Schwedn

Amtssprache	Schwedisch ('svenska), dazua de Minoritetnsprochn (Finnisch, Jiddisch, Sami, Meänkieli, Romani)
Hauptstadt	Stockhoim
Staatsoberhaupt	Kini Carl XVI. Gustav
Regierungschef	Ulf Kristersson
Fläche	447.420 km²
Einwohnerzahl	9.747.355 (31. Juli 2015)
Bevölkerungsdichte	22 Einwohner pro km²
Bruttoinlandsprodukt pro Einwohner	42.392 US-$ (2005)
Index der menschlichen Entwicklung	(5.) 0,951
Währung	Schwedische Krone (SEK)
Nationalhymne	Du gamla, Du fria („Du oida, Du freia")
Zeitzone	UTC+1 MEZ; UTC+2 MESZ (Meaz bis Oktoba)
Kfz-Kennzeichen	S
Internet-TLD	.se
Telefonvorwahl	+46

Der Artikl is im Dialekt Obaboarisch gschriem worn.

Schwedn (schwedisch: Sverige, dt.: Schweden) is a Land in Nordeiropa. Schwedn liegt auf da skandinavischn Hoibinsl, grenzt im Westn an Norwegn, im Nordostn an Finnland und is im Sidwestn duach de Öresund-Bruckn mit Dänemark vabundn. Schwedn is Mitglied vom Nordischn Rat und seit 1995 vo da EU und is duach sein Woifoartsstoot berihmd.

Schwedn is a konstitutioneje Monarchie. Des hoasst s Parlament und de Regiarung wean vom Voik gwejd, s Stootsowahapt is owa da Kini, Carl XVI Gustaf. De Haptstod vo Schwedn is Stockhoim.

Eadkunde

Schwedn grenzt ons Kattegat, on de Stootn Norwegn und Finnland sowia an de Ostsee. Za Schwedn ghean eppa 221.800 Inseln; Gotland und Öland, boade in da Ostsee, san de gresstn.

As Land is iwawiegend floch bis higlig, nur entlang vo da norwegischn Grenz gibts hehane Beag, as skandinavische Gebiag (Skandn) mit Gipfen iwa 2000 m. Da hexte Beag is da Kebnekaise mit 2111 m. In Schwedn gibts 28 Nationalparks.

Schwedn wead in drei Grossregiona eiteit: Nordschwedn (Norrland), Middlschwedn (Svealand) und Sidschwedn (Götaland).

De lengstn Fliss vo Schwedn san Klarälven, Torne älv, Dalälven, Ume älv und Ongermanälven. De gresstn Senn san Vänern, Vättern, Mälaren und Hjälmaren.

Bevejkarung

Mit mea wia 9,7 Millionen is Schwedn s eiwohnareichste Land in Skandinavien. Davo san eppa 90 Prozent ethnische Schwedn. Danem hods vor oim an da Grenz noch Finnland an Haffa Finnen, de Samen im Noadn und an Haffa zugroaste Auslenda. In mange Stodtei vo Stockholm hods mea wia 95% Auslenda.

De gresstn Städt vo Schwedn san

Stockholm (851.155 Eihwohna 2010)
Göteborg (515.253)
Malmö (261.549)
Uppsala (127.734)
Västerås (107.194)

Eppa 75% vo de Schwedn san in da evangelischn 'schwedischn Kiach, da Rest san Moslems, andas Kristnvoik, Judn oda a ganz wos andas.

Politik

Wia de Nochbalenda Denemark und Norwegn is a Schwedn a konstitutioneje Monarchie]. Des hoasst, dass a an Kini ois Staatsoberhaupt ham - seit 1973 is des da Carl XVI. Gustav - dass dea owa net bsundas vui zab sogn hod. D Regiarung wead vo am Ministerprrsidenten gleit, wo zwoa vom Kini eanannt, owa vom Parlament bestimmt wead. S Parlament, in Schwedn riksdag ghoassn, wead oi via Joar gwejd. Im Reichsdog (riksdag) san de wichtigstn Partein d Sozialdemokratn (Sveriges socialdemokratiska arbetareparti) und de konservativen vo da modaratn Sammlungspartei (Moderata samlingspartiet). De Sozialdemokraten san zwar traditionej de steakste Kroft in Schwedn und ham in de letztn Joarzehnt a enorms Sozialsystem afbaut, owa seit da letztn Woi 2006 is da Fredrik Reinfeldt vo da Sammlungspartei im Amt.