ÖR-Radio-Tiroi" in heidiga Form auf Sendung gånga. 1972 is as heidige Låndesstudio im Innschbrucka Stådttoal Saggn aöffnet woan. Do wean nem am Schweapunkt Heafunk a Feanseesendunga fi Österreich-Bild produziad, seit 1988 a di Nåchrichtnsendung Tiroi heute. Im Jåhr 1992 is di oite Bezeichnung ÖR (Österreich-Regional) in Ö2 umbnånnt woan. Weng da Eifiarung vo di privatn Regionalheafunksenda is da Nåm "Ö2" imma mea in'n Hintagrund drängt woan und heitztåg wead da Nåm "Radio Tirol" weng da bessan Profiliarung gengiwa da Konkurrenz heagnumma.

Da Schweapunkt vom Sendegebiet und dessn Berichtaståttung liegg in Tiroi (mit Siidtiroi und Osttiroi). As Musiksortiment reicht vo Oldies iwa Schlåga und voikstimliche Musigg bis hii zua Voiksmusigg.

Radio Tiroi wead im Låndesstudio Tiroi produziad und ausgstråid. Gelengtlich gibs bei Radio Tiroi aa Sondasendunga, wia z. B. bei an Schirennen oda bei da Messn in Innschbruck.

Es gibb aa an Siidtirola Privatsenda, dea a Radio Tiroi hoaßt (bnånnt nåchm Dorf Tiroi). Es is friara aa bis in'n Raum Innschbruck ausgstråid woan, etzad is di Frequenz owa vom Radiosenda Südtirol 1 iwanumma woan.

• tirol.orf.at Tirola Netzseitn vom ORF mit Radio-Tirol-Livestream