Fluß

A Fluß (im Boarischen mit longen u wia Fluus; Plural: Fliss, ahd. fluz; friara aa d Och) is oiwei a Siasswossa, des wos rinnd und rechd broad und long is. Des is da Untaschiad zan Bachal. Owa aus om Bachal ko a Fluß wean, wonn nua gnua ondare Bachal dozuakemma und so meah Wossa do is.

Da Fluß is wichtig fia'd Ekologie. Easchtns wei ea a Wossaspeicha is, zwoatns wei ma'n zan Umanondafoahn nemma ko, drittns fia'd Fiisch und ondare Viecha zan Wohna. Fian Mensch is a no wichti, wei ma domid a Elektrizitet mocha ko, und zwengam Transpoat. Aussadem hom se ofd om Ufa vo de großn Fliss vaschiedne Kuituan entwicked. Des ko deszweng gwen sei, wei duat da Bodn rechd fruchtboa woa, und wei ma afm Wossa weid umanonda kemma is, wos guad fia'n Handl woa. Wos affoid, is, doss Fliss eingdli imma gonz oide Nama hom, de ma heit goa nimma vastähd. Ba a poa hod ma'n Nam a eihdeitschd. Meisdns hod'a se da neiche Nam owa'n Sinn van oidn Nam ghoidn.

Da zweitgressde Fluß vo Eiropa is de Donau. De fongd: in Sidwestdeitschland im Schwoazwoid o, fliassd donn duach Bayern, ba Bassa rinnds donn gmoasom mid'm Inn und mid da Ilz noch Östareich eini und vo duadn iwa Ungarn, Serbien und Rumänien eini ins Schwoazze Meea.