La Voz de Asturias
 La Voz de Asturias | ||
|---|---|---|
 | ||
| País | España | |
| Idioma | castellanu y asturianu | |
| Categoría | Xeneralista | |
| Abreviatura | LVA | |
| Añu de fundación | 10 d'abril de 1923 | |
| Desendolcu | ||
| Editor | Ediciones Periódicas del Noroeste, SL | |
| Subeditores | La Voz de Galicia, SA | |
| Circulación | ||
| Circulación | Mediu dixital y físicu (hasta 2012) | |
| ISSN | ISSN 9968-8999 | |
| https://www.lavozdeasturias.es/ | ||
| [editar datos en Wikidata] | ||
La Voz de Asturias ye un diariu dixital asturianu fundáu como periódicu'l 10 d'abril de 1923.
El 19 d'abril de 2012 desapaeció como talu en formatu papel pero resurdió como dixital en 2016 a resultes de l'adquisición, por parte de la corporación La Voz de Galicia, del diariu dixital asturiano Asturias24, que fuera fundáu en 2013.
Defínese como una referencia lliberal y como un diariu progresista, dinámicu y plural.
Perteneció al Grupo ZETA dende 1986 con Luis Mugueta como direutor. Les dificultaes económiques d'esti grupu amenazaren con suponer el fin del diariu, que foi finalmente vendíu a Mediapubli el 5 de marzu de 2010, pasando a distribuyise xunto al diariu Público.
Según la OJD durante 2004 tenía una tirada de 9.767 exemplares de llunes a sábadu y de 13.011 los domingos.
Historia
[editar | editar la fonte]El diariu foi fundáu pol industrial vascu José Tartiere Lenegre (Conde de Santa Bárbara de Lugones) en 1923, con una orientación lliberal y la so redaición y talleres na cai Gil de Jaz d'Uviéu. Yera una época de fondu desenvolvimientu de los medios de comunicación n'Asturies, cola apaición del diariu Región tamién esi mesmu añu o de Radio Asturias (EAJ-19) en 1925. La Voz de Asturias cuntó amás cola fuerte competencia del diariu socialista Avance, tamién cola so sé n'Uviéu.
Na década de 1960, el periódicu entra na so primer gran crisis empresarial. La competencia vien agora de la Prensa del Movimientu, grupu de diarios estatales que n'Asturies tienen como cabezaleru a La Nueva España. Nesta época, La Voz de Asturias conviértese nuna Sociedá Anónima y tresllada la so redaición a la cai uvieína General Elorza. Entama entós a medrar la so influyencia y difusión por mor de la so llinia crítica y democrática, siempres cola moderación a la qu'obligaba la censura impuesta so la prensa.
Esa época d'esplendor fina en 1975, col aniciu de la transición democrática n'España y l'apaición de delles cabeceres d'ambitu estatal y rexonal (Asturias diario regional, El Correo de Asturias o, más alantre, La Prensa, ente otros). La cris algamó'l so momentu fonderu en 1986, col entamu d'una fuelga que duró casique un mes nel que'l diariu nun saliera la cai. La fuelga finó col acuerdu algamáu pola empresa editora col Grupo Zeta, responsable del progresista El Periódico de Cataluña y del exitosu selmanariu Interviú, xurdío tres l'aniciu de la etapa democrática n'España.
La integración, en 1986 de La Voz de Asturias nel grupu rexíu pol empresariu Antonio Asensio supuso un cambiu drásticu nel diseñu, la imaxe y la cabecera del diariu, qu'adoptó l'aspeutu gráficu del diariu catalán. Poro, la difusión de La Voz de Asturias entamó a medrar hasta rondar los 24.000 exemplares de media diaria nel 1994.
El 19 d'abril de 2012 el periódicu anunció'l so cierre, al nun poder superar el procesu concursal nel que taba somorguiáu y dempués d'ochenta y nueve años de vida. Nel añu 2016 resurde dixitalmente, abandonando la so versión física.
Referencies
[editar | editar la fonte]Enllaces esternos
[editar | editar la fonte]
Datos: Q2472456